Haʻu, ʻo Muimui ʻIate Au
Ne Haʻu Nai e Ngaahi Fakahaá Mei he ʻOtuá?
Tokāteline mo e Ngaahi Fuakava 67–70
21–27 Sune
Nōvema 1831: Naʻe fakafanongo fakamātoato ʻa Uiliami E. Makelēlini ʻi haʻane tangutu ʻi ha konifelenisi ʻa e Siasí mo Siosefa Sāmita pea mo ha niʻihi kehe ʻo e kaumātuʻá. ʻI ha ngaahi ʻaho siʻi kimuʻa ange ai, ne fakamatala ange ʻe Siosefa ha fakahā kiate ia naʻá ne tali ha ngaahi fehuʻi ʻe nima ne vahevahe ʻe Uiliami mo e ʻOtuá pē (vakai, Tokāteline mo e Ngaahi Fuakava 66). Kuo loto ʻeni e kau mēmipa ʻo e konifelenisí ke pulusi e ngaahi fakahā ʻa e Palōfitá ʻi hano fakatahatahaʻi ʻa ia naʻe ui ko e Tohi ʻo e Ngaahi Fekaú (naʻe ui kimui ange ko e Tokāteline mo e Ngaahi Fuakavá).
Ko e polé: Ne ʻi ai ha kaumātuʻa ʻe niʻihi ne ʻikai ke nau tui moʻoni ne haʻu e ngaahi fakahaá mei he ʻOtuá. Ne nau pehē ne ʻikai lelei feʻunga e lea ne fakaʻaongaʻi aí. Ke tali e tukuakiʻí, ne tuku mai ai ʻe he ʻEikí ha pole: “Fili ia ʻa ia ʻoku poto taha ʻiate kimoutolú” ke ne hiki ha meʻa ʻoku “tatau” mo e ngaahi fakahaá. Ka ʻi ai ha taha te ne lava ia, ʻe lava ke pehē ʻe he kaumātuʻá ne ʻikai moʻoni e ngaahi fakahaá. Ka ʻikai ke ne lava, ʻe fie maʻu ke “fakamoʻoniʻi” ʻe he kaumātuʻá ne haʻu e ngaahi fakahaá mei he ʻOtuá (vakai, Tokāteline mo e Ngaahi Fuakava 67:5–8).
Ko e Olá: Ne fakahoko ʻe Uiliami, ko ha faiako mālōlō, e pole ʻa e ʻEikí ʻo feinga ke tohi ha fakahā. Ne ʻikai ke ne lavaʻi ia.1 Naʻe fakamālohia ʻe he ʻikai lavameʻa ʻa Uiliamí ʻa ʻene fakamoʻoni kia Siosefa Sāmitá ko ha palōfita. Naʻe fakamoʻoni ʻa Uiliami fakataha mo ha kaumātuʻa kehe ʻi he konifelenisí, ʻi ha fakamatala ʻo fakahaaʻi ʻokú ne ʻiloʻi “ʻo fakafou ʻi he Laumālie Māʻoniʻoní” naʻe foaki e ngaahi fakahaá “ʻi he ueʻi fakalaumālie mei he ʻOtuá” pea ne nau “ʻaonga ki he tangata kotoa pē pea ʻoku moʻoni kotoa ia.”2