Ang KINABUHI Usa ka Taas nga Lumba
Kini nga batan-ong mga Santos sa Ulahing mga Adlaw nagpuyo karon kon diin nagpuyo si Apostol Pablo atol sa mga kapanahunan sa Bag-ong Tugon. Ug nagpakabuhi sila pinaagi sa iyang mga pulong.
“Akong nakat-unan nga ang ebanghelyo parehas ra bisan asa. Nga nagpuyo sa gawas sa nasud, akong nakat-unan ang pagtutok sa mga kamatuoran sa ebanghelyo ug ang pagbati sa Espiritu imbis nga mabalda sa kultura.” —Bryana W., 15
“Akong gisulat sa akong samin ang pulong nga hinumdumi aron mahinumduman ang tanan nga nahitabo niining tuiga: AKK, kamping sa Batan-ong mga Babaye, seminary. Nakatabang kini kanako sa paghinumdom kon diin ako gikan.” —Marie H., 17
“Nasayud ko nga kon moadto ko sa seminary mabati nako ang katagbawan kay nahibalo nga gibuhat nako ang angay nakong buhaton, ug nasayud ko nga OK ra ang tanan.” —Lizzie T., 17
Si Loukia C., 15, mihatag sa iyang pagpamatuod sa pinakaunang higayon atol sa kamping sa Batan-ong mga Babaye ug nabunyagan sa wala madugay.
“Ang paborito nakong bahin sa AKK mao ang mga sport, sayaw, ug mga miting sa grupo, nga mao ang pangbuntag nga mga debosyonal ug pagribyu. Nakatabang kini kanako nga mas magmatinabangon ug magmapailubon ug sa dugang nga pagkamapasalamaton sa mga kasulatan.” —Haig T., 14
“Sa AKK, nagsugod kami sa pagkahimong usa ka grupo ug milig-on kini kanamo. Nakatabang kini sa paghulma ug pag-impluwensya sa programa sa kabatan-onan sa Gresya tungod kay karon mas nagkailhanay na kami sa usag usa.” —Alexis H., 18
“Ang pagkanta ibabaw sa entablado sa AKK mao ang usa sa maisugon nga butang nga sukad akong nahimo ug usa sa pinaka-espesyal nga mga gutlo nga akong nasinati sukad. Nianang mga gutloa, akong nakat-unan kon unsa kita kaimportante niining matahum nga kalibutan.” —Irini S., 17
“Atol sa kamping sa Batan-ong mga Babaye akong nakat-unan nga ang kinabuhi susama sa usa ka taas nga lumba. Nakatabang kini nga molambo ang akong pagtuo, nasayud nga kinahanglan kitang magpadayon sa eksaktong dalan, sama nga nagdagan kita sa usa ka taas nga lumba. Kadto nga kasinatian nakatabang sa paglambo sa akong pagpamatuod ug magpadayon sa pagbaton og pagtuo ug magpadayon sa eksaktong dalan.” —Winifred K., 14
“Ganahan kaayo ko nga makakita kon unsay pagbati nga ikauban ang mga batan-on nga kaparehas og mga gituohan. Akong gibati nga tanan kita konektado sa pipila ka espesyal nga paagi, labaw pa kay sa pagkaila lang sa matag usa nga pangalan.” —Pavlos K., 15
“Nalipay ko nga nakaangkon og oportunidad nga makahimamat sa ubang mga batan-on nga naghimo sa samang mga butang nga akong gibuhat matag adlaw.” —Joshua K., 17
“Ang AKK ug ang kamping sa Batan-ong mga Babaye dunay susamang pagbati bisan asa ka moadto sa kalibutan. Nalingaw ko sa mas gamay nga pundok nga kamping sa Batan-ong mga Babaye tungod kay mas sayon ang pagpakig-uban sa usag usa.” —Olivia H., 15
“Dili ko miyembro sa Simbahan, apan mosimba ko matag semana kon mahimo. Akong gidayeg ang unsay gibarugan sa batan-ong mga babaye.” —Irene C., 14
Pipila ka bulan ang milabay, usa ka klase sa seminary nag-abut sa Mars Hill, duol sa Atenas, Gresya, diin si Apostol Pablo kausa mihatag sa usa ka puno sa gahum nga sermon (tan-awa sa Mga Buhat 17:22–34). Ang mga estudyante naghisgot mahitungod sa impluwensya sa seminary sa ilang kinabuhi, lakip sa mga pagtulun-an ni Pablo.
“Ang pagpuyo sa Gresya naghimo sa Bag-ong Tugon nga buhi,” miingon si Alexis H., edad 18. “Ang akong amahan gustong moadto sa lain-laing mga nangaguba ug biniyaang mga dapit diin si Pablo nagtudlo ug mopaambit og kasulatan o mosugilon og mga istorya mahitungod sa kon diin nahitabo ang panghitabo.”
Sama nga si Pablo nag-atubang og mga hagit sa iyang panahon, ang mga batan-on sa Gresya nag-atubang usab og sosyal, politikal, ug ekonomikal mga isyu. Ang mga komperensya sa kabatan-onan [youth conference] ug mga Young Women camp mao ang mga talagsa ra nga mga hitabo sa Gresya, ug bisan gani ang pagtambong og seminary malisud. Bisan niini ug sa ubang mga hagit, ang mga kabatan-onan sa Gresya migamit sa pag-awhag ni Pablo nga “kamo nanagbarug nga malig-on diha sa usa ra ka espiritu, nga uban sa usa ra ka hunahuna kamo managhugop sa pagpakigbisug alang sa pagtoo sa ebanghelyo” (Mga Taga-Filipos 1:27).
Ang pagpuyo sa Gresya nagpasabut nga kining batan-ong mga miyembro nalingaw sa init-init nga panahon, mga baybayon, pagkaon, ug pagsayaw. Nalingaw usab kaayo sila sa panag-uban sa usag usa. Samtang mag-abut sila sa seminary ug sa mga kalihokan sa branch, nagkalig-on sila sa pagtuo ug paghigalaay.
Seminary sa Mars Hill
Ang grupo sa seminary atubangan sa meetinghouse sa Atenas.
Mga litrato sa maayong kabubut-on ni Leeann Heder
Dihang gisugdan ang seminary sa Gresya pipila ka tuig ang milabay, lima pa lang ang estudyante. Mag-abut sila tulo ka buntag sa usa ka semana, nga ang uban moapil pinaagi sa internet nga video conference. Mag-abut usab sila sa matag hapon sa Miyerkules alang sa seminary, sundan sa usa ka kalihokan. Nagkasuod sila sa usag usa ug nahimong kahayag sa ilang mga higala, kinsa nakamatikod sa ilang ehemplo. Kon may pangutana ang ilang mga higala, ang mga batan-on modala kanila ngadto sa seminary ug sa mga kalihokan sa Mutual.
Usa ka batan-ong lalaki, si Pavlos K., 15, miingon, “Ang pag-adto sa seminary usa ka maayong paagi sa pagsugod sa adlaw ug nagtabang kanako nga magpabiling lig-on. Nagpahiluna kini sa akong determinasyon sa pagkahimong ehemplo ngadto sa uban. Nakatabang kini aron masugdan ang adlaw sa paghunahuna mahitungod kang Jesukristo.”
Samtang milambo ang mga batan-on diha sa kalig-on ug paghiusa, ang mga panalangin ug mga oportunidad miabut. Sama pananglit, niadtong 2017 napanalanginan sila nga makatambong sa Alang sa Kalig-on sa Kabatan-onan [AKK] [FSY], usa ka dako nga rehiyonal nga komperensya sa kabatan-onan. Ang mga batan-ong babaye misalmot usab sa pinakaunang kamping sa Batan-ong mga Babaye sa Gresya. Isip resulta, milambo sila gani nagkasuod nga usa ka grupo, ug duha ka batan-ong mga babaye mipasakop sa Simbahan.
Internasyunal nga Komperensya sa AKK [Alang sa Kalig-on sa Kabatan-onan]
Atol sa AKK nga komperensya, pag-spelling sa pulong nga “Pangayo,” gikan sa Santiago 1:5.
Ang komperensya, gihimo sa Germany, nga mipundok sa batan-ong mga Santos sa Ulahing mga Adlaw gikan sa tibuok Uropa. Ang mga batan-on sa Gresya ug Cyprus naggikan sa gatusan ka milyas ang gilay-on, ug ang kasinatian sa komperensya dunay dako kaayo nga epekto kanila. Alang ni Maximos A., 14, “ang pinakahalandumon nga butang sa AKK [FSY] mao kadtong pagpaambit namo sa among mga pagpamatuod. Ang tanan mibati sa Espiritu, ug midasig kini kanako sa pagpalambo sa akong kaugalingog pagpamatuod.”
“Sa sinugdanan upat lang sa mga batan-on ang miingon nga makaadto,” midugang si Loukia C., 15, “apan sa katapusan, 15 na ang mitambong—usa ka talagsaong kalampusan [sa rekord] alang sa Gresya—naglakip sa 3 ka dili miyembrong mga higala.”
“Pagkaanindot nga magkauban sa dapit diin nag-ambitay kamo sa parehas nga ebanghelyo ug ikaw dili lahi. Nagkahiusa kami, ug mibati kami sa susama nga Espiritu. Kining mga butanga nakatabang kanako.”
“Dili miyembro ang akong papa ug dili mosugot nga moadto ko sa AKK [FSY] [Alang sa Kalig-on sa Kabatan-onan] o mabunyagan,” miingon si Jesiana, 16. “Apan ang mga miyembro nagpuasa alang nako, ug ang akong apohan nga babaye nakig-istorya sa akong papa. Pagkahuman niana miingon siya nga pwede ra kong moadto!”
Didto sa AKK, nasinati niya ang daghang una, sama sa, “pag-apil sa mga leksyon ug mga kalihokan ug ang paghatag sa akong pagpamatuod nakatabang nako nga makasabut kon unsa gayud ang pagbati nga mobati sa Espiritu Santo. Wala pa gayud ako mobati sa Espiritu sama niana kaniadto, ug nalipay kaayo ko ug mahinamon. Mihatag ko sa akong pagpamatuod sa pinakaunang higayon.”
Agig dugang sa espiritwal nga pagpakaon, ang mga batan-on nakarelaks ug nangalingaw sa komperensya. Si Haig T., 14, miadto sa komperensya gikan sa Cyprus. “Nakakat-on ko sa pagkahimong labaw ka sosyal, sa pagbaton og tinuoray nga paghigalaay, ug sa pagkalingaw, bisan sa mga lisud nga panahon.”
Kamping sa Batan-ong mga Babaye
Batan-ong mga babaye Marathon, Gresya.
Ang kamping sa Batan-ong mga Babaye dunay susamang epekto. Dose ka batan-ong mga babaye ang nakigtagbo sa ilang mga lider duol sa karaang dapit sa panggubatan sa Marathon. Migahin silang tanan og tulo ka adlaw nga magkauban, nagkat-on sa pagsalig sa usag usa alang sa kalig-on ug pagdasig.
“Sa 12 anyos pa ko,” miingon si Loukia, “Miadto ko sa simbahan sa pinakaunang higayon ug nalipay kaayo, apan namatikdan dayon nako nga ako rang usa sa akong pangidaron. Karon, duha ka tuig ang milabay, kami duna nay daghan kaayong batan-ong mga babaye nga sa unang higayon nakahimo kami og kamping sa mga Batan-ong Babaye.” Dihang nagkatagbo na sila, miingon siya, “akong nahibaloan unsay ipasabut sa pagkahimong Santos sa Ulahing mga Adlaw. Kon magsunod kita sa ebanghelyo, usa ka kahayag ang mopalibut kanato.”
Kamping sa Batan-ong mga Babaye, 2017—ang pinakauna sukad sa Gresya.
Alang ni Bryana W., 15, ang AKK ug ang kamping sa mga Batan-ong Babaye nakatabang kaniya nga moduol ug makigsulti sa uban. “Ang akong pamilya kanunayng magbalhin-balhin, ug naglisud ko sa pagpakigsuod sa uban tungod kay maulawon ko,” miingon siya. “Apan tungod kay nasuod ko sa among grupo sa AKK, nakahimo ko og buotan kaayong mga higala. Atol sa miting sa pagpamatuod, among gipaambit ang among mga pagbati, ug akong naamguhan nga ang uban mibati sama sa akong gibati.”
Si Marie H., 17, nahinumdom sa tema sa kamping, “Ang kinabuhi usa ka taas nga lumba, dili usa ka mubo nga lumba.” Ang mga batan-ong babaye ug ang ilang mga lider naghisgot sa kaimportane sa paglahutay ug paghuman sa lumba, miingon siya. “Nagpahinumdom kini kanako nga makalahutay ako, nga maglakaw sa igong gikosgun nga makasugakod ko og dugay, ug magpabiling nakapunting sa katapusan [kadauganan] sa lumba. Dayon akong matuman ang mga butang nga gikinahanglan sa Langitnong Amahan nga akong buhaton.”
“Ang pagtan-aw sa nagsubang nga adlaw nagdala og malinaw, matahum nga espiritu.” —Lizzie T.
Usa sa mga importanting hitabo sa kamping mao ang debosyonal atol sa pagsubang sa adlaw [sunrise devotional] didto sa baybayon sa katapusan nilang buntag. Si Lizzie T., 17, miingon, “Gidala namo ang among mga kasulatan, mihimo sa among debosyonal, ug mitan-aw sa pagsubang sa adlaw. Tanan kami mibati sa gugma sa Dios. Maanindot kaayo kadto nga pagtapos sa panahon sa among panag-uban.”
Walay kahadlok nga Pag-atubang sa Umaabut
“Gikan sa AKK [Alang sa Kalig-on sa Kabatan-onan] [FSY] ug sa kamping sa Batan-ong mga Babaye, nakakat-on ko og daghan mahitungod sa ebanghelyo ug kon sa unsang paagi kini nakatabang kanako sa akong kinabuhi,” miingon si Irini S., 17. “Nakahimo ko og daghang mga higala ug nakakat-on kon unsa kaimportante ang pagpahayag sa akong mga hunahuna ug mga pagbati. Akong gibati sa hilabihan gayud ang Espiritu Santo ug ang gugma sa atong Manluluwas, nga si Jesukristo.”
Ang pagpakig-uban sa ubang batan-ong mga Santos, miingon siya, milig-on sa iyang pagsalig. “Sa wala pa ang AKK dili nako makita ang maayo ug ang mga butang nga matahum nga gihimo sa Dios alang kanato ug ang mga plano nga Iya pang gipanghimo alang kanato.”
“Kinahanglan nga dili kita maapektuhan ni bisan kinsa o sa bisan unsa nga naa sa atong palibut nga mosulay sa pagbira kanato palayo sa pagsunod sa ebanghelyo, “ miingon si Manasseh A., 17. “Ang ebanghelyo parehas ra bisan asa ug kinahanglang magpabilin kita sa eksaktong dalan.”
Ug bisan gihimo man kini sa Gresya o sa bisan asang dapit sa kalibutan, ang pagtambayayong sa dalan magtugot kanato nga mahiusa sa espiritu.