Ko ha Kiʻi Taimi Fakataautaha mo e Fakamoʻuí
Ko ha aʻusia ʻeni ʻoku tuʻo taha pē ʻene hoko ʻi he moʻuí—pe ko ia koā?
Laló: ngaahi taá ʻi he angalelei ʻa e tokotaha faʻu tohí
Ne ongo mai mei he ʻuluʻakaú e kaikailá ʻi he lele ʻa e kakaí ke fakaʻehiʻehi mei he sūlifá mo e ngaahi maka ne ngangana hifó. Ne u tuʻu ʻi mui he funga siteisí ʻo fanongo ki he tā leʻolahi ʻo e foʻi fasí mei he ngaahi sipika he tafaʻaki ʻe taha ʻo e moʻungá.
ʻI he faʻahitaʻu māfana ko iá, ne u kau ki he Kātoanga Fakaʻaliʻali ʻo e Moʻunga Komolá, ʻa ia ne fakatātaaʻi ai ha ngaahi meʻa kehekehe mei he Tohi ʻa Molomoná. Ne fili atu ke u hoko ko e tokotaha tauʻolunga ʻi he ututaʻú (vakai, 1 Nīfai 18:23–24) pea mo ha tokotaha taʻetui (vakai, 3 Nīfai 1:4–21), ka ne kau e tokotaha kotoa pē, kau ai e kau ngāué, ʻi he foʻi faiva hokó.
Ne ulo mai ha foʻi maama ʻo fakahangatonu ki ha tokotaha ne teunga hinehina, ʻa ia ne hangē ʻoku tētē ʻi ʻolunga ʻi he konga māʻolunga taha ʻo e funga siteisí. Naʻe ʻikai ko e Fakamoʻuí totonu ia—ko ha tokotaha ako ʻunivēsiti ngāue tokoni pē ia hangē ko aú. Ka ʻi he mōmeniti ko iá ʻi he funga siteisí, ne u fakakaukauloto ko e Fakamoʻuí tonu ʻoku tuʻu aí.
Naʻá ku sio loto ʻokú Ne hāʻele hangatonu mai kiate au, peá u fakakaukauloto ʻeku sio ki Hono fofongá. Ne lōmekina au ʻe he ngaahi ongo mei he Laumālié. ʻI he mōmeniti ko iá, ne u kiʻi aʻusia ai e tuʻunga ʻo e meʻa ʻe hoko ʻi haʻaku vakai ki hoku Fakamoʻui totonú. Ne u mataʻikoloa ʻaki e aʻusia fakalaumālie makehe ko ʻení.
Hili ha māhina ʻe ono mei ai, ne liliu ʻeku fakakaukaú ʻe ha fakamatala ʻa Pīsope W. Uātolo, ʻa ia ne hoko he taimi ko iá ko e Tokoni Ua ʻi he Kau Pīsopeliki Pulé, naʻá ne pehē: “ʻOku tau lava ʻi he Sāpate takitaha ʻo maʻu ha aʻusia tatau mo ia ne vahevahe ʻe kinautolu ne hao moʻui mei he ngaahi fakaʻauha hokohoko ne hoko ʻi he taimi hono tutuki ʻo e Fakamoʻuí, hangē ko ia ʻoku fakamatalaʻi ʻi he Tohi ʻa Molomoná.”1
Ne u ʻohovale. Te u lava nai ʻo ongoʻi, ʻi he uike kotoa pē, ʻa e meʻa tatau ne u ongoʻi ʻi he funga siteisí he pō ko iá? Ko e lahi ange ʻeku fakakaukau ki aí, ko e lahi ange ia ʻeku fakatokangaʻi ko hono maʻu ʻo e sākalamēnití ko ha aʻusia fakataautaha ia mo e Fakamoʻuí ʻo hangē haʻate tūʻulutui ʻi muʻa ʻiate Ia mo ongoʻi e ngaahi matakafo ʻo e faʻó ʻi Hono ongo nimá mo e vaʻé.
ʻOku ʻikai fie maʻu ia ke tau kau ʻi ha fakaʻaliʻali ke aʻusia e ʻofa ʻa e Fakamoʻuí mo mahino pe fakakaukauloto ki ha taimi fakataautaha mo Ia. ʻOku tau maʻu ha ngaahi faingamālie ʻi he uike kotoa pē. ʻOkú Ne tatali ʻi he Sāpate takitaha ke fakahaaʻi mai ʻEne ʻofá mo e loto mahinó. Ko e toé pē ke tau omi kiate Ia.