BYU–Pathway i le Lalolagi Atoa

I le 2009 na faatagaina ai e le Fono Faatonu o Aoga le Iunivesite o Polika Iaga–Idaho e fatu se polokalama faaleaoaoga fou e ta’ua o le Pathway ma le faamoemoe mo le tatalaina o avanoa mo aoaoga maualuluga atu mo le toatele o tagata o le Ekalesia. O le Pathway o se polokalama e tolu-semesa lea e sauniaina tagata o le vasega mo aoaoga maualuluga atu e ala i le aveina o kosi i luga o le initoneti ma le faapotopoto faatasi i se inisitituti po o se falelotu i vaiaso taitasi ina ia maua ni aoaoga faalelotu ma ia auai i talanoaga e taitaia e tagata o le vasega i anomea o kosi i luga o le initoneti. O loo taitaiina le polokalama o le Pathway e ni taitai perisitua i le lotoifale ma ua vaavaaia e ni faifeautalai o auaunaga a le Ekalesia o e o faiaoga ma lagolagoina ia tagata o le vasega. O le faamoemoega tafatolu a le Pathway o le (1) ia aveina atu le talalelei i totonu o loto o tagata o le vasega, (2) fesoasoani i tagata o le vasega ia avea ma e e mafai ona aoaoina, ma le (3) saunia tagata o le vasega ia taitai ma tausia aiga.

Ua faagaoioia nei le Pathway i le pe tusa ma le 500 nofoaga i le lalolagi ma ua auauna atu i le silia ma le 57,000 tagata aooga, ua tatalaina faitotoa mo avanoa, faateleina le faamoemoe ma le faatuatua i le Faaola, ma ua faalolotoina le aoaoina mo le faitau afe o outou. O le faamaeaina o le polokalama o le Pathway ua mafai ai e le toatele o tagata aooga ona lesitala i avanoa mo aoga maualuluga atu, e aofia ai polokalama mo tusi faamaonia ma tikeri o ofoina atu i le Initoneti e ala i le BYU–Idaho po o faalapotopotoga faaleaoaoga i le lotoifale.

O le tuputupu ae ma le tulaga manuia o le polokalama o le Pathway ua musuia ai le faatuina o se faalapotopotoga fou, ua fesootai ma faalapotopotoga uma a le OAE, e ta’ua o le BYU–Pathway i le Lalolagi Atoa (BYU–PW). O le BYU–PW e vaaia le Pathway ma faamaopoopo isi polokalama a le OAE o tusi faamaonia ma tikeri i luga o le initoneti mo aoga maualuluga. E auauna atu le faalapotopotoga i tagata o le vasega e ala i kosi i luga o le initoneti ma faatautaia ni gaoioiga i faapotopotoga i ni nofoaga o le Pathway i le lalolagi atoa, e aofia ai talanoaga e taitaia e tagata o le vasega ma mafutaga faaleaoaoga ma auaunaga mo galuega i le lotoifale.

O le BYU–PW o le taunuuga lea o le aiaiga faavae ua faamaonia e le Fono Faatonu o Aoga a le Ekalesia ia Novema 2015: “O le a saili le Ofisa o Aoga a le Ekalesia e tuuina atu ai ni avanoa mo le a’otauina i tagata o le Ekalesia i soo se nofoaga ua faatulagaina ai le Ekalesia.”

O le BYU–Pathway i le Lalolagi Atoa e mafai ona fesoasoani ia te oe ia faaaoga ana polokalama o tusi faamaonia ma tikeri i le initoneti lea o le a tatala maia ni avanoa ua faaleleia mo se galuega. O le tuufaatasia ma aoaoga faalelotu i le inisitituti ma le aoaoina e le Agaga i le ala a le Alii, e mafai ai ona e aoao ma le loloto i soo se nofoaga e te suesue ai. E le gata i fautuaga faaakatemia, o le a e maua ia fautuaga ma le lagolago mai se tagata faigaluega a le OAE ma le Auaunaga o le Ola Tutoatasi e fesoasoani ia te oe e saili ni galuega faamasani faataitai ma galuega tumau po o le tuliloaina o ni avanoa faaleaoaoga i le lotoifale.

E mafai ona e faaaogaina polokalama a le BYU–Pathway i le Lalolagi Atoa, e aofia ai le Pathway, aoaoga o le gagana Peretania, tusi faamaonia, ma tikeri, e ala atu i o outou iunite ma taitai o le Ekalesia i le lotoifale. O nei polokalama o loo maua i le tele o eria i le taimi nei, ma o le a faaauau pea ona faaopoopo e le BYU–PW ni nofoaga fou a le Pathway ma polokalama fou i se auala e fuatiaina ma mausali a o agai atu i luma le Ekalesia i lalo o le taitaiga a le Alii.