Sa Digital Lamang
Nagpakabuhi Ka Ba sa Ebanghelyo sa Dili Kaayo Kinasingkasing nga Paagi?
Ang atong mga kinaiya mahitungod sa atong mga responsibilidad sa Simbahan sa tinuod makahimo og kalainan.
“Gikinahanglan ba nako kini?”
“Nakahunahuna ka na ba niini kaniadto? Misantop na kini sa akong hunahuna sa makadaghang higayon. Ug akong nahibaloan nga ang ingon nianang daw walay hinungdan nga hunahuna usa diay ka importanting timailhan sa akong kinaiya. Sigurado, tanan kita makatabang ug makapangalagad sa uban, makadawat kita ug makatuman sa atong mga calling sa Simbahan, ug makatambong kita sa atong mga miting sa Simbahan. Bisan gihimo kini sa dili hingpit nga paagi, kining mga butanga makahimo og kalainan sa atong kinabuhi. Apan naghatag ba kini og limit sa katakus sa Dios sa paggamit kanimo? Naghatag ba kini og limit sa katakus sa Dios sa pag-usab kanimo? Alang kanako, siguro naghatag kini og limit.
Kini nga ideya nagtulod kanako sa paghunahuna mahitungod ni Laman ug ni Lemuel, kinsa mibiya sa Jerusalem, kinsa mibalik alang sa mga panid, kinsa mitabang gayud sa paghimo sa barko, kinsa mihimo og daghang pagkamasulundon—apan gihimo nila kining mga butanga uban sa mga pagbagulbol ug sa dili kaayo kinasingkasing nga paagi. Wala nila itugot nga ang ilang mga kasinatian makausab kanila ngadto sa mas maayong pag-uswag. Hinoon, kanunay silang nagbagulbol ug nagbaton og negatibong mga kinaiya sa matag kahimtang nga ilang nasinati. Ug human sa pagkamatikod niana, dili gayud ako gustong mahimo nga usa ka Laman o Lemuel.
Gahini og kadiyot ang paghunahuna gayud sa mga rason nganong imo kining gihimo. Mitabang ka ba sa uban pinaagi sa pagtutok sa mga panalangin nga giandam alang kanimo? O mitabang ka ba sa uban tungod kay tinuoray ka nga gustong mopaambit sa imong kahayag ug gugma uban kanila? Gihimo ba nimo ang tanang gikinahanglan alang sa imong calling tungod kay mao kana ang gilauman gikan kanimo? O gihimo nimo kini tungod kay gusto kang moserbisyo sa Ginoo ug sa niadtong mga anaa sa imong palibut?
Mao kini ang susamang mga pangutana nga gisulayan nako sa pagpangutana sa akong kaugalingon sa matag karon ug unya. Gihimo ba nako ang tanan sa pagpakabuhi sama sa usa ka tinuod nga disipulo ni Kristo uban sa tinuod nga katuyoan? O ang akong kasingkasing ba wala mobati niini sa hingpit? Nagtuo ko nga si Bishop Gérald Caussé, Presiding Bishop, misulti niini sa pinakamaayong paagi: “aktibo ba kita sa ebanghelyo, o nagpadaghan-daghan lang kita og buluhaton diha sa Simbahan?” (“Kining Tanan Mahitungod sa mga Tawo,” Liahona, Mayo 2018, 112).
Aktibo vs. Puno sa Buluhaton [Busy]
Alang nako, kon “magpadaghan-daghan lang ko og buluhaton” sa Simbahan, mosulod sa akong hunahuna ang kawalay pagpakabana. Kini nga kawalay pagpakabana maggikan sa kakulang sa kadasig nga kinaiya o gani gikan sa pagtugot nga ang dili importanting mga buluhaton mobalda sa akong iskedyul ngadto sa mga butang nga importante kaayo. Kini nga pagkaluya mosulod kon maglingkod ko sa sakrament miting ug dili maminaw og tarung, kon mag-ampo ko inig kagabii ug ang akong hunahuna magsugod sa paglatagaw ngadto sa ubang mga butang, kon magdali-dali ko og pakli sa akong mga kasulatan nga walay pagpamalandong niini, o kon motabang ko sa uban aron lang ingnon nga nakatabang ko imbis sinserong maningkamot sa pagpakighigala kanila.
Usahay bation gani nako ang pagkasagmuyo kon wala koy makitang kalamboan sa akong kinabuhi—kon wala koy pagpakabana ug “magpadaghan-daghan lang ko og buluhaton” sa ebanghelyo—ug kini nga mga pagbati magpabilin hangtud akong mahibaloan unsay problema. Usahay kinahanglan kong maghunahuna, mamalandong, ug mangutana sa kaugalingon, “Kini nga calling o kining tawhana o kini nga pag-ampo o kini nga kasulatan gihatagan ba nako sa hingpit nga atensyon ug sa kinasingkasing karon?”
Kon moabut kanako kining kalit nga inspirasyon, niana ang kausaban nahitabo gayud sa akong kinabuhi. Kon tinuoray akong mag-ampo aron makita ang uban kon unsay pagtan-aw sa Langitnong Amahan kanila, kon mag-ampo ko alang sa mga oportunidad sa pagpangalagad, kon mag-ampo ko alang sa giya sa akong calling, sa akong panarbaho, ug sa inadlaw nakong pagpakabuhi, ug labaw sa tanan, kon akong lihukon ang mga pag-aghat nga Iyang gihatag kanako, kon ang akong mga buhat makita diha sa akong tinguha nga mahimong mas maayo—kana mao ang panahon nga aktibo ako sa ebanghelyo. Kana mao ang panahon nga mobati ako sa tinuod nga pagkausab sa akong kinaiya, sa akong kasingkasing, ug sa akong kalag. Kana mao ang panahon nga akong makita nga naabli ang milagrusong mga butang. Kana mao ang panahon nga mobati ako nga ang tinuod nga kalipay mosulod sa akong kinabuhi. Kana ang panahon nga tinuoray akong naningkamot sa pag-usab alang sa mas maayo.
Mga Buhat vs. Mga Pagbati
Nagtuo kong pwede ra natong lingion ang pipila ka higayon sa atong kinabuhi dihang ang atong mga buhat halangdon, apan ang atong mga gibati sa luyo niini dili kaayo ingon niana. Usahay ang kinabuhi puno sa buluhaton, usahay kita dili hingpit nga malipayon sa atong mga kahimtang, ug usahay ang mga butang dili kanunay nga mahitabo sa paagi nga maoy atong gusto. Dili kita perpekto, apan kon mohangyo kita sa Langitnong Amahan nga ibug-os ang atong kasingkasing ngadto sa mga usahay walay pulos o usik sa panahon nga mga butang nga gipabuhat kanato, makakat-on ra kita sa paghimo niini sa mas Kristohanong pamaagi.
Mahunahuna nako ang mga panahon dihang nagpanuko ko sa pag-uyon nga mohimo og proyekto sa pagserbisyo, nga mao diay ang naghimo nga mahumok ang akong kasingkasing ug mausab human sa mao nga kasinatian. O sa dihang nakadawat ko og calling ug mireklamo nga mihurot kini og daghan sa akong oras, apan kini mao diay ang naghatud kanako sa mapait ug tam-is nga mga luha dihang gitangtang na ko sa calling tungod kay nakakat-on na ako sa paghigugma niini.
Makapaambit kita og kahayag, makatuman sa atong mga responsibilidad, ug makadawat og mga tubag sa atong mga pag-ampo sa pinakaepektibong paagi kon ang atong mga kasingkasing anaa sa eksaktong dapit. Kon mogahin kita og panahon sa pag-analisar sa mga kinaiya ug mga katuyoan luyo sa atong mga buhat ug mobuhat sa tanan nga atong mahimo “sa kinasingkasing, [ug] uban sa tinuod nga katuyoan” (Moroni 10:4), mas maila nato ang giya sa Langitnong Amahan, makakita og mas dakong kalipay, ug makahimo og mas dakong kalainan sa atong kinabuhi ug sa kinabuhi sa uban.