Ang Personal nga Panaw sa usa ka Anak sa Dios
Isip mga anak sa pakigsaad sa Dios, kita mohigugma, motahod, moalima, manalipod, ug mohangop nianang mga espiritu nga nagagikan sa kinabuhi sa wala pa dinhi sa kalibotan.
Ang matag usa kanato naapektohan sa tibuok kalibotan nga pandemya, samtang ang pamilya ug mga higala wala damha nga mipanaw latas sa mortalidad. Tugoti ko nga mohisgot og tulo nga atong gihandom sa dakong pagmahal, nagrepresentar niadtong atong gimahal pag-ayo.
Kini si Brother Philippe ug Sister Germaine Nsondi. Si Brother Nsondi nagserbisyo isip nga patriarka sa Brazzaville Republic of Congo Stake dihang siya namatay. Usa siya ka doktor sa pagpanambal kinsa mipakigbahin sa iyang mga talento sa buhong nga paagi ngadto sa uban.1
Kini mao si Sister Clara Ruano de Villareal taga Tulcán, Ecuador. Siya midawat sa gipahiuli nga ebanghelyo sa edad nga 34 ug usa siya ka minahal nga lider. Ang iyang pamilya nanamilit nga nagkanta sa iyang paborito nga himno, “Buhi ang Manunubos Ko, Niini Nasay[o]d Ako.”2
Kini si Brother Ray Tuineau taga Utah, uban sa iyang matahom nga pamilya. Ang iyang asawa, si Juliet, miingon, “Gusto nako ang [akong mga anak nga lalaki] nga [makahinumdom nga ang ilang papa] kanunay nga naningkamot nga unahon ang Dios.”3
Ang Ginoo miingon, “Kamo magpuyo nga maghiusa sa gugma, sa ingon nga kamo magbakho tungod sa pagkawala kanila nga namatay.”4
Samtang kita nagbakho, kita usab nagmaya sa mahimayaong Pagkabanhaw sa atong Manluluwas. Tungod Kaniya, ang atong mga minahal ug mga higala magpadayon sa ilang mahangtorong panaw. Sa gipasabot ni Presidente Joseph F. Smith: “Kita dili makalimot kanila; kita dili mohunong sa paghigugma kanila. … Sila nag-una; kita nagpadayon; kita nagtubo sama nga sila mitubo.”5 Si Presidente Russell M. Nelson miingon, “Ang atong mga luha sa kaguol … mahimong mga luha sa mahinamon nga pagpaabot.”6
Kita Nahibalo mahitungod sa Kinabuhi sa dili pa Matawo
Ang atong mahangturong panglantaw dili lamang makapadako sa atong pagsabot niadtong kinsa nagpadayon sa ilang panaw latas sa mortalidad apan usab moabli sa atong pagsabot niadtong bag-ohay pa lang sa ilang panaw ug karon pa lang nagsugod sa mortalidad.
Ang matag tawo kinsa moanhi sa kalibotan usa ka talagsaong anak sa Dios.7 Ang atong personal nga panaw wala magsugod diha sa pagkahimugso. Sa wala pa kita matawo, nag-uban kita didto sa usa ka kalibotan sa pagpangandam diin kita “midawat sa [atong] unang mga leksyon didto sa kalib[o]tan sa mga espiritu.”8 Si Jehova misulti kang Jeremias, “Sa wala ko pa ikaw buhata diha sa tagoangkan sa imong inahan ug sa wala pa ikaw matawo, gigahin ko na ikaw alang sa usa ka balaan nga katuyoan.”9
Ang uban tingali mangutana kon ang kinabuhi magsugod ba, diha sa pagkaporma sa usa ka binhi, dihang ang kasingkasing magsugod sa pagpitik, o sa dihang ang bata mahimo nang mabuhi sa gawas sa tagoangkan, apan alang kanato, walay pagduda nga ang espiritu nga mga anak sa Dios nga babaye ug lalaki anaa sa ilang tinagsa nga mga panaw paingon sa yuta aron makadawat og usa ka lawas ug makasinati sa mortalidad.
Isip mga anak sa pakigsaad sa Dios, kita mohigugma, motahod, moalima, manalipod, ug mohangop nianang mga espiritu nga nagagikan sa kinabuhi sa wala pa dinhi sa kalibotan.
Ang Talagsaon nga Kontribusyon sa Kababayen-an
Alang sa usa ka babaye, ang pagpanganak mahimong usa ka dakong sakripisyo sa pisikal, emosyonal, ug sa pang-ekonomiya nga paagi. Gihigugma ug gitahod nato ang talagsaong mga babaye niini nga Simbahan. Gamit ang pangutok, ug kaalam, kamo nagpas-an sa mga palas-anon sa inyong pamilya. Kamo naghigugma. Kamo nagserbisyo. Kamo nagsakripisyo. Kamo nagpalig-on sa pagtuo, nangalagad niadtong kinsa nanginahanglan, ug dako kaayo og natampo sa katilingban.
Ang Sagradong nga Responsibilidad sa Pag-amping sa Kinabuhi
Daghang katuigan na ang milabay, mibati og bug-at nga kabalaka sa daghang mga aborsiyon sa kalibotan, si Presidente Gordon B. Hinckley namulong ngadto sa mga kababayen-an sa Simbahan gamit ang mga pulong nga may kalabotan kanato karon. Siya miingon: “Kamo nga mga asawa ug mga inahan mao ang mga kalig-onan sa pamilya. Kamo ang tigpanamkon. Pagkadako ug pagkasagrado niana nga responsibilidad. … Unsa ang nahitabo sa atong pagkamapasalamaton sa kabalaan sa tawhanong kinabuhi? Ang aborsiyon dautan, madagmalon ug tinuod nga law-ay nga buhat, nga mikatap sa tibuok yuta. Mohangyo ko sa kababayen-an niini nga Simbahan sa pagsalikway niini, sa paglikay niini, ug sa pagpalayo gikan sa makakompromiso nga mga sitwasyon nga mohimo niini nga madanihon. Tingali adunay pipila lamang ka mga sitwasyon diin kini mahimong mahitabo, apan limitado kaayo kini.10 … Kamo ang mga inahan sa mga anak sa Dios nga mga lalaki ug mga babaye, kinsang mga kinabuhi sagrado. Ang pagpanalipod kanila usa ka balaanon nga responsibilidad nga dili mabaliwala.”11
Si Elder Marcus B. Nash mipakigbahin kanako sa istorya sa usa ka minahal nga 84 anyos nga babaye kinsa, atol sa iyang interbyu sa bunyag, “miangkon nga nakahimo og aborsiyon [sa milabayng katuigan].” Sa kinasingkasing nga emosyon, siya miingon: “akong gipas-an ang kabug-at sa pagpalaglag og bata sa matag adlaw sa akong kinabuhi sulod sa kwarenta y sayis ka tuig. … Walay butang nga akong gihimo nga nakapawala sa kasakit ug pagkakonsensya. Nawad-an ko sa paglaom hangtod nga natudloan ko sa tinuod nga ebanghelyo ni Jesukristo. Nakakat-on ko kon unsaon sa paghinulsol … ug sa kalit lang napuno ko sa paglaom. Sa kataposan nakat-on ko nga mahimo kong mapasaylo kon tinud-anay ko nga maghinulsol sa akong mga sala.”12
Mapasalamaton kaayo kita sa balaanon nga mga gasa sa paghinulsol ug kapasayloan.
Unsa ang Atong Mabuhat?
Unsa ang atong responsibilidad isip malinawon nga mga disipolo ni Jesukristo? Sundon nato ang mga sugo sa Dios, itudlo nato kini sa atong mga anak, ug ipakigbahin nato kini ngadto sa uban kinsa andam nga maminaw.13 Ipakigbahin nato ang atong lawom nga mga pagbati kabahin sa pagkabalaan sa kinabuhi ngadto niadtong kinsa mohimo og mga desisyon sa katilingban. Tingali dili kaayo sila makadayeg kon unsa ang atong gituohan, apan mag-ampo kita nga sila mas makasabot pag-ayo ngano nga, alang kanato, kini nga mga desisyon mahimong makaayo pa kay sa unsa ang gusto sa usa ka tawo alang sa iyang kaugalingong kinabuhi.
Kon gipanamkon ang usa ka bata nga wala damha, ipakita nato ang gugma, pagdasig, ug, kon gikinahanglan, pinansyal nga tabang, sa pagpalig-on sa usa ka inahan nga tugotan ang bata nga matawo ug magpadayon sa iyang panaw dinhi sa mortalidad.14
Ang Kaanindot sa Pagsagop
Sa among pamilya, dako kaayo ang among panalangin nga sa duha ka dekada ang milabay, usa ka 16 anyos nga batan-on nahibalo nga siya nagsabak. Siya ug ang amahan sa bata wala maminyo, ug nakita nila nga walay purohan nga magpadayon sa panag-uban. Ang batan-ong babaye nagtuo nga ang kinabuhi nga iyang gidala bililhon. Nanganak siya og usa ka batang babaye ug mitugot sa usa ka matarong nga pamilya sa pagsagop kaniya isip ilang kaugalingon. Alang ni Bryce ug ni Jolinne, siya usa ka tubag sa ilang mga pag-ampo. Ginganglan nila siya og Emily ug gitudloan siya nga mosalig sa iyang Langitnong Amahan ug sa Iyang Anak, si Jesukristo.
Si Emily midako. Malipayon kaayo kami nga si Emily ug ang among apo nga lalaki, si Christian, nagkahigugmaay ug naminyo sulod sa balay sa Ginoo. Si Emily ug si Christian karon adunay ilang kaugalingong gamayng anak nga babaye.
Si Emily bag-ohayng misulat: “Sa tibuok siyam ka mga bulan nga pagmabdos, aduna koy higayon sa pagpamalandong sa mga hitabo [sa] akong kaugalingong pagkahimugso. Akong gihunahuna ang akong tinuod nga inahan, kinsa 16 anyos pa lang. Samtang akong nasinati ang mga pagsakit ug mga kausaban nga dala sa pagmabdos, wala nako mapugngi ang paghanduraw kon unsa kadto kalisod sa linghod nga edad nga 16. … Ang mga luha motulo gani hangtod karon samtang maghunahuna ko sa akong tinuod nga inahan, kinsa nasayod nga dili niya mahatag ang kinabuhi [nga gitinguha niya alang kanako ug sa walay pagtagad sa iyang kaugalingon mipahiluna] kanako alang sa pagsagop. Dili nako matugkad kon unsa kaha ang iyang gisinati nga mga kalisod niadtong siyam ka mga bulan—nga gitan-aw sa mahusgahon nga mga mata samtang ang iyang lawas nausab, ang mga kasinatian sa kabatan-on iya pa gayod nga nalabyan, nasayod sa kataposan niining paghago sa inahanon nga pagmahal, nga iyang ihatag ang iyang anak ngadto sa laing mga kamot. Malipayon kaayo ko sa iyang pagpili nga wala ra niya gihunahuna ang iyahang kaugalingon, nga wala niya gamita ang iyang kaugalingong kabubut-on sa paagi nga di ko mahimugso og mahikawan ako sa akong kaugalingong pagpili.” Si Emily mitapos, “Mapasalamaton kaayo ko sa balaang plano sa Langitnong Amahan, sa akong talagsaong mga ginikanan kinsa [nagmahal ug nagpangga] kanako, ug sa mga templo diin kita mahimong mabugkos sa atong mga pamilya sa kahangtoran.”15
Ang Manluluwas “[mikuha sa] usa ka bata ug gipatindog sa ilang atubangan. Giagbayan niya ang bata ug miingon siya kanila, Ang modawat sa usa ka bata nga sama [niini] tungod kanako, modawat usab kanako.”16
Kon ang Matarong nga mga Tinguha Wala pa Matuman
Akong ipadayag ang akong gugma ug kalooy sa matarong nga managtiayon kinsa nagminyo ug wala makabaton og anak nga mahinamon nilang gipaabot ug niadtong kababayen-an ug kalalakin-an kinsa walay kahigayonan nga maminyo sumala sa balaod sa Dios. Ang wala matuman nga mga damgo sa kinabuhi lisod sabton kon lantawon lamang gikan sa panglantaw sa mortalidad. Isip sulugoon sa Ginoo, ako mosaad kaninyo nga samtang kamo magmatinud-anon ngadto ni Jesukristo ug sa inyong mga pakigsaad, kamo makadawat sa bayad nga mga panalangin niini nga kinabuhi ug sa inyong matarong nga mga tinguha niining mahangturon nga latid sa panahon sa Ginoo.17 Mahimong adunay kalipay diha sa panaw sa mortalidad bisan kon ang atong tanang matarong nga mga gilaoman wala matuman.18
Human sa pagkahimugso, ang mga bata padayon nga magkinahanglan sa atong tabang. Ang uban labing nanginahanglan niini. Matag tuig pinaagi sa mapinanggaong mga bishop ug sa inyong buhong nga mga kontribusyon sa halad sa puasa ug makitawhanon nga mga pundo, ang mga kinabuhi sa minilyon nga mga bata napalanginan. Ang Unang Kapangulohan bag-ohay lang mipahibalo sa dugang nga 20 milyones ka dolyar nga gitabang sa UNICEF sa ilang tibuok kalibotan nga mga paningkamot sa paghatag og duha ka bilyones nga mga bakuna.19 Ang kabataan gihigugma sa Dios.
Ang Sagradong Desisyon nga Makabaton og Anak
Makabalaka nga bisan sa ubang malamboon nga mga nasod sa kalibotan, nagkadyutay ang mga bata nga natawo.20 “Ang sugo sa Dios alang sa Iyang mga anak sa pagdaghan ug pagpuno sa yuta nagpabilin nga ipatuman.”21 Kon kanus-a gustong magkaanak ug pila kabuok anak mga pribado nga desisyon nga himoon tali sa bana ug asawa ug sa Ginoo. Uban sa pagtuo ug pag-ampo, kining sagrado nga desisyon mahimong usa ka maanindot, makahatag og pagpadayag nga mga kasinatian.22
Akong ipakigbahin ang istorya kabahin sa pamilyang Laing sa Habagatang California. Si Sister Rebecca Laing nagsulat:
“Sa ting-init niadtong 2011, ang kinabuhi sa among pamilya daw ingon og hingpit. Malipayon ang among kaminyoon uban sa upat namo ka mga anak—nag-edad og 9, 7, 5, ug 3. …
“Ang akong mga pagmabdos ug mga pagpanganak [kanunay nga] risgo kaayo… [ug] among gibati nga [dako kaayo] ang among panalangin nga nagkaanak og upat, [naghunahuna] nga kompleto ang among pamilya. Niadtong Oktubre samtang naminaw sa kinatibuk-ang komperensiya, gibati nako ang dili malalis nga pagbati nga kinahanglan mi nga manganak og usab. Samtang si LeGrand ug ako namalandong ug nag-ampo, … kami nasayod nga ang Dios adunay plano alang kanamo nga lahi kay sa among plano.
“Human sa laing malisod nga pagmabdos ug pagpanganak, napanalanginan mi og usa ka matahom nga batang babaye. Amo siyang ginganlan og Brielle. Usa siya ka milagro. Human sa iyang pagkatawo, samtang didto pa [sa lawak-panganakan], nabati nako ang usa ka dili malalis nga tingog sa Espiritu: ‘Naa pay usa.’
“Paglabay sa tulo ka tuig, laing milagro, si Mia. Si Brielle ug Mia mga dagkong kalipay sa among pamilya.” Siya mitapos, “Ang tinguha sa pagpamati ngadto sa giya sa Ginoo ug ang pagsunod sa Iyang plano alang kanato kanunay nga modala og mas dakong kalipay kay sa … pagsalig sa [atong] kaalam.”23
Gihigugma sa Manluluwas ang matag bililhon nga bata.
“Siya mikuha sa ilang gagmay nga mga bata, sa tinagsa, ug mipanalangin kanila. …
“Ug … sila mipunting sa ilang mga mata paingon sa langit, … ug sila nakakita sa mga anghel nanaog gikan sa langit … sa taliwala sa kalayo; ug [ang mga anghel] … gialirongan kadtong gagmay nga mga bata, … ug ang mga anghel nangalagad ngadto kanila.”24
Ako mopamatuod nga ang imong kaugalingon nga panaw isip anak sa Dios wala magsugod alang kanimo samtang ang unang huyop sa hangin gikan sa yuta misulod sa imong baga ug kini dili matapos sa imong kataposang gininhawa sa mortalidad.
Nga kita unta kanunay nga mahinumdom nga ang matag espiritu nga anak sa Dios moabot sa yuta sa iyang kaugalingong personal nga panaw.25 Nga kita unta mohangop kanila, manalipod kanila, ug kanunay nga mohigugma kanila. Samtang kamo modawat niining bililhong mga anak sa ngalan sa Manluluwas ug motabang kanila diha sa ilang mahangtorong panaw, ako mosaad nga ang Ginoo manalangin kaninyo ug mobubo sa Iyang gugma ug pag-uyon diha kaninyo. Sa ngalan ni Jesukristo, amen.