Sau, Mulimuli Mai ia te A’u
O le Faalogo e uiga i Tikeri e Tolu o le Mamalu mo le Taimi Muamua
5–11 Iulai
Ata na tusia e Annie Henrie Nader
O le vaega e 76 o le Mataupu Faavae ma Feagaiga ua faamanino mai ai vaega taua o le fuafuaga o le faaolataga ia na leiloloa mai le lalolagi i le taimi o le Liliuese. Mo le toatele o tagata, o le aoaoina o nei upumoni toefuataiina mo le taimi muamua o se aafiaga e le galo. O le tulaga lea mo Connie, o se tagata liliu mai mai Richmond, Virginia, ISA.
Fai mai a ia: “Sa ou vaai i taimi uma i le alofa o le Atua pe a faitau le Tusi Paia, ae na le mafai ona ou mauaina se ekalesia na aoaoina i le ala na ou malamalama i ai. Ina ua fai lau lesona a faifeautalai i le fuafuaga o le faaolataga, sa ou lagonaina le matuai faamaoniaina ma se filemu e pei ou te lei lagonaina muamua. Sa ou faapea ifo ia te au lava, ‘O le Tama Faalelagi lena ou te iloa.’ O le aoao e uiga i tikeri o le mamalu na matuai matala ai lou mafaufau, na faigata ai ona taofiofi lou fiafia e aoao atili i ai.”
O Delphine, o se tagata liliu mai mai Pale, Farani, e faigata le tulaga o lona aiga, o lea, ina ua aoaoina o ia e faifeautalai e faapea e mafai ona nonofo faatasi aiga i le malo selesitila, sa ia le mautinoa pe na manao ai i lena mea. Ae peitai, ao faaauau ona aoao o ia e faifeautalai e uiga i tikeri e tolu o le mamalu, sa faamafanafanaina o ia. Sa ia aoaoina o le a latou toe faatasi ma i latou e alofa i ai o e na filifili e mulimuli i le talalelei. Faatasi ai ma se malamalama sili atu i le fuafuaga o le faaolataga, sa ia fai mai ai, “Sa ou iloa ai e sili atu le tonu, ma o lena mea na faamafanafanaina ai au.”