Elder Clark G. Gilbert

Daghan ang nakaila ni Elder Clark G. Gilbert isip presidente sa BYU–Pathway Worldwide ug kanhi presidente sa Brigham Young University–Idaho. Daghan usab ang nakaila kaniya tungod sa iyang pag-ugmad og mga kausaban sa online nga mga programa sa mas taas nga edukasyon niining duha ka institusyon.

Si Elder Clark nagpasidungog sa makahuloganong pagserbisyo diha sa Simbahan—sa pagtabang sa mga batan-ong lalaki sa sulod sa siyudad sa Boston, Massachusetts, USA—aron sa pag-andam kaniya nga madala ang mga oportunidad sa edukasyon ngadto sa mas daghan nga tawo. Kana nga oportunidad sa pagserbisyo miabot samtang may daghan siyang buluhaton sa graduate school ug nag-atiman og bag-ong pamilya.

“Kadto nga mga batan-ong lalaki wala kaayoy daghan nga suporta. Nahimo sila nga kabahin sa among kinabuhi, ug nakakat-on kami sa paghigugma kanila,” miingon siya. “Nakakat-on ako sa pagpaminaw sa Ginoo ug nahibalo nga Siya anaa sa ilang kinabuhi. Madungog nako Siya nga mosulti kanako unsay akong kinahanglan nga buhaton alang kanila.”

Si Elder Gilbert miingon nga ang Ginoo mitudlo kaniya mahitungod sa mga panginahanglan sa ubang mga tawo. “Dili lamang kay Siya nag-andam kanako alang sa edukasyon, apan Iyang gipakita ngari kanako unsay Iyang mahimo sa kinabuhi sa mga tawo diha sa usa ka halawom, personal nga paagi.”

Si Clark Gordon Gilbert natawo sa Oakland, California, USA, niadtong Hunyo 18, 1970, ngadto nila ni Paul ug Susan Gilbert. Nagdako siya sa Phoenix, Arizona, USA. Human makaserbisyo sa Japan Kobe Mission, naminyo siya ni Christine Calder niadtong 1994 didto sa Salt Lake Temple. Sila adunay walo ka anak.

Si Elder Gilbert nakadawat og bachelor’s degree sa international relations niadtong 1994 sa Brigham Young University, usa ka master’s degree sa Asian studies niadtong 1995 sa Stanford University, ug degree nga doctor of business administration niadtong 2001 sa Harvard University. Nakatrabaho siya isip assistant professor sa Harvard Business School, associate academic vice president sa BYU–Idaho, ug presidente ug chief executive officer sa Deseret News ug sa Deseret Digital Media.

Usa ka Area Seventy sa panahon sa pagtawag kaniya, si Elder Gilbert nakaserbisyo isip presidente sa korum sa mga elder, magtatambag sa kapangulohan sa Young Men sa stake ug sa kapangulohan sa stake, ug bishop.