Gusto Ko nga Makita ang Templo

Minahal kong kaigsoonan, mapasalamaton ko nga ikauban kamo niining una nga sesyon sa kinatibuk-ang komperensiya. Ang mga mamumulong, ang musika, ug ang pag-ampo nagdala sa Espiritu––ingon man sa pagbati og kahayag ug paglaom.

Kana nga pagbati nakapabalik sa akong panumdoman sa unang adlaw nakong pagsulod sa Templo sa Salt Lake. Batan-on pa ako niadto. Ang akong mga ginikanan mao lamang ang akong mga kauban niadtong adlawa. Sa sulod, mihunong sila kadiyot aron maabi-abi sa usa ka worker sa templo. Milakaw ko og una nila, nag-inusara og kadiyot.

Gitimbaya ko sa usa ka gamayng babaye nga puti og buhok nagsul-ob og nindot nga puting sinina sa templo. Mihangad siya kanako ug mipahiyom ug dayon miingon sa hinayng tingog, “Welcome sa templo, Brother Eyring.” Nakahunahuna ko sa makadiyot nga siya usa ka anghel tungod kay nakaila siya sa akong ngalan. Wala ko makamatikod nga diha sa usa ka gamayng kard nakabutang ang akong ngalan ubos sa piniloan sa kwelyo sa akong amerikana.

Milakaw ko saylo kaniya ug mihunong. Mihangad ko sa taas nga puting kisami nga maoy nakapahayag kaayo sa lawak nga daw mura og abli nga makita ang panganod. Ug diha nianang higayona, misantop sa akong hunahuna kining klaro nga mga pulong: “Nakaanhi nako niining hayag nga dapit kaniadto.” Apan diha-diha dayon dunay misantop sa akong hunahuna, dili sa akong kaugalingon nga tingog, kini nga mga pulong: “Wala, wala ka pa makaanhi dinhi kaniadto. Nahinumduman nimo ang usa ka higayon sa wala ka pa matawo. Didto ka sa usa ka sagradong dapit nga sama niini.”

Sa gawas sa atong mga templo, atong gibutang ang mga pulong “Pagkabalaan ngadto sa Ginoo.” Ako sa akong kaugalingon nasayod nga kini nga mga pulong tinuod. Ang templo usa ka balaan nga dapit diin ang pagpadayag sayon nga moabot kanato kon ang atong mga kasingkasing bukas ug kita takos niini.

Sa ulahing bahin nianang unang adlaw nabati na usab nako ang samang Espiritu. Ang seremonya sa templo naglakip og pipila ka pulong nga nagdala og init nga pagbati sa akong kasingkasing, nagpanghimatuod nga unsay gipakita tinuod. Unsay akong gibati personal ngari kanako bahin sa akong kaugmaon, ug kini nahimong tinuod paglabay sa 40 ka tuig pinaagi sa tawag sa pagserbisyo gikan sa Ginoo.

Akong nasinati ang samang pagbati sa dihang gikasal ko sa Templo sa Logan Utah. Si Presidente Spencer W. Kimball ang mipahigayon sa pagsilyo. Sa pipila ka pulong nga iyang gisulti, siya mihatag niining tambag: “Hal ug Kathy, pagpakabuhi nga kon moabot na ang tawag, sayon ra kamong makabiya.”

Samtang gisulti niya kadtong mga pulong, tataw nakong nakita sa akong hunahuna, sa tin-aw nga kolor, ang usa ka tungason nga bungtod ug usa ka dalan padulong sa ibabaw. Usa ka puti nga koral diha sa walang bahin sa dalan ug nawala ngadto sa naglinya nga mga punoan sa kahoy sa ibabaw sa bungtod. Usa ka puting balay ang dili hapit makita sa kakahoyan.

Usa ka tuig ang milabay, akong namay-ongan kadtong bungtod samtang ang akong ugangan nga lalaki midrayb namo didto niadto nga dalan. Sama kadto sa detalye sa unsay akong nakita sa dihang si Presidente Kimball mihatag sa iyang tambag didto sa templo.

Sa dihang miabot mi sa ibabaw sa bungtod, ang akong ugangang lalaki mihunong sa puti nga balay. Siya misulti kanamo nga siya ug ang iyang asawa mopalit sa propyedad ug gusto niya nga ang iyang anak ug ako ang mopuyo sa balay alang sa mga bisita. Sila magpuyo sa dakong balay, mga pila lang ka pye ang gilay-on. Mao nga, sulod sa 10 ka tuig nga kami nagpuyo niadtong matahom nga pagpuyo sa pamilya, ang akong asawa ug ako hapit kada adlaw moingon, “Kinahanglan ato kining tagamtamon nga pag-ayo tungod kay dili kita magdugay dinhi.”

Usa ka tawag miabot gikan sa komisyoner sa edukasyon sa Simbahan, si Neal A. Maxwell. Ang pahimangno nga gihatag ni Presidente Kimball nga aron “sayon ra nga makabiya” natinuod. Usa kadto ka tawag sa pagbiya sa daw usa ka malipayon kaayo nga kahimtang sa pamilya aron sa pagserbisyo sa usa ka buluhaton ngadto sa dapit nga wala koy nahibaloan. Ang among pamilya andam sa pagbiya niadtong bulahan nga panahon ug dapit tungod ang usa ka propeta, diha sa balaan nga templo, usa ka dapit sa pagpadayag, nakakita og usa ka umaabot nga panghitabo diin kami niana nga higayon giandam.

Ako nasayod nga ang mga templo sa Ginoo balaan nga mga dapit. Ang akong katuyoan karon sa pakigpulong bahin sa mga templo mao ang pagpadako sa inyo ug akong tinguha nga mahimong takos ug andam sa dugang nga mga oportunidad alang sa mga kasinatian sa templo nga umaabot alang kanato.

Alang kanako, ang labing makapadasig nga mahimong takos sa mga kasinatian sa templo mao ang unsay gisulti sa Ginoo bahin sa Iyang balaan nga mga balay:

“Ug kon ang akong mga katawhan motukod og usa ka balay ngari kanako sa ngalan sa Ginoo, ug dili motugot sa bisan unsa nga mahugaw nga butang nga mosulod ngadto niini, aron kini dili mahugawan, ang akong himaya mopahulay diha niini;

“Oo, ug ang akong pagtambong anaa diha, kay Ako mosulod ngadto niini, ug ang tanan nga putli og kasingkasing nga mosulod ngadto niini makakita sa Dios.

“Apan kon kini mahugawan Ako dili mosulod ngadto niini, ug ang akong himaya wala diha; kay Ako dili mosulod nganha sa mga templo nga dili balaan.”¹

Si Presidente Russell M. Nelson miklaro alang kanato nga kita “makakita” sa Manluluwas diha sa templo sa pamaagi nga Siya ato nang mailhan. Si Presidente Nelson miingon niini: “Kita makasabot Kaniya. Atong masabtan ang Iyang buhat ug ang Iyang himaya. Ug kita magsugod sa pagbati sa walay kinutobang epekto sa Iyang dili hitupngan nga kinabuhi.”²

Kon ako o ikaw kinahanglang moadto sa templo nga kulang ang kaputli, dili nato makita, pinaagi sa gahom sa Espiritu Santo, ang espiritwal nga pagtulun-an bahin sa Manluluwas nga atong mahimong madawat sa templo.

Kon kita takos nga makadawat sa maong pagtulun-an, adunay molambo pinaagi sa atong kasinatian sa templo nga paglaom, hingpit nga kalipay, ug positibo nga panglantaw sa tibuok natong kinabuhi. Kana nga paglaom, hingpit nga kalipay ug positibo nga panglantaw anaa lamang pinaagi sa pagdawat sa mga ordinansa nga ipahigayon sa balaan nga mga templo. Diha kana sa templo nato madawat ang kasigurohan sa mahigugmaong mga koneksyon sa pamilya nga magpadayon human sa kamatayon ug molungtad sa kahangturan.

Daghang katuigan nang milabay, samtang nagserbisyo ako isip usa ka bishop, usa ka batan-ong lalaki ang nagdumili sa akong imbitasyon nga mamahimong takos nga magpakabuhi uban sa Dios diha sa mahangturong mga pamilya. Sa hinambog nga paagi misugilon siya kanako sa mga nindot nga mga panahon uban sa iyang mga higala. Ako siyang gitugotan nga moistorya. Dayon iya kong giistoryahan bahin sa usa ka higayon atol sa usa sa iyang mga party, taliwala sa kaalingog-ngog, sa dihang siya sa kalit lang nakaamgo nga siya mibati nga nag-inusara. Nangutana ko kaniya kon unsay nahitabo. Siya miingon nga nahinumdoman niya ang usa ka higayon isip usa ka gamay nga bata, gisabak sa iyang mama, nga ang iyang mga bukton naggakos kaniya. Nianang higayona samtang siya nag-istorya, luhaan iyang mata. Ako misulti kaniya unsa ang akong nahibaloan nga tinuod: “Ang nag-inusara nga paagi nga makaangkon sa pagbati niana nga paggakos sa pamilya sa kahangturan mao ang pagkahimo sa imong kaugalingon nga takos ug motabang sa uban nga makadawat sa mga ordinansa sa pagsilyo sa templo.”

Wala kita mahibalo sa mga detalye sa mga koneksyon sa pamilya sa kalibotan sa espiritu o unsay moabot human kita mabanhaw. Apan kita nahibalo nga ang propeta nga si Elias mianhi sama sa gisaad aron sa pagpabalik sa mga kasingkasing sa mga amahan ngadto sa mga anak ug ang mga anak ngadto sa mga amahan.³ Ug kita nasayod nga ang atong mahangturong kalipay mag-agad sa atong paghimo sa labing maayo aron sa pagtanyag sa samang mahangturong kalipay ngadto sa labing daghan sa atong mga kaliwatan kutob sa atong mahimo.

Ako mibati sa samang tinguha nga molampos sa pagdapit sa buhi nga mga sakop sa pamilya nga magtinguha nga mahimong takos sa pagdawat ug sa pagtuman sa mga ordinansa sa pagsilyo sa templo. Kabahin kini sa gipanaad nga pagpundok sa Israel sa kataposang mga adlaw sa duha ka habig sa tabil.

Usa sa atong labing dako nga mga oportunidad anaa kon ang atong mga sakop sa pamilya bata pa. Sila natawo nga adunay Kahayag ni Kristo isip usa ka gasa. Kini makapahimo kanila nga makabantay unsay maayo ug unsay dautan. Tungod niana nga rason, bisan ang pagkakita og templo o usa ka litrato sa usa ka templo makapalambo diha sa usa ka bata og usa ka tinguha nga mahimong takos ug mahatagan og pribilihiyo nga ugma damlag makasulod.

Ang adlaw dayon moabot sa dihang, isip usa ka batan-on, sila makadawat og rekomend sa templo aron sa pagpahigayon og puli nga mga pagbunyag diha sa templo. Niana nga kasinatian, ang ilang pagbati motubo nga ang mga ordinansa sa templo kanunay nga nagpunting ngadto sa Manluluwas ug sa Iyang Pag-ula. Samtang ilang mabati nga sila nagtanyag sa usa ka tawo sa kalibotan sa espiritu sa kahigayonan nga malimpyohan sa sala, ang ilang pagbati motubo sa pagtabang sa Manluluwas sa Iyang sagrado nga buhat sa pagpanalangin sa usa ka anak sa atong Langitnong Amahan.

Akong nakita ang gahom niana nga kasinatian nga nakapausab sa kinabuhi sa usa ka batan-on. Katuigan na ang milabay mikuyog ko sa usa nako ka anak nga babaye ngadto sa templo nga hapon na kaayo. Siya ang katapusan nga miserbisyo isip puli nga bunyagan diha sa baptistry. Ang akong anak nga babaye gipangutana kon makapabilin pa ba siya og dugay-dugay aron sa pagkompleto sa mga ordinansa alang sa tanang mga tawo kansang mga ngalan giandam na. Miingon siya og oo.

Nagtan-aw ko samtang ang akong anak nga babaye miubog ngadto sa baptismal font. Ang mga pagbunyag nagsugod. Ang tubig midagayday sa nawong sa akong gamayng anak nga babaye sa matag higayon nga siya gihaw-as sa tubig. Siya gipangutana og balik-balik, “Makahimo ka pa og dugang?” Sa matag higayon siya miingon og oo.

Isip nabalaka nga amahan, ako nagsugod sa panghinaot nga siya makalingkawas na sa pagbuhat og dugang pa. Apan ako pang mahinumdoman ang iyang kamalahutayon sa dihang siya gipangutana kon makahimo pa ba siya og dugang ug siya miingon sa determinadong hinay nga tingog, “Oo.” Siya nagpabilin hangtod nga ang katapusang tawo sa lista nianang adlawa nakadawat sa panalangin sa pagbunyag sa ngalan ni Jesukristo.

Sa dihang migawas na ako sa templo uban kaniya niadtong gabhiona, ako nahingangha sa unsay akong nakita. Usa ka bata nga gibayaw ug nausab atubangan sa akong mga mata pinaagi sa pagserbisyo sa Ginoo diha sa Iyang balay. Ako pang mahinumdoman ang pagbati sa kahayag ug kalinaw samtang nagdungan kami og lakaw gikan sa templo.

Katuigan na ang milabay. Siya miingon gihapon og oo sa pangutana gikan sa Ginoo kon siya mobuhat ba og dugang alang Kaniya kon kini lisod kaayo. Mao kini ang mabuhat sa pagserbisyo sa templo aron sa pag-usab ug pagbayaw kanato. Mao nga ang akong panghinaut alang kaninyo ug alang sa tanan ninyong pinalangga nga pamilya nga kamo mopalambo sa tinguha ug determinasyon nga mahimong takos sa pag-adto ngadto sa balay sa Ginoo kutob sa itugot sa inyong mga sirkumstansiya.

Siya gusto nga mohangop kaninyo didto. Ako nag-ampo nga kamo maningkamot sa pagpalig-on sa tinguha diha sa mga kasingkasing sa mga anak sa Langitnong Amahan nga moadto didto, diin sila mobati nga duol Kaniya, ug inyo usab nga madapit ang inyong mga katigulangan nga makig-uban Kaniya ug kaninyo hangtod sa kahangturan.

Kini nga mga pulong mahimong atong bation:

Ako mohatag sa akong pagpamatuod nga kita mga anak sa mahigugmaon nga Langitnong Amahan. Siya mipili sa Iyang Hinigugmang Anak, si Jesukristo, nga mahimo natong Manluluwas ug Manunubos. Ang bugtong paagi sa pagbalik og puyo uban Kanila ug uban sa atong pamilya mao ang pinaagi sa mga ordinansa sa balaan nga templo. Ako nagpamatuod nga si Presidente Russell M. Nelson naghupot ug naggamit sa tanang yawe sa pagkapari nga makahimo sa kinabuhing dayon nga posible alang sa tanang mga anak sa Dios. Sa ingon ako mopamatuod pinaagi sa sagradong ngalan ni Jesukristo, amen.