Usa ka Imbitasyon alang kang Ricardo

Imahe

stack of invitations

Paghulagway pinaagi ni Katy Dockrill

Kon makadungog ko mahitungod sa usa ka kalihokan sa Simbahan, kanunay kong magdapit og 10 ka tawo nga dili mga miyembro sa Simbahan para motambong. Nahimo na nako kini sulod sa mga katuigan. Maghimo ko og mga imbitasyon ug ibutang ang matag usa sa puti nga sobre ug mag-ampo alang sa Espiritu sa paggiya kanako. Dayon ipanghatag nako ang mga imbitasyon. Tagsa ra kaayo nga ang 10 motambong, apan bisan usa ra ang motambong, mobati ko nga malampuson.

Pipila ka tuig ang milabay, nag-andam ko og napulo ka imbitasyon ngadto sa usa ka fireside alang sa minyo nang mga magtiayon. Nahatag na nako ang siyam ngadto sa mga tawo sa trabahoan ug may usa nga nahibilin. Wala ko kahibalo kon kinsay akong tagaan. Mga minutos ang milabay, si Ricardo, nga usa ka representante sa pagpamaligya, miagi sa akong lamesa. Mibati ko og pag-aghat nga imbitahon siya, bisan og mibalibad na siya sa imbitasyon gikan sa kaubang trabahante sa pagtambong sa kalihokan sa iyang simbahan. Dili ko sigurado nga mainteresado si Ricardo.

Apan dihang miagi og balik si Ricardo sa dapit sa akong lamesa sa iyang paggawas, gibati na usab nako ang pag-aghat. Apan, dali kaayo siyang nakagawas nga wala na ko makahigayon sa pagpakigsulti niya. Nag-ampo ko nga mobalik si Ricardo kon angay nga ihatag nako ang imbitasyon.

Human sa akong pag-ampo, mibalik si Ricardo aron mangutana kanako. Pagkahuman, miingon ko, “Ricardo, ang akong simbahan dunay kalihokan alang sa minyo nga mga magtiayon. Mag-inambitay kami og mga kasinatian mahitungod sa kon unsaon sa pagpakabuhing malipayon matag adlaw. Pagkahuman, dunay sayaw-sayaw. Kon dapiton tika, moadto ka ba?”

“Siyempre!” Miingon si Ricardo, apan ang iyang tubag wala makakombinser kanako.

“Basta nabuhat na nako ang akong bahin,” naghunahuna ko.

Ang akong asawa ug ako nangabut sa kalihokan og sayo aron sa pag-abi-abi sa mga tawo inig abut nila. Sa kalit, nakita nako si Ricardo kauban sa iyang asawa, si Regina. Gipaila nako sila sa akong asawa ug sa ubang nga nanambong. Sa tibuok gabii, si Ricardo ug Regina daw nalingaw sa ilang mga kaugalingon. Nakalitan ko dihang miingon sila nga mosimba sila inig ka Dominggo aron makat-on pa og dugang.

Si Ricardo, Regina, ug ang ilang duha ka anak nakakat-on pa og daghan. Sa katapusan, nagpamiyembro sila sa Simbahan. Sa wala madugay, nasilyo sila sa templo. Kausa si Ricardo misulti nako nga siya ug ang iyang asawa naghisgot na mahitungod sa pagdiboryso, apan ang Ginoo mitultol ni Ricardo sa akong opisina.

Sukad niadto nangayo ko og pasaylo sa Dios sa paghunahuna nga si Ricardo dili modawat sa akong imbitasyon. Akong nakat-unan nga importante diay ang pag-imbitar sa tanan. Dili ka gayud makahibalo kinsay modawat.