ʻEletā Alan R. Walker
Fitungofulu Taki Māʻolunga
Kuo hoko ʻa e ako fekauʻaki mo e ngaahi tukufakaholo foʻoú ko ha fakamānako ki he moʻui ʻa ʻEletā ʻĀlani R. Uoká, ʻa ia ʻe hoko ʻo ʻaonga kiate ia ʻi hono uiuiʻi ke hoko ko e Fitungofulu Taki Māʻolungá.
Naʻe fāʻeleʻi ʻa ʻĀlani Loi Uoka ʻi Puenosi ʻAealesi, ʻĀsenitina kia Vikitā ʻAteliane Uoka mo Kilisitina ʻOfelia Sipalou Uoka ʻi he ʻaho 2 ʻo Sānuali, 1971, naʻá ne tupu hake ʻi ha ngaahi tapa kehekehe ʻo ʻAmelika Tokelau mo ʻAmelika Tonga.
ʻI he kamataʻanga ʻo ʻene moʻuí naʻá ne nofo ʻi ʻĀsenitina kimuʻa ia pea hiki hono fāmilí ki Positoni, Masasūseti, USA pea kimui ange ne nau hiki ki Mekisikou Siti, Mekisikou ke ngāue ʻene tamaí.
ʻOkú ne pehē, “Kuo hoko hono ako ʻo e lea faka-Pilitāniá ko ha tāpuaki kāfakafa ia.” Pea naʻe malava heʻene tupu hake ʻi he ongoongoleleí ke fakatupulaki ʻene fakamoʻoní mo teuteu kei siʻi ke ngāue fakafaifekau. Hili e ako taʻu taha ʻa ʻEletā Uoka ʻi he ʻUnivēsiti Pilikihami ʻIongí, naʻá ne ngāue fakafaifekau taimi kakato ʻi he Misiona Tennessee Nashville.
Ke tokoni ki he fakaakeake ʻene tamaí mei ha fakatamaki lahi, naʻe fakatoloi ai ʻe ʻEletā Uoka ʻa ʻene ngaahi palani ke toe foki ki he akó ʻi he hili ʻene ngāue fakafaifekaú ka ne foki ki ʻĀsenitina. Ko e taimi ia naʻá ne fetaulaki ai mo ʻIunisi Māsela Sulei ʻi ha hulohula ʻinisititiuti. Hili ha māhina ʻe valu mei ai, naʻá na mali ʻi he ʻaho 12 ʻo ʻAokosi, 1993 ʻi he Temipale Buenos Aires Argentina. ʻI he ʻaho hono hokó, naʻe hiki e ongomeʻa mali kei talavoú ki Polovo, ʻIutā, USA ʻa ia naʻe fakaʻosi ai ʻe ʻEletā Uoka ʻa hono mataʻitohi BA ʻi he ʻekonōmiká ʻi he 1996.
Naʻe ngāue ʻa ʻEletā Uoka ʻi ha taʻu ʻe tolu ko ha pule pangikē ʻi he Citibank, taʻu ʻe ono ko ha pule maʻá e Siasí ʻi he ʻĒlia Fakatonga ʻo ʻAmelika Tongá, taʻu ʻe 11 ʻi he ʻĒlia Mekisikoú, pea fakamuimui tahá naʻá ne hoko ko ha talēkita ki he ngaahi meʻa fakatuʻasinó ʻi he ʻĒlia Fakatonga ʻo ʻAmelika Tongá. ʻI he 2010, naʻe ui ʻa ʻEletā Uoka ke ne tokangaʻi ʻa e Misiona Monitelei Hahake ʻo Mekisikoú.
ʻOku fiefia ʻa e fāmili Uoká, fakataha mo hona ʻofefiné, ʻi he tokoni ki he niʻihi kehé, fefolauʻakí, mo e ako ke ʻiloʻi e ngaahi feituʻú mo e kakai foʻoú.
Kimuʻa pea uiuiʻi ʻa ʻEletā Uoka ke ne hoko ko ha Fitungofulu Taki Māʻolungá, naʻá ne ngāue ʻi ha ngaahi fatongia kehekehe he Siasí, ʻo kau ai ʻa ʻene hoko ko ha Fitungofulu Fakaʻēlia, tokoni ʻi ha kau palesitenisī fakasiteiki, aleaʻanga māʻolunga, pīsope, tokoni pīsopeliki, mo ha taki ngāue fakafaifekau fakauooti.