O Le Inisitituti E mo i Tatou
E mafai faapefea ona faamanuiaina e le inisitituti o mataupu faalelotu a le Ekalesia lou olaga?
E tele naua mea e ao ona tatou faia. O nisi o i tatou o ni tagata aooga. O nisi o loo galulue i ni itula se tele. O nisi o i tatou ua nonofo ese mai aiga ma uo, pe ua i ai tiutetauave ua mamafatu i o tatou luga. O nisi o i tatou o loo taumafai e faamasani ina ua foi mai i se misiona, pe faatoa uma ona faauu mai le aoga maualuga ma ua le mautinoa po o le a le mea e sosoo ai.
E mafai ona foliga mai e feteenai le faaopoopo atu o le inisitituti i luga o mea uma lava. O le toatele o i tatou na mafaufau i se tasi taimi po o se isi, pe o le a fesoasoani moni le inisitituti ia te a’u?
O le tali o le ioe.
Sa maua e le faitau afe o autalavou matutua i le salafa o le lalolagi, o le toatele o i latou i tulaga e pei o outou, le malosi, lagolago, faauoga, ma le faatamaoaigaina faaleagaga i le inisitituti. O ni faataitaiga ofoofogia nei se lua o ni talavou matutua o e, e ui lava i a la luitau uma, na iloaina o le inisitituti e mo i laua.
O le Inisitituti e Lelei Mo le Fatu
O le Tala a Aric, i Toronto, Ontario
O Aric (i le itu taumatau pito i luga) o se tamaitiiti aoga faafomai PhD i le Iunivesite o Toronto, sa galue i vaega o le fatu ma vailaau mo le toefaatupulaia o vaega ua le lelei.
I le faamatalaina o lana suesuega, na ia faamatala mai ai, “O nisi ituaiga o sela autu e mafai ona liua i soo se mea lava i lou tino. E mafai ona tatou tuu ni sela autu i se ipu suesue ma faatupuina ae i latou o se sela o le fatu. A mavae ni vaiaso se lua, o le a amata ona tata i latou lava. Ona matou faaaogaina lea o nei sela o ni faataitaiga o faamai eseese ma faataitai i ai ni vailaau eseese. O lau sini e faapea o le a i ai se aso e faatupu ae ai se fatu i se faatulagaga o le falesuesue faapenei.”
Na i ai ia Aric sona lava suiga o le loto i le taimi o lana misiona i Belo Horizonte, Pasila. “A o ou auauna atu i se misiona, sa ou aoaoina le auala e faalogo ma mulimuli ai i le Agaga. Na fesoasoani ou te aoao ai le auala e suesue ai, ia aoao ai le auala e faaaoga ai ia te au lava ia.” Sa matuai suia lava o ia ma sa popole ai e uiga i le sau i le fale. “Ou te lei iloa moni le ala e amio ai ma po o a mea e fai,” sa ia tauina mai. “Sa tatau ona ou toe aoaoina le ala e amio ai i ni tulaga faapitoa. O le alu i le inisitituti na fesoasoani ia te au.”
E taua ia Aric le upegatafailagi faaagafesootai i le inisitituti. “Na mafai ona ou faauo atu i tagata o loo manaomia ni uo. Na mafai ona ou faamafanafanaina tagata pe a latou manaomia le faamafanafanaga. E taua lena mea ia te au, e fesoasoani i isi tagata, ae e taua foi ia te au le lagona o lena mea mai isi foi tagata.”
E tausua o ia e uiga i le umi ona ia alu i le inisitituti, ae o loo alu pea. “O taimi uma lava ou te alu ai, ou te lagonaina le Agaga o loo i ai iina. Ma e fesoasoani ia te au e avea ai ma se tagata e sili atu ona lelei, ia tumau ai i nofoaga lelei, ma manuia ai i lau galuega.”
Na aumaia e Aric se faatusatusaga i le va o lana galuega ma le inisitituti. “Afai tatou te tuu se sela i se siosiomaga lelei, e i ai suiga i totonu e tutupu i le sela e mafai ai ona sili atu ona ia taliaina na suiga lelei po o na faailoilo lelei tatou te mananao e tuuina atu i ai. I le aluga o taimi, e suia le sela—e suia i se mea e sili atu, i se mea e tele atu nai lo ia lava. Mo au, o se mea lena e matuai taua tele lava. Afai ou te tuua au lava i totonu o le siosiomaga sao, ona sili atu lea o lou taliaina o nei vaega faaleagaga o le olaga ae itiiti le taliaina o faatosinaga le lelei e tutupu i le lalolagi.”
Sa ia faaiuina, “e moni le Atua. O se mea lena ou te lagonaina i totonu i le loloto o lou lava loto. Ou te lei lagonaina muamua i taimi uma Lona alofa i lou olaga. Ua amata ona ou iloaina lena mea ona o filifiliga na ou faia. Ua ou iloa o loo i ai o Ia iina e fesoasoani mai ia te au, ma e finagalo moni lava o Ia ia te au ia avea ma tagata e sili ona lelei.”
E Fesoasoani le Inisitituti ia te A’u ia Manatua Keriso
O le Tala a Veronica, Madrid, Sepania
Ina ua 17 tausaga o Veronica (ata i lalo ifo), sa maliu lona uso masaga i ona lima. E tolu tausaga talu ona mavae le maliu o lona uso, i le tuua toatasi nao ia ma le tauivi ai i le olaga, sa amata ona alu Veronica mo ni savaliga ina ia fesoasoani i ona lagona o le faanoanoa. Sa ia talitonu i taimi uma lava i le Atua, o lea i se tasi aso a o ia savali, sa ia tatalo, “Le Alii e, aisea ua e faia ai nei mea uma ia te au?”
O le taimi lena, sa ia tepa ae ai i luga i se fale o le Ekalesia o le AAG sa ia ui atu ai i taimi uma lava. I le faatoa vaai moni lava lea i ai mo le uluai taimi, sa amata ona ia fiailoa; sa alu o ia i totonu ma faailoa atu o ia lava i ni tamaitai faifeautalai se toalua, o e sa aoaoina o ia i se taimi mulimuli ane i lena vaiaso.
Fai mai Veronica ina ua uma le lesona muamua, “Sa ou tu ae i luga ma fai atu ia i laua, ‘Lua te valea uma lava’, ma sa ou tuua i laua.” Sa lei manao o ia i soo se tasi o na mea, ae na iu ina amata ona ia toe mafaufau.
“Ou te manatu o le taimi muamua lea sa ou matuai tatalo ai. Sa ou lagonaina le pei na tau mai e le Atua ia te au, ‘ua ou auina atu lenei avanoa ia te oe ina ia e mafai ai ona iloa atili au. Pe e te le manao i ai?’”
Sa tonu ia te ia na ia manao i ai. E ui lava i le aveesea o lona aiga ma lana galuega ona o le talalelei, sa papatisoina o ia. E ui lava ina sa faaauau pea le faigata o lona olaga i nisi o taimi, sa ia faalagolago i le Alii. “Ae ou te lei iloa e uiga i le Ekalesia, sa ou tagi pe ita pe afai ou te le iloa pe faapefea ona ou totogiina lou fale mautotogi. Ae o lenei ua ou iloa o le a fesoasoani le Alii.”
O le faamanuiaga faapeteriaka a Veronica na tau atu ai o le a ia auauna atu i se misiona, ae sa leai ni ona sakete po o soo se auala lava e faatau ai. Na ui atu i le eria se tasi o le au Fitugafulu ma lona faletua ma faalogo e uiga i lona manaoga; na musuia le faletua e teuina ni sakete faaopoopo mo le malaga, ma na ia tuuina atu le tele o na sakete ia Veronica. Sa ia uunaia foi Veronica e auai i le inisitituti. Ina ua amata e le epikopo a Veronica se polokalama o le inisitituti mo lo latou eria, sa amata ona ia auai soo atu i ai.
Na tuuina atu e le inisitituti ia te ia le filemu ma le fiafia. “Ou te manatu o le mea e sili ona ou fiafia i ai i le inisitituti aua i le aluga o le vaiaso, e tele naua a tatou galuega e fai. Ua i ai a tatou Aso Sa e faafou ai a tatou feagaiga ma le Tama Faalelagi. Ae o le Aso Gafua, Aso lua, Aso Lulu, Aso Tofi, Aso Faraile, o le a sa tatou mea e fai? Ou te faafetai ua i ai le inisitituti e le itiiti ifo ma le faatasi i le vaiaso atoa aua o se auala e manatua ai Iesu Keriso. O le inisitituti o se tasi lea o auala e fesoasoani mai ai o Ia ia te au ia alualu ai i luma.”
Ma na auauna atu Veronica i se misiona. Ia Oketopa 2016, sa ia tuua ai e auauna atu i le Misiona a Chile Osorno.
Fai mai o ia, “Ou te iloa ua ou i ai iinei i le taimi nei ona o Ia. Ou te iloa ua Ia saunia se fuafuaga atoatoa mo i tatou taitoatasi. O le a Ia tuuina mai ia i tatou ni avanoa i o tatou olaga atoa. E mafai ona ou lagonaina Lona alofa i aso uma, e ui lava o nisi taimi ou te fai atu, ‘Tama, aisea ua tupu ai lenei mea ia te au?’ Ae ou te lei alu e moe, Na te tali mai, ‘Ua tupu lenei mea ona o lenei mea. Alu loa e moe.’ Ma ou te alofa foi ia te Ia. Atonu sa tatau ona ou oo i mea uma lava sa ou oo i ai ina ia ou lagona ai le alofa tele mo Ia.”