O Le A Le Inisitituti?
Aua e te misia ia faigauo, puipuiga faaleagaga, ma le malamalama o le talalelei.
Ina ua uunaia e Elder M. Russell Ballard o le Korama a Aposetolo e Toasefululua le autalavou matutua ina ia avea ma “le tupulaga silisili … i le talafaasolopito o le Ekalesia”, o se tasi o mea sa ia fautuaina i latou e fai o le lesitala lea i se inisitituti o mataupu faalelotu. Sa ia folafola atu e faapea o le faia o lena mea, o le a sili atu ai ona saunia i latou mo se misiona, faaipoipoga e faavavau, ma le olaga o se tagata matua, ma e sili atu ai ona mafai ona maua le musumusuga ma le taitaiga mai le Agaga.1
Ae afai e te le mautinoa lelei po o le a le inisitituti o mataupu faalelotu o le Ekalesia ma le auala e mafai ai ona faamanuiaina ai lou olaga pe a maea le aoga maualuga, o le a ou taumafai e tali ni nai fesili o loo ia te oe.
O ai e Mafai Ona Auai?
O le tele o le autalavou e filifili ia auai i le seminare, ae ona a lea? O nisi o tamaiti aoga e auai atu i se iunivesite a le Ekalesia po o le kolisi, ua tuu i ai kosi o aoaoga faalelotu i totonu o a latou faatulagaga o le aoga. Aisea? Aua o le mauaina o se aafiaga i aoaoga faaleagaga faatasi ai ma se aafiaga faaleaoaoga faaleatamai e taua tele.
Ae faapefea la pe a faapea e te le auai i se aoga a le Ekalesia? O le toatele o le autalavou matutua latou te le iloaina e faapea o se tuufaatasiga o aoaoga faaleatamai ma le faaleagaga o loo maua toetoe lava i soo se mea latou te o i ai. A o e auai i le kolisi, o loo i ai se polokalama o aoaoga faalelotu o le inisitituti e masani lava ona latalata ane, e masani lava i le isi itu auala mai le kolisi po o se fale o le Ekalesia i le lotoifale. E oo lava i nisi kolisi latou te faatagaina vasega o le inisitituti e aoaoina i o latou lava lotoa. E tusa lava pe ua maea le faauuga a le kolisi, e taliaina pea oe ia auai.
E le faapea seiloga e avea oe ma se tamaitiiti aoga i le kolisi. E mafai ona auai autalavou matutua uma, o le vaitausaga 18–30, faaipoipo pe nofofua, i le inisitituti.
Asiasi i le institute.lds.org e sue ai se inisitituti e lata atu ia te oe.
Aisea e Auai Ai?
Na amata le polokalama i le na o le 57 tagata e lata ane i se kolisi i Moscow, Aitaho, ISA, ma ua i ai nei le silia ma le 250,000 tamaiti aoga i le lalolagi atoa. Ua latou vaaia le tele o le malosiaga ma faamanuiaga ua sasaa mai i o latou olaga. I se suesuega talu ai nei, sa fesiligia ai tamaiti aoga o inisitituti i le 10 atunuu eseese po o le a se mea ua faia e Inisitituti mo i latou. Aisea na latou o ai? Na faapefea ona fesoasoani? E faitau afe tali sa ao mai ma faaalia ai ni autu taua se tolu: e fesoasoani le inisitituti i tamaiti aoga e (1) faamalosia la tatou sootaga ma Iesu Keriso, (2) agai ai i luma faaleagaga, ma le (3) ia maua le toafimalie e faia ai faaiuga taua o le olaga.
Mafaufau i filifiliga e te feagai ai: filifilia o se kolisi; filifili pe alu pe leai i se misiona; ma le filifilia o se galuega, uo, ma se toalua. O ni faaiuga tetele nei. Ma e pei ona saunoa mai Peresitene Thomas S. Monson, “O filifiliga e fuafua ai taunuuga.”2 E mautinoa lava o nei faaiuga e tatau ona faia faatasi ai ma le fesoasoani a le Agaga Paia. E mafai ona maua le fesoasoani faalelagi e manaomia a o e fesootai atu i le Agaga, o tusitusiga paia, ma uo o e tutusa o outou tulaga faatauaina e ala mai i se vasega faalelotu i le inisitituti po o se aoga a le Ekalesia
O Laura o se tasi o tamaitiiti aoga na faamanuiaina mai le inisitituti. Ina ua ia amata ona auai i se iunivesite i Ontario, Kanata, sa ia lagonaina ua leiloa ma sa lagonaina faapea o lana molimau e le o toe malosi e pei ona sa i ai muamua. Sa amata ona alu i le inisitituti ma na toe “lagonaina lona taua” ma “iloa ai po o ai o ia.” (Tagai i lana tala ma tala a isi talavou matutua i le InstituteIsForMe.lds.org.)
Pe a e iloa moni po o ai oe—o se atalii po o se afafine o se Tama Faalelagi alofa o le e finagalo e avea oe ma se tagata maoae—e mafai ona e faia ni faaiuga taua e taitai atu ai i le fiafia ma le manuia.
A o e ola i mea na e aoaoina i le seminare ma isi aafiaga faale Ekalesia, o le auai i le inisitituti o le a faamalosia ai la oulua sootaga ma Iesu Keriso i se vaitaimi e sili ona taua o le olaga ma fesoasoani ia te oe e faaauau ai pea lou alualu i luma faaleagaga.
E alofa le Tama Faalelagi ia te oe. O le a Ia saunia le auala mo oe e faaauau ai ona avea faapei o Ia. O le inisitituti o se tasi o na auala e faia ai se eseesega i le faitau selau o afe o olaga i tausaga taitasi.