ʻOku Hokohoko Atu ʻa e Ngāue Fakaetauhi ʻa Palesiteni Nalesoní

ʻĪmisi

Feʻiloaki ʻa Palesiteni mo Sisitā Nalesoni mo e fānaú

ʻI he hili pē ʻa e konifelenisi lahi ʻi ʻOkatopa 2018, naʻe folau ʻa Palesiteni Lāsolo M. Nalesoni ki Pelū, Polivia, Palakuai, ʻUlukuai, mo Silei, ʻa ia naʻá ne ʻaʻahi ai ki he kāingalotú mo e kau faifekaú pea fakahoko mo ha ngaahi fakataha lotu, ʻo kau ai ha fakataha lotu maʻá e toʻu tupú ʻi Silei ʻa ia naʻe kau atu ki ai ha toko 1,500 pea toe fakamafola ki hono kotoa ʻo e fonuá. Naʻá ne lea faka-Sipeini ki he kāingalotú, fakatapui e Temipale Silei Konisepisioné, pea fakataha mo e kau taki fakapuleʻanga fakalotofonuá.

Naʻe lauiafe e kakai fefine ne nau ʻomi ʻenau talí ʻi he mītia fakasōsialé ki he fakaafe ʻa Palesiteni Nalesoni ke nau lipooti ʻenau aʻusia ki he ngaahi pole ʻe fā naʻá ne ʻomi lolotonga e konifelenisi lahi ʻo ʻOkatopa 2018: (1) ʻaukai mei he mītia fakasōsialé mo e mītia koví ʻi ha ʻaho ʻe 10, (2) lau e Tohi ʻa Molomoná ke ʻosi ki he fakaʻosinga ʻo e 2018, (3) ʻalu maʻu pē ki he temipalé, pea mo e (4) kau kakato ki he Fineʻofá. “ʻOku ou fie fakamālō atu kiate kimoutolu kotoa ʻi hoʻomou tali ʻeku ngaahi fakaafé,” ko e lea ia ʻa Palesiteni Nalesoní ʻi heʻene fakahaaʻi ʻene ʻamanaki lelei “kuo hanga ʻe he ngaahi fakaafe ko ʻení ʻo ʻomi kimoutolu ke mou ofi ange ki he Fakamoʻuí.”

Naʻe tokangaʻi ʻe Palesiteni Nalesoni ʻa e ouau meʻa-fakaʻeiki ʻo hono ʻofefine ko Uenitī Nalesoni Makafilá, ʻa ia naʻá ne mālōlō hili ia haʻane fefaʻuhi loto-toʻa mo e kanisaá. Naʻá ne pehē, “ʻE liliu hotau loʻimata mamahí ki ha loʻimata ʻo e fakatuʻamelie ʻi heʻetau maʻu ha fakakaukau ʻoku taʻengatá.” Naʻá ne lea kau ki hono ʻofefiné lolotonga ha konifelenisi makehe maʻá e kāingalotu ʻo e Siteiki Seiko, Kalefōniá, ʻa ia ʻoku kau ki ai ha ongo ʻiuniti ʻe ua mei Palataisi, ʻa ia naʻe fakaʻauha ʻe he velá. Naʻá ne pehē, “Te ke ʻilo ʻoku faingataʻaʻia e tokotaha kotoa pē. Kapau ʻokú ke fakaʻamu ke ke ongoʻi fiemālie ange, fakangaloki koe ka ke tokoni ki ha tokotaha kehe.”

ʻI ʻAlesona, USA, naʻe fakaafeʻi ai ʻe Palesiteni Nalesoni ha kāingalotu ʻe toko 65,000 ne nau fakataha ki ha malaʻe vaʻinga faiʻanga sipoti “ke nau tokoni ki hono tānaki ʻo ʻIsileli ʻi he ongo tafaʻaki fakatouʻosi ʻo e veilí.” Naʻe tohi foki ʻe Palesiteni Nalesoni ha fakamatala makehe ne paaki ʻi he nusipepa Arizona Republic ʻa ia ne fakalotolahi ai ki he kakaí ke nau “sio ki he [ʻEikí] pea fokotuʻu Ia ke hoko ko e ʻelito [ʻenau] moʻuí.” Naʻá ne kau ki ha ʻinitaviu naʻe fakamafola ʻi he ngaahi kautaha televīsone ʻo e vahefonuá; fakahoko ha ngaahi maʻu meʻatokoni fakafiefia mo e kau taki fakapuleʻangá, fakaakó mo e tui fakalotú; pea fakahoko ha polokalama tali-fehuʻi mo e kau taautaha kei talavoú.

Talu mei hono fakanofo ʻo Palesiteni Nalesoni ʻi he ʻaho 14 ʻo Sānuali, 2018, kuó ne folau ʻi ha maile ʻe 55,000 (88,515 km) ke ʻaʻahi ki ha ngaahi konitinēniti ʻe 5, tukui fonua mo e vahefonua ʻe 16, mo e tukui kolo ʻe 24.