“Mao Gayud Kini!”

Imahe

man working on car

Paghulagway pinaagi ni John Kachik

Naabut ko sa balay sa usa ka tingtugnaw nga gabii human magpahigayon og mga interbyu isip bishop. Gikapoy na kaayo ko. Ang trabaho makaluya sulod sa mga semana, ug ang mga responsibilidad sa pamilya ug Simbahan nagpabatyag kanako nga mosobra na kini sa akong mga limitasyon.

Nianang gabhiona, kinahanglan nga ayuhon nako ang akong sakyanan aron makatrabaho ko sa pagkasunod buntag. Dihang gisul-ob na nako ang akong pantrabaho nga sinina, nausab ang akong mga tahas gikan sa pagka-bishop ngadto sa pagka-mekaniko. Mihigda ko sa bugnawng salog sa garahian ilawom sa sakyanan ug nagsugod sa pagtrabaho. Nganong kinahanglan pa kong magpakaging, maluya, ug mopasakit sa akong mga lutahan human nga nakatrabaho na ko og maayo nianang adlawa? Nagkawala ang akong pasensya ug gisugdan ang usa ka nag-agumod nga pag-ampo sa pangaliyupo ngadto sa Langitnong Amahan.

“Posible ba nga matabangan ko Nimo og gamay?” Miingon ko. “Naningkamot gyud ko nga mahimong maayong amahan, bana, ug bishop ug sa pagsunod sa mga sugo. Dili ba ko makaserbisyo og mas maayo kon makapahulay ko og gamay? Palihug tabangi ko nga mahuman kini aron makatulog ko.”

Sa kalit, tulo ka klaro, tin-aw nga mga pulong ang misulod nga klaro kaayo sa akong hunahuna: Mao gayud kini!”

“Ha?” Mitubag ko.

Ang mga pulong miabut na usab: “Mao gayud kini!”

Ang pagkasabut nagsugod sa pagpuno sa akong hunahuna ug kasingkasing dihang ang mga pulong miabut sa ikatulong higayon: “Mao gayud kini!” Kining mga pulonga nagdala og usa ka mensahe sa akong espiritu. “Kini” ang mortal nga kinabuhi, ug nagsinati ako og panahon sa paglambo nga gidesinyo sa pagtabang kanako nga mahimong unsay gusto sa Langitnong Amahan nga akong maabut. Sama kini nga ang Espiritu miingon kanako, “Naglaum ka ba niining yutan-ong panaw nga walay mga pagpanglimbasog?” Dihang mibarog ko gikan sa mikaging nga sementadong salog, nausab na ko.

Magdepende kon giunsa nato sa pagsanong kini, ang mga pagsulay pweding makita isip mga gasa gikan sa usa ka mapinanggaong Amahan sa Langit. Gihatagan kita Niya sa oportunidad nga makaatubang sa mga pagsulay aron makakat-on kita sa pagduol Kaniya. Kon ato kining buhaton, panalanginan kita og kahibalo ug espiritwal nga paglambo.

Ang tulo ka mga pulong nga misulod sa akong hunahuna niadtong bugnaw nga kagabhion didto sa sementadong salog sa akong garahian mipanalangin kanako sulod sa kapin 35 ka tuig. Akong gipaningkamutan nga walay pagsulay nga mausik. Nakita nako ang mga pagsulay isip mga oportunidad sa pagkat-on og mga butang nga posibling dili nako makat-unan sa uban pang paagi.