“Sa unsang paagi nga ang akong patriyarkal nga panalangin makatabang kanako sa paghimo og mga desisyon?”

Ang patriyarkal nga mga panalangin mao ang paagi nga ang Langitnong Amahan makatabang kanato sa pagkahibalo sa atong premortal, mortal, ug mahangturon nga talagsaong pagkatawo [identity]. Pinaagi sa pagkahibalo niining tulo ka espesyal nga mga kamatuoran mahitungod sa atong mga kaugalingon, makatabang kini nga atong masunod ang plano sa Dios alang kanato. Nakaila kita kon si kinsa kita, nganong ania kita dinhi, ug kon asa kita pweding maadto. Samtang ang Liahona molihok sumala sa pagtuo ug kakugi ni Nephi ug sa iyang pamilya sa pagsunod sa mga tambag niini (tan-awa sa 1 Nephi 16:28), kita usab mahimo nga magmatinud-anon ug magkugi sa pagsunod sa kaugalingon natong Liahona ug sa tambag niini, nga maoy mogiya kanato ngadto sa atong balaanong potensyal.

Sa matag higayon nga mobati kong walay makitang abag sa paghimo og mga desisyon, mobasa ko sa akong patriyarkal nga panalangin ug mamalandong sa balaang pagpadayag niini. Ug dayon ang paghukom mahimong sayon. Wala lang kini makatabang nga ako makalahutay sa akong yutan-ong kinabuhi ug makaani sa gisaad nga mga panalangin, apan nagpahinumdom usab kini kanako mahitungod sa pag-andam sa akong kaugalingon alang sa takus nga pagsulod sa gingharian sa Dios ugma damlag. Padayon kining nagtabang nako nga molambo diha sa pagtuo, mosalig sa kabubut-on sa Ginoo, ug magpakabuhi uban sa mahangturong panglantaw.

Ang akong patriyarkal nga panalangin naghatag kanako og tambag gikan sa akong Langitnong Amahan. Kon akong sundon kana nga tambag, nasayud ko nga makakuha ko og pagpadayag sa mga desisyon nga kinahanglan nakong buhaton. Gitubag Niya ang pipila sa akong mga pangutana bisan sa wala pa nako kini ipangutana.

Kon nagpangita ka og kahupayan ug giya o alang sa tubag sa dinalian nga pangutana, pwede kang mag-ampo sa tinuoray mahitungod niini ug mobasa sa imong patriyarkal nga panalangin uban sa tinuod nga katuyoan sa kasingkasing, samtang maminaw sa Espiritu. Ang pagsiksik sa mga kasulatan makatabang usab. Mituo ko nga kon buhaton nimo kini uban sa tinuod nga pagtuo, ang Ginoo motubag kanimo, sa Iyang kaugalingon nga panahon, sa pinakamaayong paagi.

Ang patriyarkal nga mga panalangin magsulti kanato unsay gusto sa Dios nga ipanalangin kanato. Mohatag Siya kanato og mga pasidaan ug mopasabut kon unsaon nato sa pagkahimong mas mahisama Kaniya. Kon mahibalo kita unsay giandam sa Langitnong Amahan alang kanato ug unsaon kini sa pag-angkon, mopili kita ug molihok sa tukmang paagi aron madawat kini.