ʻEletā Jorge M. Alvarado
Fitungofulu Taki Māʻolunga
Naʻe kau ʻa Mikaeli mo ʻAlisi ʻAlavalato ki he Siasí ʻi Pueto Liko ʻi he 1977 he taimi naʻe kei taʻu ono ai ʻa hona foha ko Siaosí. Naʻe papitaiso ʻa Siaosi hili ha taʻu ʻe ua mei ai pea naʻe ʻikai ke ne teitei liʻaki lotu he Sāpaté.
ʻOku pehē ʻe he Fitungofulu Taki Māʻolunga ne toki uiuiʻi foʻoú, “Ka naʻe hoko hoku fakauluí ʻi hoku taʻu 16.”
ʻI he ako māʻolungá, naʻá ne hoko ko ha palesiteni ki heʻene kalasi seminelí ʻi hono kolo tupuʻanga ko Pōniseé. Naʻe ako ʻe he kau akó ʻa e Tohi ʻa Molomoná he taʻu ko iá. Naʻe hoko hono fatongia foʻoú ko hano siviʻiʻanga.
“Naʻe pau ke u ʻeke loto, ‘ʻOku ou ʻiloʻi moʻoni nai ʻoku moʻoni ʻa e Tohi ʻa Molomoná?’ Te u hoko fēfē nai ko e palesiteni ki heʻeku kalasi seminelí kapau ʻoku ʻikai ke u teitei ʻiloʻi pe naʻe moʻoni nai e tohi ko iá?”
Naʻá ne toʻo hake ʻene Tohi ʻa Molomoná pea ko e fuofua taimi ia ke ne kamata lau fakamātoato ai iá.
Naʻá ne pehē, “Naʻá ku tuʻulutui peá u lotu, pea ne u ʻiloʻi leva naʻe moʻoni ia.”
ʻOku kei hoko pē ʻa e Tohi ʻa Molomoná ko ha tākiekina mahuʻinga ʻi he moʻui ʻa ʻEletā ʻAlavalató.
Lolotonga ʻene ngāue fakafaifekau taimi kakato ʻi he Misiona Folōlita Tamipaá, naʻá ne vahevahe ʻa e Tohi ʻa Molomoná ki he tokotaha kotoa pē naʻá ne akoʻí. Naʻá ne ako kimui ange mo hono uaifí mo ʻena fānau ʻe toko tolú ʻa e tohí. ʻI heʻene hoko ko e palesiteni ki he Misiona Puerto Rico San Juan, naʻá ne poleʻi ʻene kau faifekaú ke nau ʻofa mo vahevahe e Tohi ʻa Molomoná.
ʻI he hoko ʻa ʻEletā ʻAlavalato he taimí ni ko ha Fitungofulu Taki Māʻolungá, ʻokú ne kei vēkeveke pē ke fakaafeʻi e niʻihi kehé ke nau fekumi ki he ngaahi moʻoni liliu moʻui ʻo e Tohi ʻa Molomoná.
Naʻe fāʻeleʻi ʻa Siaosi Mikaeli ʻAlavalato Paso ʻi he ʻaho 21 ʻo Nōvema, 1970. ʻI he ʻaho 19 ʻo Tīsema, 1992, naʻá ne mali ai mo Kali Lu Liosi ʻi he Temipale Washington D.C.
Hili ʻene ako fekauʻaki mo e pule fakapisinisí ʻi he ʻUnivēsiti ʻo Pueto Likó, naʻá ne ngāue ʻi ha ngaahi lakanga kehekehe ʻo e pule fakapisinisí ʻi Pueto Liko mo e ʻIunaiteti Siteití. Kimuí ni mai, naʻá ne ngāue ʻi he ʻuluʻi ʻōfisi ʻo e Siasí ʻi Sōleiki Sití ko ha pule fakavahaʻapuleʻanga ki he Moʻui Fakafalala Pē Kiate Kitá.
Kuo hoko ʻa ʻEletā ʻAlavalato ko ha Fitungofulu Fakaʻēlia, palesiteni siteiki, aleaʻanga māʻolunga, palesiteni fakakolo, mo ha taki ngāue fakafaifekau fakauooti.