Pagsagubang sa Trahedya

Kon may trahedyang mahitabo, ang mga bata posibling mobati nga ang ilang kalibutan dili na balanse. Ipakita nga ehemplo ka sa pagkamakanunayon ngadto kanila. Sulti sa kalma ug sa mapasaligon nga paagi mahitungod sa problema. Ipadayon sa pagbuhat ang normal nga butang kutob sa imong mahimo. Buhata ang tanan nimong mahimo nga ipadayon ang paghimo og family home evening, pagtuon sa kasulatan, pag-ampo, ug uban pang naandan sa pamilya. Paglabay sa panahon, makakat-on ang mga bata nga bisan ang ilang kalibutan natay-og, ang ebanghelyo magdala og panglantaw ug ang kinabuhi magpadayon.

Ipakita ang pagtahud sa mga pagbati sa mga bata. Paminawa ang mga bata ug sabta unsay ilang gibati. Ipakita diha nila nga gisabut nimo sa tinuoray gayud ang ilang mga kabalaka. Hatagi sila og higayon kon gikinahanglan nila kini apan pahibaloa sila nga andam kang maminaw kon andam na silang mosulti. Tubaga ang mga pangutana sa matinuorong paagi nga tukma sa ilang pangidaron kon motumaw kini. Pahibaloa ang imong mga anak nga pwede ra gyud silang mosulti nimo mahitungod sa ilang mga kahadlok ug mga kabalaka.

Ang imong mga anak posibling mangutana, “Ngano nga ang Dios motugot nga mahitabo ang dautang mga butang?” Pasabta nga ang maayong mga panahon ug ang dautang mga panahon mga kabahin sa kinabuhi ug kabahin kini sa mahangturon nga plano sa Dios. Gitugot Niya nga ang matag tawo mohimo og kaugalingon nilang mga pagpili, ug usahay ang mga tawo mohimo og dautang mga pagpili nga mosangput sa pag-antus. Sa ubang mga panahon, ang mga trahedya dili sayop sa usa ka tawo apan usa lamang ka bahin sa kinaiyahan. Bisan unsay mahitabo, anaa ang Langitnong Amahan alang kanato. Uban sa Iyang tabang, makakat-on kita ug molambo, bisan sa sakit nga mga kasinatian. Makaduol ra kita Kaniya aron sa pagkaplag og kalinaw.

Ipakita sa mga bata nga duna silay katungod nga makahimo og kalainan pinaagi sa paghatag kanila og paagi sa pagtabang. Sama pananglit, makatabang sila sa pagkolekta og mga donasyon alang sa mga biktima sa katalagman, mobisita sa masakiton o naangol nga higala nga naa sa ospital, modasig og tawo nga namatyan og sakop sa pamilya, o mag-ampo alang niadtong mga nagkalisud. Dili kita makatul-id sa tanan, apan aduna kitay kapasidad sa paghimo og daghang maayo, ug “makalihok kita alang sa kalinaw sa matag higayon nga motabang kita sa paghupay sa pag-antus sa uban.”²

Pahinumdumi ang imong mga anak nga ang Dios nahigugma kanila ug nga ikaw nahigugma kanila. Ayaw paghatag og bakak nga mga saad nga walay dautang mahitabo kanila, apan ipaniguro diha nila nga sa pagkakaron luwas ra sila ug buhaton nimo ang tanan sa pagpanalipod kanila. Ipaniguro diha nila nga ang Langitnong Amahan motabang kanila nga makalahutay sa bisan unsang pagsulay nga moabut sa ilang agianan.

Kon makita nimo ang imong kaugalingon nga nagsubo tungod sa mga kalisdanan, hinumdumi nga sa katapusan, ang maayo magmadaugon batok sa dautan. “Nagsagubang kita og gubat batok sa sala, … apan dili kita angay nga mawad-ag paglaum,” mitudlo si Presidente Thomas S. Monson (1927–2018). Kini usa ka gubat diin kita posibling makadaog ug modaog gayud. Ang atong Amahan sa Langit mihatag kanato sa mga himan nga atong gikinahanglan aron pagbuhat sa ingon. Siya anaa sa timon. Wala kitay angay nga kahadlokan.”³