Camille N. Johnson

Si Camille N. Johnson migahin sa iyang kinabuhi sa pagtuon og mga pinulongan, pagkahimong hanas niini, ug sa paggamit niini aron makatabang sa mga tawo sa pagsulbad og mga problema atol sa iyang kapin sa 30 ka tuig nga panarbaho isip abogada. Ug kanunay siyang makakita og dakong kalinaw diha sa mga pulong sa mga kasulatan. Gikonsiderar niya ang mga tawo diha sa kasulatan nga apil sa pinakasuod niyang mga higala.

Sa gihapon, dihang siya ug ang iyang bana mibalhin sa Habagatang Amerika aron mangulo sa Peru Arequipa Mission sukad niadtong 2016 hangtod 2019, nagtinguha siya nga makakat-on sa pinulongan. Kay wala gayod makatuon og Espanyol, nag-ampo siya nga mahatagan og abilidad nga makahimo sa pagpakigsulti sa iyang mga misyonaryo ug sa mga tawo aron mobati sila sa iyang gugma alang kanila ug sa iyang pagpamatuod bahin sa Basahon ni Mormon.

“Misalig ako sa Ginoo ug misalig sa Espiritu aron masulti nako ang akong gugma ug pagpamatuod kon dili ako makalitok sa mga pulong. Maanindot kaayo ug makapatandog nga leksyon ang akong nakat-onan nga ‘ayaw gayod pagsalig sa imong kaalam’ [Mga Panultihon 3:5] apan sa paghatag niining tanan ngadto sa akong Manluluwas.”

Sa pagpadayon iyang nakat-onan og usab ang usa ka yanong kamatuoran sa ebanghelyo: “Kini mao ang mahitungod sa paghigugma sa Manluluwas, sa paghigugma sama sa Manluluwas, ug pagtugot sa gugma ug Pag-ula ni Jesukristo nga moepekto sa atong kinabuhi.”

Si Sister Johnson napanalanginan og gugma sa misyon nga adunay 552 ka misyonaryo ug karon mibati nga milapad ang iyang kasingkasing sa paghigugma sa usa ka milyon nga mga bata nga gitugyan diha kaniya.

“Akong gikalipay kini nga oportunidad sa pagkat-on gikan sa mga bata kinsa mao ang mga ehemplo sa tiunay nga gugma ni Jesukristo,” miingon siya.

Si Camille Neddo Johnson natawo niadtong Septyembre 12, 1963, nila ni Hal ug Dorothy Neddo sa Pocatello, Idaho, USA. Naminyo siya kang Douglas R. Johnson niadtong 1987 sa Templo sa Salt Lake. Sila adunay tulo ka anak. Migradwar siya sa University of Utah sa Iningles niadtong 1985 ug gikan sa University of Utah S. J. Quinney College of Law niadtong 1989.

Si Sister Johnson nakaserbisyo isip presidente sa Young Women sa ward, sa mga kapangulohan sa Relief Society ug sa Primary sa ward, ug isip magtutudlo sa Doktrina sa Ebanghelyo.