O Uati

Ata

boy with a clock

Ina ua pe a ma le lua tausaga le matua o la’u tama, o Iosua, sa ia atiaeina se fiafia tele i uati. A matou ui ane i se uati i le fale, sa ia manao e taofi ma vaai i ai. E faapitoa lava lona fiafia e tuu lona taliga latalata atu i le uati ma faalogologo i le tata mai o lona leo. Sa ia oo i se tulaga lea ua le mafai ai ona matou ui ane i se uati e aunoa ma le tu atu e faalogologo i lona tata mai.

Sa ou iloaina nisi o mea mataina mai lena gaoioiga faigofie. Muamua, e tata lava le uati i taimi uma, e le seiloga o taimi matou te gauai atu i ai. Lona lua, e ui lava ina sa matou iloaina o le uati na faia se leo, sa tatau ona matou faalatalata atu i ai ma ia matua filemu lava ma aua le minoi ina ia mafai ona faalogoina le tata filemu.

O le Agaga Paia e tai pei lava o uati ia sa matua faagaeetia ai la’u tama tama. O nisi o i tatou ua papatisoina ma mauaina le meaalofa o le Agaga Paia e mafai ona mauaina Lana mafutaga faifaipea pe afai tatou te ola agavaa mo ia. E i ai pea le Agaga Paia faatasi ma i tatou, ae o nisi taimi tatou te faatagaina ai le pisapisao o le lalolagi e taomia ai ia musumusuga filemu Na te tuuina mai ia i tatou. E pei lava ona tatau ai ona ma saō ma filemu ma la’u tama ina ia faalogologo i le tata lemu o le uati, e tatau ia i tatou taitoatasi ona fifilemu ia mafai ai ona faalogo, pe lagona, le uunaiga filemu e tuuina mai e le Agaga.

Na saunoa mai Peresitene Boyd K. Packer (1924–2015), Peresitene o le Korama a Aposetolo e Toasefululua, faapea: “O le leo o le Agaga o loo faamatalaina i le mau, e le o se ‘leo saua’ pe ‘leotele.’ E ‘le o se leo o le faititili, po o … [se] leo o le pisapisao tele.’ Ae, ‘o se siufofoga filemu o le toafimalie atoatoa, sa peiseai o se musumusu,’ ma na ia mafai ona ‘ma sa ati e oo atu i totonu lava o le agaga’ ma ‘sa mu ai [le loto]’ (3 Nifae 11:3; Helamana 5:30; MF&F 85:6–7). …

“E le mafai ona maua e le Agaga,” Na aoao mai ai Peresitene Packer, “lo tatou gauai atu i le feei po o le luluina o i tatou i se lima mamafa. Ae e musumusu mai. E pa’i mai ma le malū, ioe, afai o pisi i tatou, o le a lē mafai lava ona tatou lagonaina. …

“E masani lava o le a ia faamamafa mai tau lava ina ia mafai ai ona tatou faalogo atu. Ae o le tele lava o taimi, afai tatou te le faalogo i le lagona malu, o le a aluese le Agaga ma faatali sei tatou o mai e saili ma faalogo” (“O Le Lamepa a le Alii,” Liahona, Tes. 1988, 33).

O lenei, soo se taimi lava ou te faalogo ai i le tata malu mai o se uati, e le mafai ona ou tatalia ae manatua le lesona faigofie sa aoaoina ai a’u e la’u tama tama e uiga i le fifilemu e faalogo ai i uunaiga filemu a le Agaga.