ʻEletā John A. McCune
Fitungofulu Taki Māʻolunga
ʻI he kamataʻanga e maʻuʻanga moʻui fakapisinisi ʻa ʻEletā Sione Makiuné, naʻá ne fepōtalanoaʻaki mo ʻene pule ngāué ʻa ia ne vave ai ʻene fakatokangaʻi naʻe ʻikai ke ʻilo lahi ʻa e tangatá ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻe ʻeke ange ʻe he pule ngāue ʻa ʻEletā Makiuné pe ko e hā hono ʻuhinga ʻoku ʻikai hulohula pe kai kūkisi ai e Kau Māʻoniʻoni ʻi he Ngaahi ʻAho Kimui ní.
Naʻe malimali ʻa ʻEletā Makiune mo milimili hono keté peá ne talaange ki heʻene pule ngāué, “ʻOku ʻilonga pē ʻeku kai kūkisí. Mahalo pē ʻokú ke fetoʻoaki kimautolu mo ha tokotaha kehe.”
Lolotonga ʻena talanoá, naʻe fakamaʻalaʻala ʻe ʻEletā Makiune ʻa e ngaahi fakakaukau hala fekauʻaki mo e Siasí. Naʻe fakatupu ʻe he talanoa ko iá ha ngaahi fepōtalanoaʻaki kehe fekauʻaki mo e ongoongolelei ʻo Sīsū Kalaisí pea naʻe fakapapauʻi ai kia ʻEletā Makiune ʻa e mahuʻinga ke mateuteu maʻu pē ke vahevahe ʻa e ongoongoleleí.
ʻOku pehē ʻe ʻEletā Makiune, “ʻOku tau hoko ko e kau ākonga ʻo e Fakamoʻui ko Sīsū Kalaisí, ʻi ha feituʻu pē ʻoku tau ʻi ai, ʻi ha faʻahinga tuʻunga, pea ʻi ha faʻahinga faingamālie pē. ʻOku tau maʻu ha ngaahi ngāue maʻuʻanga moʻui, ka ʻoku tau maʻu iá ke tokoni ki hotau fāmilí mo fokotuʻu kitautolu ʻi ha tūkunga ke tau vahevahe ʻa e ongoongoleleí. Ko hotau tefitoʻi fatongiá ia ʻi heʻetau hoko ko e kau ākonga ʻo Sīsū Kalaisí.”
Naʻe fāʻeleʻi ʻa Sione ʻĀlani Makiune ʻi Sanitā Kulusi, Kalefōnia, USA, ʻi he ʻaho 20 ʻo Sune, 1963 kia Kilifooti mo Soana Sikalati Makiune. Naʻe ohi hake ia ʻi Naisa, ʻOlikoni, USA.
Hili e ngāue fakafaifekau taimi kakato ʻa ʻEletā Makiune ʻi Fukuoka, Siapaní, naʻá ne mali mo Tēpola ʻEleni Kingisipuli ʻi he Temipale Salt Lake ʻi he 1984. ʻOkú na hoko ko ha ongomātuʻa ki ha fānau ʻe toko fā pea ʻokú na nofo ʻi Mitiuei, ʻIutā, USA.
Naʻe maʻu ʻe ʻEletā Makiune ha mataʻitohi BA ʻi he ngāue fakapaʻangá (finance) mei he ʻUnivēsiti Pilikihami ʻIongí pea mo ha mataʻitohi MA kimui ange ʻi he pisinisi ki he ngāue fakapaʻangá mei he ʻUnivēsiti ʻo Kalefōnia ʻi Losi ʻEniselesí (UCLA). Naʻá ne hoko ko e tokoni palesiteni māʻolunga mo e talēkita pule ki he Capital Investment Advisors mei he 1997 ki he 2012. Naʻá ne hoko leva ko e palesiteni ʻo e Misiona Utah Provo kimuʻa ia peá ne hoko ko e tokotaha fetuʻutaki ki he ngaahi meʻaʻofa tokoni mo e Ngaahi Kautaha Tokoni ʻOfa ʻa e Siasí
Naʻe hoko ʻa ʻEletā Makiune ko ha Fitungofulu Fakaʻēlia ʻi he taimi naʻe uiuiʻi foʻou ai iá. Kuó ne hoko foki ko ha palesiteni siteiki, pīsope, tokoni ʻi ha pīsopeliki mo ha kau palesitenisī fakakolo, pea mo ha palesiteni ʻi he kōlomu ʻo e kaumātuʻá.