O Vavega e Tele a Cristina

Ua molimauina e lo matou aiga le tele o vavega ona o lou tuafafine, o Cristina. Sa fanau mai o ia ma se faaletonu matuia o le fatu. Ina ua siakiina o ia e le fomai, sa latou tau atu i ou matua atonu o le a le faasaoina o ia. Ae peitai, sa siina e ou matua, le la pepe vaivai i o la lima ma tuu atu lo la faatuatuaga i le Alii. O le faasaoina mai o le ola o Cristina sa avea ma se vavega.

Na mavae atu tausaga, ma na avea Cristina ma se tamaitai malosi, atamai, taalo fiafia, ma aulelei. Ina ua 12 ona tausaga, sa ia manaomia se taotoga e tuu ai se faasolototo palasitika i lona fatu. Sa matou popole pe faasaoina mai o ia mai le taotoga, ae i le malosi tele ma le lototele, sa ia faatofa mai ia i matou ma ulufale atu i le potu tipitipi.

Na faasaoina Cristina mai le taotoga ma na toe foi mai i le fale ia i matou. Sa faaalia pea e ia le fiafia ma faafetai i le Tama Faalelagi ina ua ola ma maua le avanoa e aoao ai ma tuputupu ae. E lei mafai ona vaai faalemafaufau uo faapea sa i ai se faaletonu i lona fatu, aua sa matua malosi lava o ia.

Ina ua toe manuia mai se mai o le pe atoa o le tino ina ua 16 ona tausaga, sa talosagaina ai Cristina ina ia fesoasoani e aoao le seminare. Sa ia uunaia le toatele o tamaiti aoga a o latou taulotoina ia mau, ma aoao mai le Tusi a Mamona. Sa taina foi e Cristina le piano ma e fiafia e pese. Na te lei tau faatali lava ina ua valaaulia o ia e taitaia se aufaipese o tagata e 60 mo se konafesi a le uarota.

Ina ua 22 ona tausaga, na faaipoipo ai Cristina i se alii talavou i le malumalu mo le faavavau. E lei leva ona faaipoipo, ae valaauina o ia e avea ma peresitene o Tamaitai Talavou i lana uarota.

Ina ua 26 ona tausaga na vave lava ona faiifo le malosi o Cristina. Sa alu atu o ia i Sao Paulo mo ni suesuega. O iina sa ia iloa ai sa ia manaomia se isi taotoga. I le taimi o le taotoga, na oso ai le fatu o Cristina lea na mafua ai ona faaleagaina le faiai. Na mavae atu masina, ma sa lei faasolo manuia o ia. I le avea ai o se aiga sa matou faapotopoto faatasi e anapopogi ma tatalo mo lona toe manuia, ae sa lei faasolo manuia o ia. Sa matou filifili e toe anapopogi, o le taimi lea e ole atu mo se fesoasoani e talia le finagalo o lo tatou Tama i le Lagi. O le aso na sosoo ai na maliu ai Cristina.

E le o le mea lea na matou faamoemoe i ai, ae na matou iloaina o lenei mea o se vavega foi. E le o toe mafatia Cristina. Ua aumaia e le talalelei le olioli ma le filemu ia i matou, e oo lava i taimi o le loloto o le faanoanoa. Aua ua uma ona faamauina i matou, ua matou iloa e mafai ona matou toe faatasi ma Cristina.