Elder Carlos G. Revillo Jr.

Sukad sa pagkabata, si Elder Carlos G. Revillo Jr. nagtinguha nga moserbisyo og full-time nga misyon. Apan sa kolehiyo, nakahukom siya nga ilangay una ang iyang misyon og usa ka tuig aron mahuman ang iyang lima ka tuig sa degree nga chemical engineering ug mopasar og national board certification nga eksamin. Naapil siya sa unang lima nga pinakataas og kuha sa board exam ug nakadawat og daghang maayo nga mga tanyag sa panarbaho gikan sa multinational nga mga kompanya.

“Atol niana nga panahon, gipangutana nako ang akong kaugalingon, ‘Ganahan ba gayod ako nga moserbisyo og misyon? Nasayod ba gayod ako nga si Joseph Smith tinuod nga propeta ug nga ang Basahon ni Mormon tinuod?’” Matod ni Elder Revillo. “Nag-ampo ko ug misusi gayod sa unsay akong gituohan.”

Wala madugay iyang nahibaloan nga ang iyang mama nag-ampo ug nagpuasa alang kaniya. Miingon si Elder Revillo nga ang Espiritu mitandog sa iyang kasingkasing.

“Ang akong pagpamatuod hingpit nga nalig-on dihang miserbisyo ako og full-time nga misyon,” miingon siya. “Tanan nga panalangin nga karon akong naangkon akong ipahinungod nianang lisod kaayo nga desisyon.”

Si Carlos Garcia Revillo Jr. natawo sa General Santos City, Philippines, niadtong Nobyembre 8, 1965, ngadto nila ni Carlos G. Revillo Sr. ug Amparo Revillo. Nagdako siya sa General Santos, nakaserbisyo og full-time nga misyon sa Philippines Bacolod Mission, ug naminyo kang Marites Enriquez Fernando Revillo sa Manila Philippines Temple niadtong 1989. Sila adunay upat ka anak.

Si Elder Revillo nakagradwar og bachelor’s degree sa chemical engineering sa University of Santo Tomas sa Manila niadtong 1986. Nakatrabaho siya sulod sa 22 ka tuig sa lain-laing mga posisyon sa pagdumala sa Procter & Gamble sa Pilipinas, sa rehiyon sa Asia-Pacific, ug sa tibuok kalibotan nga ulohang buhatan sa maong kompanya sa Estados Unidos. Nakatrabaho usab siya isip dako-dako sa kalidad, kasiguroan sa pagkaon, ug mga kalihokan sa pagdumala sa Asya alang sa Kellogg Company.

Si Elder Revillo, nga kaniadto tigdumala sa welfare and self-reliance sa Simbahan sa Pilipinas sa panahon sa pagtawag kaniya, nakaserbisyo isip bishop, presidente sa stake, magtutudlo sa seminary, high councilor, ug presidente sa Philippines Quezon City Mission sugod niadtong 2013 hangtod 2016.