“E mafai faapefea ona ou fesoasoani i au uo e foia faafitauli e pei o le palauvale ma le soona taaalo i taaloga vitio?”

Sa ou tuuina atu se lesona e uiga i le gagana i le Mutuale. Ou te manatu ua aoga, i le le itiiti ifo ma le toatasi o au uo lelei. Tatou te muamua ona faia le faataitaiga. E mafai ona tatou tatalo mo a tatou uo ma maua le lototele e tau atu ia i latou i le taimi sao, “Faamolemole aua le tautatala i upu leaga. Ou te luiina outou ia aua le fai atua ni mea le faaaloalo i le aso.”

Muamua, o le a ou tatalo a o lei faia se talanoaga ma ia. Lona lua, o le a ou tautala atu ia te i latou i le agalelei ma lagona lelei, tuuina atu fautuaga e pei o le aloese mai le tali atu pe a ita, mo se faataitaiga. O lau faataitaiga o le a fesoasoani foi ia i latou e faaaoga le gagana e sili atu ona lelei.

Nai lo le otegia o i latou, fesoasoani ia i latou ia iloa o loo i ai ni mea e sili atu e mafai ona latou faia. Valaaulia i latou e fai ni gaoioiga malie, ma aoga faatasi ma outou ma uunaia i latou e fai ni mea e sili atu ona aoga e pei o le aoao e ta se mea faifaaili, taaalo ma nai tei, po o le fesoasoani ia i latou i totonu o le fale.

O le a ou tau atu ia i latou e tatalo mo le malosi ma faataitai le tautala e aunoa ma le palauvale pe faaaoga ai upu masoa. Ou te tauina foi ia i latou o le faaaluina o le taimi tele i taaloga vitio e faatapulaaina ai a latou fegalegaleaiga ma uo ma aiga, ma e mafai ona latou taofia e ala i le auai i gaoioiga lelei ma aoga. Afai latou te iloaina i latou lava ua faia se mea sese, e mafai ona latou tatalo mo le malosi ma faaauau pea ona faataitai ona o le faataitai e faaatoatoa ai.

E le mafai ona tatou pulea amioga a isi tagata, ae e mafai ona tatou fesoasoani e faatosina i latou mo le lelei. E mafai ona tatou ola o tatou olaga o ni faataitaiga lelei, e faapei o Keriso ma fesoasoani ia i latou o loo siomia i tatou e o mai ia Keriso. Afai o loo faia e a tatou uo ni filifiliga le lelei, e mafai ona tatou fautuaina atu nisi filifiliga e sili atu ona lelei ma faailoa atu le mea ua tatou iloa e sao ma le moni e ala i a tatou upu ma a tatou amioga.

Ose tasi o auala faapitoa e mafai ona ou fesoasoani ai i au uo e tuu le palauvale e ala i le faia o se “fagu palauvale,” ma soo se taimi lava e palauvale ai se tasi, latou te tuuina se 25 sene i le fagu. E mafai ona ou fesoasoani i uunaia le taofia o le soona fai o taaloga vitio pe a ou valaauliaina au uo i tolauapiga a le autalavou, mea e fai o le Ekalesia, ma isi gaoioiga faafiafia. Ou te mafai foi ona faailoa atu i latou i ni tagata fou o le a fesoasoani ia i latou ia fefaamasaniai ma toaaga mai.

O le avea ma se faataitaiga lelei o le mea aupito sili lea ona taua e mafai ona ou faia ona o le taumafai e fesoasoani i se tasi ia tuu se amioga leaga ae o loo ou faia le mea lava lea e tasi e leai lava ma se uiga. Latou te le mafaufau mamafa i lau fautuaga po o lou manatu. Ou te mafai foi ona fesoasoani i au uo i le faamatala atu ia i latou pe aisea ou te le maua ai se lagona lelei i a latou amioga. Afai o la latou gagana e le talafeagai, e mafai ona ou fesoasoani ia i latou e vaai i foliga latou te tuuina atu i tagata pe a latou faaaogaina lena ituaiga o gagana le lelei.

E mafai ona e tatalo mo i latou e tuu le palauvale pe taofia le soona taaalo i taaloga vitio. O le a le faatiga lava le tatalo.