Mibati nga Bag-o
Ang tagsulat nagpuyo sa Texas, USA.
Estonia
“Duna koy surprisa!” Ema miingon si (Mama) miingon dihang gikuha niya si Rasmus gikan sa eskwelahan. Kuyog silang naglakaw sa gamayng mga karsada nga galinya ang mabulukon nga mga gambalay.
“Rosolje alang sa panihapon?” Nanghinaot si Rasmus nga makatag-an. Nakapangaon na sila niini sa milabayng semana lang sa iyang ikapito nga birthday. Apan kanunay siyang pwede rang mokaon og daghang rimulatsa ug salad nga patatas uban sa inatsarahang isda nga pangan!
Si Ema nagpanglingo sa iyang ulo uban sa pahiyom. “Nakahimamat ko og duha ka batan-ong babaye sa bus ganinang buntag. Mga Misyonaryo. Mobisita sila karong gabii aron sa paghisgot mahitungod sa ilang simbahan.”
Mihangad si Rasmus dala ang kakuryuso. Wala pa gayud siya makahimamat og mga misyonaryo kaniadto.
Naa siya sa iyang kwarto nagdula sa iyang trak-trak sa bombero dihang nangabut ang mga misyonaryo. “Tere! “Tere! Hello!” gitimbaya nila si Ema samtang nanulod sila sa apartment. Gihubo nila ang bug-at nilang mga boots ug gisul-ob ang mga pangbalay nga tsinelas nga gitipigan ni Ema para sa mga bisita. Si Ema midala nila ngadto sa orange nga lingkuranan. Apan si Rasmus nagpabilin ra sa may pultahan.
Ang mas taason nga babaye nakamatikod niya ug mipahiyon. Ang iyang itom nga name tag nag-ingon nga Õde Craig (Sister Craig). “Gisultihan mi sa imong mama nga bag-o ka lang nag-birthday,” miingon siya. “Duna mi gidala para nimo.” Gitunol niya ang usa ka gamay nga kard. Gitan-aw kini og maayo ni Rasmus.
Litrato kini sa usa ka tawo. Nagsul-ob siya og puti nga kupo, ug nakatuyhad ang iyang kamot.
“Nakaila ka ba kon si kinsa kana?” Nangutana si Õde Craig.
Wala makaila si Rasmus sa pangalan sa tawo. Wala pa gayud siya makakita niini nga litrato sukad. Apan ang tawo mabination ug gamhanan nga tan-awon. “Tingali usa siya ka hari!” Miingon si Rasmus.
Mipahiyom ang duha ka misyonaryo. “Oo, hari Siya! Siya ang Hari sa mga hari! Ang Iyang ngalan si Jesukristo.” Mikuha is Õde Craig og usa ka basahon nga blue ang hapin. “Ug kini ang basahon nga nagtudlo mahitungod Kaniya, ang Mormoni Raamat. Ang Basahon ni Mormon.”
Siya ug si Ema nagsugod sa pagbasa sa Basahon ni Mormon matag adlaw sa dili pa siya moeskwela. Atol sa pag-eskwela, maglakaw-lakaw si Rasmus uban sa iyang mga kaklase subay sa kinaiyahan ug dayon mangatulog. Human sa pag-eskwela, siya ug si Ema sa kasagaran makigtagbo sa mga misyonaryo. Nakig-istorya sila sa mga misyonaryo mahitungod sa unsay ilang nabasa sa Basahon ni Mormon. Usahay mopakaon si Ema sa tanan og kringel, linubid nga pan nga cinnamon. Sa mga katapusan sa semana siya ug si Ema magbisikleta o mag-picnic sa baybayon. Usahay mohimo sila og taas nga lakaw sa mga kakahoyan subay sa paborito nilang suba.
Sa usa niini nga mga paglakaw sa kakahoyan, gisultihan siya ni Ema nga gusto siyang magpabunyag. Mingislo si Rasmus. Ang mga misyonaryo mihangyo ni Ema sa pag-ampo mahitungod sa pagpabunyag o dili pagpabunyag. Daw duna na siyay tubag!
“Ug nahibalo na ko kon asa ko dapit magpabunyag,” gisultihan niya si Rasmus dala ang pahiyom. “Makatag-an ka?”
Gihunahuna ni Rasmus ang mahitungod sa leksyon sa mga misyonaryo bahin sa bunyag. Mipakita sila og usa ka litrato ni Jesus kauban ni Juan Bautista diha sa usa ka suba. …
“Sa suba!” miingon siya. “Sa atong paborito nga suba.”
Paglabay sa usa ka semana human niadto, si Rasmus nagbarug sa daplin sa suba kauban sa mga misyonaryo ug sa ubang mga tawo gikan sa simbahan. Andam na si Ema nga mabunyagan. Giunlod siya sa ilawon sa tubig, sama sa gibuhat ni Jesus. Dihang mikawas na siya, nagpahiyom siya. Gusto ni Rasmus nga mahinumduman kini nga gutlo hangtud sa hangtud—ang asul [blue] nga tubig, ang puti nga ihalas nga mga bulak sa berde [green] nga mga tanom, ug ang pahiyom sa iyang mama.
“Unsay pagbati kon mabunyagan?” nangutana siya sa wala madugay, dihang ang tanan nangaon sa cookies nga dala sa mga misyonaryo.
“Nindot kaayo,” miingon si Ema kaniya. “Gusto ko naa ra ko sa suba hangtud sa hangtud. Mibati ko nga bag-o kaayo!” Migakos si Ema kaniya og hugot.
“Sa akong sunod nga birthday, gusto kong magpabunyag, sama nimo ug kang Jesus,” miingon siya kaniya. Gusto sab akong mobati og kabag-o.”