Mga Kalihokan nga gamit ang Internet [Virtual] Momugna og Paghiusa

Gipasiugdahan sa Kinatibuk-ang Kapangulohan sa Primary, kini nga kalihokan alang sa mga bata, mga ginikanan, ug mga lider gipahigayon sa usa ka batang lalaki ug batang babaye gamit ang ilang lumad nga pinulongan nga Iningles, Espanyol, o Portuguese. Ang ubang mga bata mihatag og mga report gikan sa tibuok kalibotan kon asa sila nahimutang. Ang presentasyon naglakip og naka-video nga mga sugilanon mahitungod ni Jesukristo, usa ka mensahe alang sa mga bata gikan ni Presidente Russell M. Nelson, usa ka interbiyo mahitungod sa mga pakigsaad sa bunyag uban ni Elder Ulisses Soares sa Korum sa Napulog Duha ka Apostoles, ug mga panaghisgot kauban sa Kinatibuk-ang Kapangulohan sa Primary. Naglakip usab kini og drowing nga mga leksyon, artwork nga mga kalihokan, ug pagkanta. Ang kalihokan gihubad na ug mahimo nang matan-aw gamit ang dugang nga mga pinulongan. Aduna usab kini mas mugbo nga mga segment nga magamit diha sa panimalay nga pagtuon sa ebanghelyo.

Ang Kinatibuk-ang Kapangulohan sa Young Women mipahigayon og usa ka virtual nga kalihokan nga nagtimaan sa ika-150 nga anibersaryo sa pagka-organisar sa Young Women. Gisibya kini sa 11 ka pinulongan. Si Presidente Nelson mihatag og girekord nang daan nga mensahe, ug ang mga lider sa Young Women mitubag sa mga pangutana gamit ang Iningles, Espanyol, ug Portuguese. Ang mga batan-ong babaye sa Norway ug Thailand mihalad sa mga pag-ampo. Niadtong 2020, ang mga batan-ong babaye sa tibuok kalibotan giawhag nga mohimo og 150 ka buhat sa pagserbisyo.

Kapin sa usa ka milyon nga mga hilig kaayo sa family history ang miapil sa virtual nga kalihokan sa RootsTech niadtong Pebrero 2021. Kadto mao ang adunay kinadaghanang partisipante sukad sa unsay nahimo nga kinadak-ang pagsaulog sa family history sa kalibotan. Ang RootsTech mipahiluna sa kalamboan sa usa ka virtual nga librarya sa pagkat-on nga magamit na unya sa tibuok tuig. Si Elder Jeffrey R. Holland sa Korum sa Napulog Duha ka Apostoles ug ang iyang asawa, si Patricia, mao ang tinahod nga mga mamumulong sa Family Discovery Day, isip usa ka tinuig nga bahin sa panagpundok.

Ang Music Festival sa Kabatan-onan niadtong Marso naglangkob og musikal nga mga talento ug mga pagpamatuod. Ang kabatan-onan nga gikan sa New Zealand, Brazil, Dominican Republic, Germany, Habagatang Africa, ug sa Pilipinas mipahigayon sa programa, nga gibase sa 2021 nga tema sa kabatan-onan sa Simbahan, “Buhat nga Mahinungdanon” (tan-awa sa Doktrina ug mga Pakigsaad 64:33–34). Agi og dugang sa musika ug sa nakasentro kang Kristo nga mga mensahe gikan sa ilang mga kaedad, ang kabatan-onan nakadungog usab gikan ni Presidente Nelson; Presidente Bonnie H. Cordon, Kinatibuk-ang Presidente sa Young Women; ug ni Presidente Steven J. Lund, Kinatibuk-ang Presidente sa Young Men.

Si Jean B. Bingham, Kinatibuk-ang Presidente sa Relief Society, mao ang nag-unang mamumulong sa ikalima nga tinuig nga International Women-in-Diplomacy Day nga simposyum. Gipasiugdahan sa pinasidunggan nga consul general sa Republika sa Senegal, ang virtual nga kalihokan naggikan sa Los Angeles, California, USA. Si Presidente Bingham misulti ngadto sa miapil nga internasyonal nga mga lider sa patigayon ug sa mga diplomat nga ang edukasyon mao ang yawe sa kalamposan sa kababayen-an ug mga batang babaye sa tibuok kalibotan. Mipaambit siya og mga ehemplo bahin sa kababayen-an kinsa napanalanginan pinaagi sa inisyatibo sa Simbahan bahin sa Pagkat-on sa Ebanghelyo.

Ang mga miyembro sa Simbahan ug mga higala sa laing mga tinuohan gikan sa tibuok kalibotan misumiter og video nga mga pasundayag sa Pasko nga gi-edit aron mahimong konsyerto ug gisibya sa ChurchofJesusChrist.org sa tibuok panahon sa Pasko isip kabahin sa tinuig nga Dan-agi ang Kalibotan nga kampanya sa Pasko.