Susan H. Porter

Human sa kamatayon sa iyang bana, nga si Elder Bruce D. Porter, nga usa ka Kinatibuk-ang Awtoridad nga Seventy, tungod sa pulmonya niadtong Disyembre 2016, si Sister Susan Porter nag-inusara na lamang sa ilang panimalay sa Bountiful, Utah, USA.

Sulod sa hapit duha ka tuig sa wala pa mamatay ang iyang bana, nagbiyahe siya ug nagserbisyo kauban niya samtang nagserbisyo ang iyang bana isip presidente sa Europe East Area.

Isip bag-ong nabiyuda, nag-ampo siya alang sa giya. Usa ka adlaw nakakita siya og usa ka pinintal nga hulagway [painting] sa Manluluwas nga nakigsulti sa babaye nga Samarianhon dapit sa atabay ni Jacob (tan-awa sa Juan 4:6–26). Gibati niya ang pag-aghat sa Espiritu nga himoon ang samang butang nga “molingkod sa tiilan sa Manluluwas ug magkat-on, ug Siya motudlo kanimo.”

Si Sister Porter naningkamot nga mas maduol sa Manluluwas, ug ang Espiritu Santo mihupay kaniya ug miagak kaniya sa pagpadayon.

“Nasayod ko nga giagak ako,” miingon siya. “Aduna akoy kalig-on ug kalinaw lapas pa sa akong kaugalingon.”

Samtang ang mga bata sa Primary sa tibuok kalibotan nagsagobang og kalisdanan, si Sister Porter gusto nga sila masayod nga ang Dios nahigugma kanila.

“Kon si Jesus kauban pa kanila karon, Siya mokuha kanila sa tinagsa, ug mopanalangin kanila, ug mag-ampo alang kanila, sama sa Iyang gibuhat alang sa Nephite nga mga bata sa dugay nang panahon [tan-awa sa 3 Nephi 17:21]. Nanghinaot ko nga ang matag bata mag-ampo alang sa Iyang tabang ug mohangyo nga makakita sa Iyang mahigugmaong kamot diha sa ilang kaugalingong kinabuhi.”

Si Susan Holland Porter natawo niadtong Hulyo 31, 1955, sa Siyudad sa Ponca, Oklahoma, USA, ngadto nila ni Hans ug Charlene Holland. Si Sister Porter nakagradwar sa Brigham Young University og bachelor’s degree sa chemistry. Nakatrabaho siya isip kaabag sa laboratoryo ug magtutudlo sa math.

Naminyo siya ni Elder Porter niadtong 1977 sa Washington D.C. Temple. Sila adunay upat ka anak.

Si Sister Porter nakaserbisyo sa kinatibuk-ang konseho sa pagpanambag [advisory council] sa Relief Society sukad niadtong 2017. Ang nangagi niyang mga calling naglakip sa pagka-magtatambag sa kapangulohan sa Relief Society sa stake, presidente sa Relief Society ug Young Women sa ward, magtutudlo sa Doktrina sa Ebanghelyo, ug lider sa musika sa Primary.