Savali a Faiaoga Asiasi
Ola i se Olaga Faapaiaina
Ia suesue ma le agaga tatalo lenei savali ma saili mo uunaiga ia iloa ai mea e faasoa atu. E faapefea e le malamalama i le faamoemoega o le Aualofa ona saunia afafine o le Atua mo faamanuiaga o le ola e faavavau?
“Ina ia faapaiaina o le vaetofia lea po o le tuuto atu o se mea e paia, ma tuu atoa atu i faamoemoega paia,” o le saunoaga lea a Elder D. Todd Christofferson o le Korama a Aposetolo e Toasefululua. “O le manuia moni i lenei olaga e maua mai i le faapaiaina o o tatou olaga—o lona uiga, o o tatou taimi ma filifiliga—i faamoemoega o le Atua.”1
Na saunoa mai Elder Neal A. Maxwell (1926–2004) o le Korama a Aposetolo e Toasefululua, “E matele lava ina tatou mafaufau o le faapaiaina o le faamatuuina atu lea o a tatou meatotino, pe a faatonuina ai mai le lagi. Ae o le faapaiaina moni lava ia, o le faamatuuina atu lea o oe lava i le Atua.”2
A o tatou faapaiaina i tatou lava i faamoemoega o le Atua, o le a faateleina lo tatou faatuatua ia Iesu Keriso ma Lana Togiola. A o tatou ola i se olaga faapaiaina, e mafai ona avea i tatou ma tagata paia e ala i na galuega.
Na saunoa mai Carole M. Stephens, le Fesoasoani Muamua sa i ai muamua a le Au Peresitene o le Aualofa: “Na aoao mai Elder Robert D. Hales, ‘Pe a tatou osia ma tausi feagaiga, tatou te o mai i fafo o le lalolagi ma i totonu o le malo o le Atua.’
“Ua suia i tatou. Ua ese o tatou foliga ma a tatou taga. Ua ese mea tatou te faalogologo i ai ma faitau i ai ma tautala i ai, ua ese foi mea tatou te ofuina aua ua avea i tatou ma afafine o le Atua, ua noatia ia te Ia e ala i se feagaiga.”3
O le faapaiaga o le feagaiga lea na osia e le Atua “ma le aiga o Isaraelu; Pe a mavae ia aso, o loo fetalai mai ai Ieova, ou te tuuina lau tulafono i totonu ia te i latou, ma ou tusi ai i o latou loto; e fai foi au mo latou Atua, o i latou foi e fai mo’u nuu” (Ieremia 31:33). O le ola i se olaga faapaiaina e ogatusa lea ma le fuafuaga a le Atua mo i tatou.
Mau Faaopoopo
Faatuatua Aiga Toomaga