Hello gikan sa Estonia!
Kami si Margo ug Paolo. Karong tuiga mobiyahe kami sa tibuok kalibutan aron sa pagkat-on mahitungod sa mga anak sa Dios. Kuyugi kami samtang bisitahon namo ang Estonia!
Ang Estonia anaa sa amihanang Uropa. Duna kini kapin sa 2,000 ka mga isla. Mga 1.3 ka milyon nga tawo ang nagpuyo sa Estonia.
Ingon niini ang pagsulti og “hello” sa Estonian: Tere!Ug ingon niini ang imong pagsulti sa ngalan sa Simbahan: Viimse Aja Pühade Jeesuse Kristuse Kirik
Mao kini ang Tallinn, ang kapital sa Estonia. Mga 800 ka tuig na kini! Ang Estonia dunay daghang hilit nga mga dapit, sama sa kakahoyan ug mga lamakan. Gani, sobra sa katunga nga bahin sa Estonia ang pulos kakahoyan. Daghang tawo sa Estonia gustong mogahin sa panahon diha sa kinaiyahan.
Unsay para panihapon sa Estonia? Tingali karne sa baboy o inatsarahan nga isda nga dunay patatas, repolyo, aslom nga krema, ug itom nga pan. Gitawag kana og sprat sandwich.
Ganahan ka bang mokanta sa Primary? Sa matag lima ka tuig, ang mga Estonian magpundok alang sa usa ka dakong kalingawan nga saulugon sa ilang nasud pinaagi sa pagpanganta ug pagpanayaw.
Ang Simbahan sa Estonia gamay ra apan lig-on. Dunay mga usa ka libo ka mga miyembro sa Simbahan. Ang kinadul-an sa ilaha nga templo anaa sa Hilsinki, Finland.
Himamata ang duha ka sisters gikan sa Estonia!
Usa ka gabii dihang gusto na kong matulog, ang akong teddy [teddy bear] nawala. Gipangita nako apan wala nako makit-i. Nag-ampo ko. Dayon akong nakit-an ang akong teddy bear ug nagdamgo og nindot.
Bianka J., edad 7
Ang among pamilya gustong moserbisyo sa uban. Ang pagserbisyo nakatabang namo nga mobati sa Espiritu Santo, nga naghatag kanamo og init nga pagbati sa kalinaw. Ang akong igsoon nga mga babaye ug ako maghimo og mga regalo para sa uban tungod kay gusto namo nga mobati sila nga gihigugma.
Piibe J., edad 10
Salamat sa pagsuroy sa Estonia kauban namo. Magkita kita sa sunod higayon!