Aumaia o le Talalelei i Bulgaria

Ata

auala maamaa i Bulgaria

I le aso 30 o Iulai, 1899, na papatisoina ai e Mischa Markow, o se faifeautalai Serepia o le sa talai atu i Europa atoa, ia Argir Dimitrov, o le uluai tagata liliu mai o Bulgaria, e latalata i Constanta, Romania.¹

I Romania, e fa gagana sa talai atu ai Markow ma Dimitrov ma sa papatisoina ni nai tagata liliu mai a o lei faate’a ese e taitai o le lotoifale.² Ia Iuni 1900, o Markow ma Michael Dimitrov, o se Balgaria liliu mai na papatisoina i Bucharest, na talai atu i Ruse ma Sofia i Bulgaria.³ I le mavae ai o ni vaiaso i Sofia, sa pue faapagotaina Markow, suesueina, ma faate’a a o lei papatisoina ni tagata liliu mai.⁴

E lei toe talaiina le talalelei toefuataiina i Bulgaria mo le 90 tausaga. A o faaiuiu le vaitau o le Komunisi, sa malaga atu Elder Russell M. Nelson o le Korama a Aposetolo e Toasefululua i Sofia faatasi ma isi taitai o le Ekalesia. Ia Fepuari 1990, a o faatautaia se fonotaga ma taitai o le malo, sa fesili ai Elder Nelson po o le a le mea e mafai ona fai e le Ekalesia mo Bulgaria ma sa talosagaina e auina atu ni faiaoga o le gagana Peretania.

I lena tautoulu, o faifeautalai e toaono, o ē na i ai le tele o ni tomai faafaiaoga aloaia, na amata ona aoaoina vasega Igilisi i Sofia, Pravets, ma Smolyan. I Sofia, sa maua ai e Elder Morris ma Sister Annetta Mower ni nai tagata o le Ekalesia—na papatisoina i se isi nofoaga i Europa—o loo nonofo i le eria. I le aso 14 o Oketopa, 1990, sa amata ai e le au Mower ona faia sauniga faalevaiaso a le Ekalesia i lo latou fale mautotogi. I totonu o se masina, e silia ma le 50 tagata na tau faaofiofi i totonu o le tamai fale mautotogi mo fonotaga faalevaiaso.⁵ Ina ua taunuu faifeautalai talai muamua ia Novema, e toaono tagata sa faatalitali mo le papatisoga.⁶ Ina ua faateleina le fiafia i le Ekalesia, sa vave ona manino le manaomia o se ofisa tutotonu mo le misiona i Bulgaria.

I se tasi taeao ia Aperila 1991, sa tatagi le telefoni a o i ai Kiril ma Nevenka Kiriakov i lo la fale i Virginia. Na vave lava ona iloa e Nevenka le leo masani: “E mafai ona ou talanoa atu ia Uso Kiriakov faamolemole?” na fesili mai ai Elder Thomas S. Monson.⁷

“Ua lelei,” o lana tali lea. Ae peitai, a o lei mafai ona ia faaoo atu le telefoni ia Kiril, sa faaauau le saunoaga a Elder Monson, “O le a sou lagona pe afai e valaauina lou toalua e avea ma uluai peresitene o le misiona i Bulgaria?”⁸

Sa sosola ese Kiril ma Nevenka mai Bulgaria i le 1963 ma le la fanau, o Iulia ma Peteru, ma auai i le Ekalesia i Farani a o lei nonofo tumau i le Iunaite Setete. E ui ina sa faamatauina e taitai Komunisi e fasioti ma faafalepuipuiina Kiril ma lona aiga pe afai latou te toe foi atu, sa folafolaina ia Kiril i se faamanuiaga o le a ia talai atu le talalelei i Bulgaria. Faatasi ai ma se malo fou ua i ai, sa latou lagona ai le saogalemu e toe foi atu. E ui lava i popolega tele o le soifua maloloina o Kiril, ae sa la taliaina ma Nevenka ma le lototele se valaauga e auauna atu.⁹ “Sa ou naunau e vaai i tagata uma o lou aiga ma uo,” o le tala lea a Nevenka, “ma faasoa atu ia i latou le talalelei toefuataiina a Iesu Keriso.”¹⁰

A o sauni Kiril ma Nevenka e toe foi atu i lo latou atunuu moni, o uluai faifeautalai o e o le a auauna atu i lalo o la laua taitaiga sa taunuu i le nofoaga autu mo le aoaoina o faifeautalai i Provo, Iuta, ISA. O le faiaoga o le gagana lea na faafeiloaia i latou i le aso muamua o Julia Kiriakov Caswell, le afafine o Kiril ma Nevenka.¹¹

Ia Iulai 1991, na tatalaina aloaia ai le misiona a Bulgaria Sofia. E ala i le faatuatua, onosai, ma taumafaiga a tagata o le Ekalesia i le lotoifale ma faifeautalai, e le’i umi lava ae aloaia ona talia le Ekalesia.¹² E oo atu i le faaiuga o le 1991, ua silia ma le 150 Au Paia Bulgaria ua papatisoina.¹³

O le fia o sefulu o tausaga a o lei oo i le avanoa e mafai ai ona talai atu le talalelei i Bulgaria o le a avea ma se mea moni, sa amata ai sauniuniga a le Alii. E ui lava i le umi ona toesea le Ekalesia mai le atunuu ma faigata i le amataga, o le faatuatua ma le filiga o i latou na saunia e le Alii na tatalaina le faitotoa mo le toatele o isi e talia le talalelei toefuataiina.

O ai ua saunia e le Alii mo oe e faasoa atu i ai le talalelei? Na faapefea ona Ia saunia le ala mo oe? Ia iloa o loo faatalitali mai vavega mo oe a o e sailia ni avanoa e folafola atu ai le talalelei, “e tusa ai ma lena vaega o le Agaga ma le mana o le a tuu atu ia te outou” (Mataupu Faavae ma Feagaiga 71:1).