O Le Tulaga Faatonuina Paia o le Faamaoni
Saunia e Elder Neil L. Andersen
O Le Korama a Aposetolo e Toasefululua
Mai se saunoaga i le faigalotu, “Honesty—The Heart of Spirituality,” na tuuina atu i le Brigham Young University ia Setema 13, 2011. Mo le saunoaga atoa i le gagana Peretania, alu i le speeches.byu.edu.
Mo se soo o Keriso, o le faamaoni o se tasi o mataupu faavae autu o le faaleagaga.
Ata na tusia e Simone Shin
O le Atua lo tatou Tama ma Lona Alo, o Iesu Keriso, o ni tagata e sao, atoatoa, ma faamaoni a’ia’i ma le moni. O i tatou o atalii ma afafine o le Atua. O lo tatou taunuuga o le avea faapei o Ia. Tatou te saili ia faamaoni ma sao atoatoa e pei o lo tatou Tama ma Lona Alo. O le faamaoni ua faamatalaina ai le uiga o le Atua (tagai i le Isaia 65:16), ma o le mea lea, o le faamaoni o loo i le totonugalemu o lo tatou tuputupu ae faaleagaga ma meaalofa faaleagaga.
Na folafola mai e Iesu, “O a’u nei le ala, ma le upu moni, ma le ola” (Ioane 14:6; tagai foi i le Ioane 18:37; MF&F 84:45; 93:36).
Sa fesili atu le Alii i le uso o Iareto, “E te talitonu ea i upu o le a ou tautala atu ai?”
Sa tali atu le uso o Iareto, “Ioe, le Alii e, ua ou iloa e te fetalai i le upumoni, ona o oe o se Atua o le upumoni, ma e le mafai ona pepelo” (Eteru 3:11, 12).
Ma o fetalaiga lava nei a le Faaola: “O Aʼu o le Agaga o le upumoni” (MF&F 93:26; tagai foi i le fuaiupu 24). “O le upu moni lava ou te fai atu ai ia te outou” (Ioane 16:7; tagai foi i le fuaiupu e 13).
I se isi itu, ua faamatalaina Satani o le tama o pepelo: “Ma sa avea o ia ma Satani, ioe, o le tiapolo lava lea, o le tamā o pepelo uma, e faasese ma faatauaso tagata, ma taitai faatagataotaua i latou i lona loto, le toatele lava lea o i latou o e e lē faalogo mai i lo’u leo” (Mose 4:4).
Na fetalai Iesu, “O le tiapolo … e le’i tumau lava ia i le upu moni, aua e le o i totonu lava ia te ia le upu moni. A tautala o ia i le tala pepelo, o lana lava lea e tautala ai: aua o le pepelo ia” (Ioane 8:44; tagai foi i le MF&F 93:39).
Sa aoaiina soo e le Faaola i latou o e folafola atu faalauaitele se tasi mea, ae ese le mea e ola ai i o latou loto (tagai i le Mataio 23:27). Sa Ia viia i latou o e ola e aunoa ma le taufaasese (tagai i le MF&F 124:15). Pe o mafai ona outou iloa le tele o le eseesega? I le isi itu o loo i ai le pepelo, taufaasese, faaoleole, ma le pogisa. I le isi itu, o loo i ai le mea moni, malamalama, faamaoni, ma le amio sao. Ua faamanino lelei mai e le Alii le eseesega.
Na saunoa mai Peresitene Thomas S. Monson:
“I se tasi taimi na tele lava ona tutusa tulaga faatonuina o le Ekalesia ma tulaga faatonuina o malo, o lea ua i ai se vā tēle i lo tatou va, ma o loo faatupulaia pea lena va. …
“Na faamatala e le Faaola o tagata o Ia lava sa i ai i le lalolagi ae lē o se tasi o le lalolagi [tagai i le Ioane 17:14; MF&F 49:5]. E mafai foi ona tatou i ai i le lalolagi ae le o ni o le lalolagi pe a tatou teenaina manatu faavae sese ma aoaoga sese ma tumau ma le faamaoni i mea ua poloaiina ai i tatou e le Atua.”1
O le a tau mai e le lalolagi ia i tatou o le sao ma le faamaoni e faigata ona faamatalaina. E malie i le lalolagi le pepelo faaataata ma vave ona alofaga i mea ua taua o taufaasese “mama”. O le eseesega i le va o le sao ma le sese ua faanenefuina, ma o taunuuga o le le faamaoni ua faaitiitia.
Ina ia maua e le aunoa le Agaga o le Upumoni—le Agaga Paia—e tatau ona faatumulia o tatou olaga i le upumoni ma le faamaoni. A o tatou faamaoni atoatoa, e matala o tatou mata faaleagaga i le malamalama faateleina.
E mafai ona faigofie ona e malamalama i le auala e siitia ai e lenei malosiaga faaleagaga lou aoaoina i le potuaoga. Ae mata e mafai foi ona e vaaia le auala e faatatau ai lenei mataupu faavae i filifiliga taua i le ala e faaalu ai lou taimi, po o ai o loo faaalu ai lou taimi, ma le auala e te mamanuina ai lou olaga?
Tuuto Atu I le Faamaoni Patino
E le mafai ona e tuueseesea le faaeega paia faaleagaga o le upumoni e te manaomia ma moomia mai lou avea ai ma se tagata o le faamaoni ma le sao. E fesootai le upumoni e te sailia ma le ituaiga tagata ua e i ai. O le malamalama, tali faaleagaga, ma le taitaiga faalelagi e le masuia le fesootai atu i lou lava faamaoni ma le sa’o. O le tele o lou lotomalie tumau i le olaga o le a oo mai pe a faaauau pea ona e siitia lau tautinoga i le faamaoni patino.
Na faasoa mai e Roy D. Atkin le tala lenei:
“Ina ua faamaamulu se vaega o tamaiti aoga ina ua uma [lou] tausaga muamua, sa faapea ona atili tele ai le tauvaga i au vasega i le aoga fomai nifo. Sa galulue malosi tagata uma ina ia i ai i le pito i luga o le vasega. A o faateleina le tauvaga, sa tonu i nisi o tamaiti aoga, o le auala e faamanuiaina ai, o le kopi lea. O lenei mea sa ou popole tele ai. …
“… Sa ou iloaina e le mafai ona ou kopi. Sa sili atu ona ou manao ia sao ma le Atua nai lo lou manao e avea ma se fomai nifo.
“[I] lou tausaga tolu, sa ofoina mai ai ia te au se kopi o se suega na loma i se vasega taua tele. E mautinoa lava, o le uiga o lena mea, o le a maua muamua e nisi o tagata o lau vasega ia fesili o le suega. Sa ou teenaina le ofo. Ina ua toe faafoi mai pepa suega ua uma ona makaina, sa matuai maualuga lava le averesi o togi a le vasega, na faapea ona maualalo ai ou togi pe a faatusatusa i ai. Na talosaga mai le polofesa e fia talanoa ia te a’u.
“’Roy,’ na ia fai mai ai, ‘e masani lava ona lelei au suega. O le a le mea na tupu?’
“‘Lau Susuga,’ sa ou fai atu ai i lau polofesa, ‘i le isi suega e sosoo ai, afai e te tuuina mai se suega e te lei aumaia muamua, ou te talitonu o le a e iloa ai e lelei tele lau taumafaiga.’ Sa leai se tali mai.
“Sa toe fai se isi a matou suega i lena lava vasega e tasi. A o tufa mai le suega, sa faapea ona faalogoina le oi. O se suega sa lei faia muamua lava e le faiaoga. Ina ua toe faafoi mai a matou suega na makaina, sa faapea ona ou mauaina se tasi o togi aupito maualuga i le vasega. Mai i lena lava taimi, o suega uma lava sa fou.”2
Ona o i tatou o soo o Keriso, o lea e tuputupu ae ai le tulaga faatonuina paia o le faamaoni i totonu o i tatou. I le Tusi a Mamona, o le apoapoaiga a le Tupu o Peniamina ia “[tuu] ese le tagata natura” (Mosaea 3:19) o se vaega, o se valaau mo se faateleina o le maualuga o le lagona o le faamaoni ma le sao.
I tagata o Efeso, na fautua atu ai le Aposetolo o Paulo, “To ese … le tagata tuai, o loo ua leaga … a ia toe fuataiina manao o outou loto.” Ona tuuina atu lea e Paulo se fautuaga faapitoa i le avea ma se “alii fou” po o se “tamaitai fou”: o le mea muamua lava sa ia tau atu ia te i latou e fai o le, “[tuu] ese le pepelo, ia tautalatala faamaoni taitasi” (tagai i le Efeso 4:22–25; tagai foi i le Kolose 3:9; 3 Nifae 30:2).
Ou te fiafia lava i le uiga lenei o le faamaoni: “O le faamaoni o le, ia moni, sa’o ma tonu atoatoa.” Ma le isi foi, o le amio sao o le “[i ai] o le lototele i mea lelei e fai ai [au] amioga ia ogatasi ma [lou] malamalama i le sao ma le sese.”3
Sa faamatala i se tasi taimi e Peresitene James E. Faust (1920–2007), le Fesoasoani Lua i le Au Peresitene Sili, e uiga i le talosaga mo le Officer’s Candidate School i le Fitafita a le Iunaite Setete. Sa Ia saunoa mai:
“Sa feau mai au i luma o le pulega e iloiloina talosaga. Sa itiiti ou tusi faamaonia, ae sa lua ou tausaga i le kolisi ma faamaeaina se misiona mo le Ekalesia i Amerika i Saute.
“O fesili na fesiligia ai au e le puleaga e iloiloina talosaga sa ese lava se mea na faasaga i ai. Na toetoe lava o i latou uma sa taulai mai i ou talitonuga. ‘E te ulaula?’ ‘E te inu ava malosi?’ ‘O a ni ou manatu e uiga i isi o e ulaula ma inu ava malosi?’ Sa leai se faigata o lou taliina o nei fesili.
“‘E te tatalo?’ ‘E te talitonu e tatau ona tatalo se fitafita?’ O le taitai na faia mai nei fesili sa o se fitafita agamalo i lana matata o le fitafita. Sa lei foliga mai na tatalo soo o ia. … Sa ou manao lava ia avea au ma se taitai. …
“Sa ou filifili e aua nei ou masalosalo [i au tali]. Sa ou tautino atu sa ou tatalo ma sa ou lagona e mafai e taitai ona saili le taitaiga faalelagi e pei ona sa faia e nisi o komesina maoae moni. …
“Na oo mai nisi fesili na ese lava. ‘I taimi o taua, pe le tatau ea ona faamama teisi tulafono o amioga lelei? Pe le tauamiotonuina ia alii ona o le faigata o le taua, i le faia o mea latou te le faia pe a i ai i le aiga i lalo o tulaga e masani ai?’
“… Sa ou masalosalo o alii sa tuuina mai ia te au lenei fesili, sa lei ola i tulaga faatonuina ia na aoaoina ai au. Sa oso mai le manatu i lou mafaufau e faapea, atonu e mafai ona ou fai atu na i ai lava ou talitonuga, ae sa ou le manao e faamamafa atu ia mea i isi. Ae na foliga mai sa feemo mai i lou mafaufau foliga o le toatele o i latou o e na ou aoaoina i le tulafono o le legavia ao avea [au] o se faifeautalai. I le faaiuga sa na ona ou faapea atu, ‘Ou te le talitonu o loo i ai ni tulafono se lua o le tulaga faatonuina o le amio mama.’
“Sa ou tuua le faatalanoaga ma taliaina le mea moni e faapea, e mautinoa lava o le a maualalo ou togi … e tuuina mai e nei taitai agamalo. I ni nai aso mulimuli ane ina ua faasalalauina ia togi, sa matuai ou tei lava ona na ou pasi. Sa ou i ai i le vaega muamua na talia mo le Officer’s Candidate School!”
Ma i le silafia ai e Peresitene Faust, o le auala e mafai ai e faaiuga laiti ona i ai ni taunuuga tetele, sa ia saunoa ai, “O se tasi lenei o taimi aupito taua o faiga faaiuga o lou olaga.”4
O le faamaoni, amio sa’o, ma le sa’o, o mataupu faavae faavavau ia e mamanuina tele lo tatou aafiaga i le olaga nei ma fesoasoani e iloa ai lo tatou taunuuga e faavavau. Mo se soo o Keriso, o le faamaoni e i le totonugalemu o le faaleagaga.
Faamamalu i Au Upu
O le faamaoni e afifi ai itu uma o lou olaga i aso taitasi, ae sei ou faatatau atu i ni nai faataitaiga patino. I aso o o’u aoga, ou te manatua lava le peresitene sa i ai o le Iunivesite o Polika Iaga o Dallin H. Oaks, lea ua avea nei o se tasi o le Korama a Aposetolo e Toasefululua, na faasoaina mai le upusii lenei mai ia Karl G. Maeser: “Au uo talavou e, na fesiligia a’u po o le a lau faauigaga o le upu faamamaluina. O le a ou tau atu ia te outou. Tuu au i tua atu o papuipui o le falepuipui—o papuipui maa e sili ona maualuluga, e sili ona mafiafia, e sili le loloto i lalo i le palapala—e i ai lava le avanoa i se auala po o le a lava, e mafai ai ona ou sola ese. Ae faatu au i luga o lena fola ma tusi se laina faataamilo i le mea ou te tu ai i se sioka, ma ia tuu mai ia te au e tuu atu lau upu faamamaluina e aua lava le sopoia lena laina. Pe mafai ona ou alu i fafo o lena lio? E leai lava! Seiiloga ou te oti muamua!”5
E i ai taimi tatou te faamamaluina ai tautinoga ona sa tatou ioe e faamamalu i ai. O le a i ai ni tulaga i lou olaga o le a faaosoosoina ai oe e lafoai se maliega na e faia. O le a e faia muamua le maliega ona o se mea e te manao e toe maua mai ai. Mulimuli ane, ona o se suiga i tulaga, o le a e le toe manao ai e faamamalu i tuutuuga o le maliega. Ia aoao nei faapea e te tuuina atu loa lau upu, pe a e faia se folafolaga, pe a e sainia lou igoa, o lou faamaoni ma lau amio sao patino, ua noatia ai oe i lau upu, lau tautinoga, ma lau maliega.
Tatou te faafetai tele ona tou te “talitonu i le faamaoni” (Mataupu Faavae o le Faatuatua 1:13), tou te tau atu le mea sao, o le a outou le kopi i se suega, o le a le kopiina se pepa a se isi tagata ma faapea o oe e ana le pepa, po o le taufaasese o le tasi ma le isi. Ua fetalai mai le Alii ia i tatou:
“Ma o le upumoni o le iloa lea o mea e pei ona i ai, ma e pei ona sa i ai, ma e pei ona o le a oo mai;
“Ma o soo se mea e tele atu pe itiiti mai i lo lea, o le agaga lea o lena amioleaga e toatasi, o lē o se pepelo mai le amataga” (MF&F 93:24–25).
O o tatou luitau e masani ona oo mai i le “tele atu pe itiiti”—i faaosoosoga laiti i le faatausiusiuga o le faamaoni atoatoa. I le avea ai ma se tagata aoga tausaga muamua i le kolisi, sa ou tuuina ai se faamatalaga i luga o la’u kesi, lea sa masani ona siiina mai e [a o Peresitene] Peresitene David O. McKay (1873–1970). E faitauina faapenei: “O le taua silisili o le olaga e tauina i totonu o nofoaga filemu o le agaga.”6
O le a sou manatu, o a ni lagona o le Alii pe a tatou faia ni faaiuga faigata o le faamaoni? O loo i ai se mana faaleagaga maoae i le tumau moni ma faamaoni pe a foliga mai e faalemanuia taunuuga o lou faamaoni. O le a feagai outou uma taitoatasi ma faaiuga faapena. O nei taimi taua o le a sueina ai lou amiosao. A o e filifilia le faamaoni ma le mea sao—e tusa lava pe faamalieina oe pe leai i le mea na e faamoemoe i ai—o le a e iloa ai o nei taimi taua o faiga faaiuga e avea ma ni elemene autu o le malosiaga i lou tuputupu ae faaleagaga.
“Ia Amiotonu i le Pogisa”
Na saunoa Peresitene Polika Iaga (1801–77) i se tasi taimi e faapea, “E tatau ona tatou aoao ia amiotonu i le pogisa.”7 O se tasi o faauigaga o lenei fuaitau o le, e tatau ona tatou aoao ia faamaoni pe afai o le a leai se tasi e iloa pe na tatou le faamaoni. Ou te luiina outou ia “amiotonu i le pogisa.” Filifili le ala o le a filifilia e le Faaola lava Ia.
Na tusia e le tusisolo o Edgar A. Guest:
Ou te le manao e teu i luga o le fata o se kapoti
Ni mealilo se tele e uiga ia te au,
Ma faavalea ai au lava, i au faatinoga uma,
I le manatu faapea, o le a le iloa lava e se tasi.8
Manatua upu matagofie a le Perofeta o Iosefa Samita: “Sa ou mautinoa lena mea, ma sa ou mautinoa sa silafia e le Atua lena mea, ma e lē mafai ona ou faafitia lena mea, pe ou te fiatoa e fai; sa ou iloa lava o le faia o lea mea o le a ou faatausuai ai i le Atua, ma oo ai i lalo o le tausalaga” (Iosefa Samita—Talafaasolopito 1:25).
O loo i ai le uunaiga malosi ia ausia, uunaiga malosi ia tausisia ni togi maualuluga, uunaiga malosi e sue se galuega, uunaiga malosi ia sue ni uo, uunaiga malosi ia faafiafia i latou o loo siomiaina oe, uunaiga malosi ia faauu. Aua nei faatagaina nei uunaiga malolosi e faaleagaina ai lou uiga tauleleia o le faamaoni. Ia faamaoni pe a foliga mai e faasagatau atu taunuuga ia te oe. Tatalo mo le faamaoni faateleina, mafaufau i eria o le a finagalo le Alii e te atili faamaoni ai, ma ia i ai le lototele e faia laasaga manaomia e siitia ai lou agaga i se tulaga maualuga atu o le naunau ia faamaoni atoatoa.
Na apoapoai mai Peresitene Monson ia i tatou, “Ia avea i tatou ma faataitaiga o le faamaoni ma le amiosa’o i soo se mea lava tatou te o i ai, ma soo se mea tatou te faia.”9 Atonu e te mafaufau e tuu le fautuaga lenei mai le perofeta a le Alii i se nofoaga e mafai ona e vaai soo i ai.
Na fautua mai Elder Oaks, “E le tatau ona tatou taliaina ni manatu e ese mai ia i tatou lava. E tatau ona pulea i tatou e manaoga o le upumoni.”10 Ia tamau ia te oe lava. Na fetalai le Faaola, “Ai se tasi e fia mulimuli mai ia te au, aua nei usiusitai o ia ia te ia, a ia ave e ia lona satauro, i le mulimuli mai ai ia te au” (Mataio 16:24).
Ou te faaiu i le mea na ou amata ai. O lo tatou Tama Faalelagi ma Lona Alo o ni tagata o le faamaoni aiai, saolele ma atoatoa. Ou te molimau atu o loo soifua lo tatou Tama oi le Lagi ma Lona Alo Pele. E silafia lelei e i Laua oe. E alolofa i Laua ia te oe. O lou taunuuga o se atalii po o se afafine o le Atua o le avea e faapei o i Laua. O i tatou o ni soo o le Alii o Iesu Keriso. Ia tatou maua le lototele e mulimuli ai ia te Ia.