Matutua ma le Faamaoni
Laei Talafeagai
E alala le tusitala i Kalefonia, ISA.
O le taimi lenei sa avea ma a matou galuega ia mautinoa na laei talafeagai o ia.
Mai aso o matou laiti, sa i ai lo matou tina iina ia mautinoa sa talafeagai ona faalavalava i matou mo sauniga uma. O le i ai o se fanau teine e toalima o lea sa tele ai ni galuega e fai. Afai na matou ofuina ni ofuvae ae na manaomia ona fai ni ofu soloatoa, na te faatonu i matou e sui o matou ofu. A faapea e ofuina e se tasi o i matou se ofu fou manaia lea sa manatu e le tatau ona ufitia e se peleue e tusa lava pe o le a le malulu, e faapea mai lava o ia ia fai uma o matou peleue. O taimi uma lava sa talafeagai ona laei, ma sa ia faamautinoaina foi sa talafeagai foi o matou lavalava.
Sa faaaluina e tina lona olaga e aoao ai i matou taitoatasi e le gata i le ala e fai ai lavalava ae na faapena foi i le auala e ola ai. Sa ia faasoa mai ona manatu e uiga i le olioli o le talalelei ma lana molimau i le taua o le malumalu. Sa ia faamanino mai, sa faamoemoe o ia o le a matou malamalama taitoatasi i le aafiaga o sauniga o le malumalu i lo matou fiafia e faavavau.
Ona oo mai lea o le aso na matou faapotopoto ai e fai laei o Tina mo le falelauasiga. Sa ia tuua le lalolagi lenei mo le isi, ina ua uma ona ia aoaoina i matou i mea uma na ia maua le taimi e aoao ai i matou. O lo matou avanoa lenei e faaali ai lo matou tuuto ia te ia, lo matou agaga faafetai mo mataupu faavae sa ia totoina i totonu o o matou loto.
O le taimi lenei o le matou galuega ia mautinoa ua talafeagai ona faalaeiina o ia.
Ina ua matou o mai i totonu o le potu sa tatau ona fai ai laei o Tina mo le falelauasiga, sa foliga gaogao lona tino maliu. Sa alu ese le mafanafana o lona agaga, ae na suia e le malulu o le oti. A o siomia o ia e lana fanau teine ma nisi o fanau teine a lana fanau, sa matou faamamaluina le soifuaga o lenei tamaitai maoae, sa matou mananao e faaali atu ia te ia, mo le taimi mulimuli, lo matou agaga faafetai mo le faamanuiaga sa avea ai o ia i o matou olaga.
Ua toaono nei i matou o le fanau teine: o Leah, Heather, Gaylene, Lori, Melinda, ma le tama teine faaletulafono o Adrianne. Sa faia e le toaono o i matou se lio fufusi e faataamilo ia Tina. Ona fatuina lea e a matou lava fanau teine se lio lona lua faataamilo ia i matou. O nei lio e lua na matou manatua ai galugalu o le alofa na fatufatuina e lona olaga. Ona o lana faatosinaga ma filifiliga amiotonu a e tupuga mai ia te ia, o le a galugalu atu ai faamanuiaga o feagaiga o le malumalu i augatupulaga uma, ua faateleina ai faamanuiaga o feagaiga o le perisitua.
O le a tapena o ia e lana fanau teine mo le falelauasiga. Sa matou ufiufia ma le faaeteete lona tino malulu i le mafanafana o ofu talaloa o le malumalu. Sa nonoaina ma le faaeteete ia lipine taitasi; faamaulu seevae; sa faia taumafaiga ia faamautinoa ai na sao ona faamaulu laei uma. O le mea mulimuli lava e fai o le nonoa lea o se lipine mulimuli. A o matou faia lena mea, ia mautinoa na noanoaina i le manaia na matou mafaia ai, sa oo mai se manatuaga i o matou mafaufau taitoatasi—sa ia nonoaina lena lipine mo i matou taitoatasi i taimi muamua na matou ulu ai i le malumalu. A o matou nonoaina lana lipine mo le taimi mulimuli, sa matou toe faafoi atu ia te ia faafaatusa, faatasi ai ma le loto faafetai e faavavau, le meaalofa o faamanuiaga o le malumalu.
A o matou tilotilo atu ia te ia, sa taufai faatumulia i matou i se lagona o le mafanafana. Sa lei toe siomia o ia i le malulu o le oti. Sa aulelei o ia. Sa faigofie ona vaai faalemafaufau ia te ia i le lagi, ua siomia ai iina e i latou sa ia alofa i ai, ma le naunau e toe foi atu i lona Tama Faalelagi.
A o ou tuua le potu, sa oo mai i lou mafaufau e faapea, ua ou ola nei i le taimi o le olaga ua mafai ai ona ou tausia lo’u tina. Na tumau o ia e oo i le iuga. Sa matua faamaoni o ia ma faamanuiaina lana fanau e ala i lana faataitaiga. Sa ou faamoemoe ma tatalo ia mafai ona ou faia lea lava mea e tasi, ma ia i ai se aso e mafai ai ona ou tuua se talatuu faapena mo la’u fanau teine ma a latou fanau teine.