Unsaon nimo sa pag-ila tali sa pagpadayag ug sa kaugalingon nimong mga hunahuna?
Imahe
woman reading book
Artwork ni Brian Kershisnik
Nagpuyo kita sa kalibutan nga anaa ang daghan kaayong oportunidad. Duna kitay kagawasan sa pagpili sa kaugalingon natong trabaho, eskwelahan, kapikas, kon asa kita gustong mopuyo, ug daghan pa. Tinuoray nga usa kini ka panalangin sa atong henerasyon. Apan sa laing bahin, nakadugang kini sa kalisud sa paghimo niini nga mga pagpili kay lisud ang paghimo og mga desisyon kon anaa ang daghang mga dalan ug mga oportunidad nga motultol ngadto sa maayong mga butang. Unsaon nato sa pagpili sa eksakto kon anaa ang daghang mga oportunidad nga maayo? Kon mobati ka nga nawala o nalibog niining unos sa mga desisyon, hibaloi nga ang Langitnong Amahan gustong mogiya kanimo. Pwede kang mopili sa eksakto nga dalan ug makadawat og mga tubag nga imong gipangita kon sundon nimo ang Iyang tingog. Ilha kon giunsa ka Niya sa pagpakigsulti, salig Kaniya, sunda ang propeta, pagmapailubon, pagmahimong mas positibo, ug pagbaton og pagtuo, ug sa katapusan matultulan ka sa eksaktong direksyon.
—Vira Vashchenko, Kyiv, Ukraine
Sa tibuok nakong kinabuhi akong nakita kon sa unsang paagi ako gigiyahan sa Ginoo, ug akong namatikdan nga ang tanan nga akong naabut tungod Kaniya ug sa Iyang giya. Bisan sa mga panahon nga magtuo ko nga ako nag-inusara, sa katapusan, Iyang ipahibalo kanako ug ipabati nga Siya anaa kanunay nakig-uban kanako. Mao nga mihimo ko sa desisyon nga kanunayng magpadayon sa unahan uban sa pagtuo, bisan og mobati ko nga ako nag-inusara. Alang nako, ang akong dalan dili klaro sa tanang panahon, ug dili nako makita sa kanunay unsay nagpaabut kanako sa unahan, apan kanunay kong motikang uban sa pagtuo, ug dayon magsugod ko sa pagkakita sa kahayag ug akong mamatikdan ang kamot sa Dios sa akong kinabuhi. Nasayud ako nga ang atong Langitnong Amahan ug Iyang Anak, si Jesukristo, nahigugma kanato ug nga Sila andam nga mogiya kanato, apan naglaum usab Sila nga mobutang kita sa atong pagtuo diha Kanila ug sa paglihok kon madawat nato ang mga pag-aghat gikan sa Espiritu.—
Indhira Mejia, Dominican Republic
Sa nagkahingkod ko, kinahanglan kong makakat-on sa pinulongan sa Espiritu. Ang Espiritu makigsulti kanako pinaagi sa yanong mga hunahuna. Nagbansay ko aron maanad niini, apan sa kasagaran ang Espiritu moabut kanako sa hilom nga mga dapit, sama sa sulod sa akong sakyanan samtang magbiyahe ko padulong sa trabaho. Nasayud akong dili kadto akong mga hunahuna tungod kay ang Espiritu sa kanunay mohatag kanako og kalit nga pag-aghat bisan wala ako maghunahuna mahitungod niana.
—Clarissa Mae Taylor, Utah, USA
Nagtuo ko nga ang pinakatalagsaong mga teknik nga kinahanglan natong ipahanas mao ang abilidad sa pag-ila sa malumong mga hagawhaw sa Espiritu Santo. Ang makugihong pagtuon sa kasulatan nagtulod kanako sa dugang pa nga pagpahanas niini. Kanunay kong mituo nga siya kinsa makugihong mangita makakaplag; ug ang mga misteryo sa Dios ipadayag diha sa iyang atubangan pinaagi sa gahum sa Espiritu Santo (tan-awa sa 1 Nephi 10:19). Sa laing pagkasulti, kon gusto nakong mamatikdan ang Espiritu, dili nako matugutan ang akong kaugalingon nga madala ngadto sa walay pulos nga mga paghunahuna o sa inadlawng mga kabalaka sa kinabuhi, apan hinoon isubsob nako ang akong kaugalingon ngadto sa trabaho ug kalimtan ang akong kaugalingon. Kana ang panahon nga mas makamatikod ko sa Espiritu tungod kay andam ako alang niini! Sa samang paagi nga ang barko dili makasayon-sayon og biyahe latas sa unos, dili kita makadungog sa Espiritu kon magpadala kita sa mga kabalaka sa kinabuhi nga dili nato makontrol.—
Emmanuel Borngreat Dogbey, Accra, Ghana
Imahe
couple
Sa among gamay nga pamilya, among mamatikdan ang Espiritu tungod sa kalinaw nga among mabati, ilabi na kanako ug sa akong bana isip magtiayon. Kon amoa ra kining kaugalingon nga mga hunahuna, dili gayud namo bation nga siguradong mao na gayud kana ang eksaktong buhaton—kanunay nga anaay nagpaluyo nga pagduha-duha og kahadlok. Apan kon pagpadayag kini, kanunay kaming mobati og kalinaw, bisan og sulayan namo sa pagpangatarungan ug ang mga panghitabo daw dili pa gayud kaayo namo masabtan sa sinugdanan. Kon sundon namo kini ug molampus niini, kanunay namong makita nga mahan-ay ra ang tanan. Mao kanang higayona nga magtinan-away kami ug moingon, “Ah, karon nakasabot na ta!”
—Maryana Wright, Utah, USA
Bisan og tanan kita makadawat og personal nga pagpadayag sa managlahing paagi, usa ka butang dili kaduha-duhaang tinuod: ang Dios sa kanunay makigsulti kanato. Nagkinahanglan lamang kita og kaandam nga mobutang sa atong paningkamot aron molambo ang atong abilidad sa pagmatikod ug pagkadungog sa Iyang tingog. Sama sa gitambag ni Presidente Russell M. Nelson: “Pag-ampo sa ngalan ni Jesukristo bahin sa inyong mga kabalaka, inyong mga kahadlok, inyong mga kahuyang—oo, [sa] mga tinguha sa inyong kasingkasing. Ug dayon maminaw! Isulat ang mga ideya nga mosulod sa inyong hunahuna. Isulat ang inyong mga gibati ug sundi kini sa paglihok sa unsay giaghat nga angay ninyong buhaton. Kon inyong balik-balikon kini nga proseso matag adlaw, matag bulan, matag tuig, kamo ‘molambo ngadto sa baruganan sa pagpadayag’” (“Pagpadayag alang sa Simbahan, Pagpadayag alang sa Atong mga Kinabuhi,” Liahona, May 2018, 95).