Tatalo ia Iloa le Upumoni ma La’u Tali e Le’i Faamoemoeina

I se tasi po, sa ou faitau ai i se tusi faitau ina ua oo mai se lagona ia te au ou te talitonu ma iloa ma lou loto atoa na mai le Agaga. Sa iu ina ou matua naunau lava i le faasologa o le tala o lenei tusi, ona oo mai ai lea o se manatu ia te au ou te lei suesueina lava le Tusi a Mamona ma le manatu i ai — pe e le o se tulaga loloto e pei ona sa ou faitau ma mafaufau loloto ai i lenei tusi faapitoa.

Sa ou suesue ma le faasamasamanoa i le Tusi a Mamona, tusitusi nai manatu, ma tatalo e uiga i ai i le tele o taimi muamua, ae sa ou misia se vaega taua o le apoapoaiga a Moronae i le mataupu mulimuli o le Tusi a Mamona: ia ole atu “ma le loto faamaoni, ma le manatu moni i ai” (Moronae 10:4). Sa ou iloaina o le taimi sili lea mo au e toe fesili atu ai i lou Tama o i le lagi mo ni tali. Sa ou lagona le galala faaleagaga, ma o le taimi lea na taua moni ai le tali ia te au. E aunoa ma le iloaina, sa ou taunuu i se fetaulaigaala faaleagaga, lea e faamoemoe ai lou faatuatua i le talalelei i le iloaina pe moni le Tusi a Mamona.

O le po lava lea na ou maua ai lena uunaiga, sa amata ai ona ou faitauina le Tusi a Mamona — ae o le taimi lea sa fai ma se faamoemoega.

Ina ua naunau nei e talia le valaaulia a lau taitai o Alii Talavou ma faamaea le faitauga i le faaiuga o le tausaga, sa ou faitauina lau kopi laitiiti i avanoa uma e mafai ona fai: i luga o le nofoaafi, i le taimi o tietie i le pasi i le aoga, i le va o vasega, i le va o feau, a o lei aai ma ina ua mae’a, ma a o lei momoe. I soo se avanoa lava e mafai ai, sa ou faitau ai. Ma o taimi uma sa ou faitau ai, sa ou tatalo pea: “e tatau ona ou iloa. E tatau ona ou iloa.”

I se tasi aso sa matou o ai ma lou aiga i le Malumalu o Manila Filipaina, ae ua galo ia te au ona ave lau pepa faataga o le malumalu. E ui i lea, sa i ai lau kopi laitiiti o le Tusi a Mamona ia te au, o lea sa ou nofo ai i se eria faatalitali ma faaauau pea ona faitau. E i ai taimi, ou te tu ai e faamemelo i le matagofie o le malumalu—o le feilafi o moli, o le fasitepu, o faamalama tioata, ma tagata e o mai ma o atu i le matua faaaloalo ma le alofa tele mo le Alii i o latou loto.

I se tasi taimi a o ou faitau, sa ou maua ai se uunaiga manino lava mai le Agaga i lou mafaufau. Ina ua oo mai, sa talanoa mai ia te au i le tele o tulaga eseese. Sa ou matua faateia lava i le taimi na oo mai ai na ou nofo sao laitiiti ai i luga. Sa ou lagonaina se lagona malosi sa le mafai ona ou aveesea i se manatu e pei o se mafaufauga e pasi atu po o se lagona o le le mautonu.

“Totoo ‘to,” o le mea lea na ou faalogo i ai i lou mafaufau.

O se faamatalaga faigofie ae loloto i lau lava gagana, Takaloka, o lona uiga, “E moni lenei mea.”

Sa ou mauaina se faamautinoaga e moni le Tusi a Mamona — o le afioga lea a le Atua. Sa iu ina ou iloaina ma lou loto atoa ona sa ou iloa o le uunaiga na sau mai le lagi.

Ae e le na o le pau lena o le mea na ou aoaoina.

I le tuputupu ae, sa ou faitauina le Tusi a Mamona ma aoao ai e uiga i le talalelei i le gagana Peretania. O le mea moni, i nai tausaga muamua o lou olaga, sa ou maua ai se malamalama sili atu o le Igilisi nai lo le Takaloka. Ae o le mauaina o lenei uunaiga faaleagaga sa le mafaufauina e maua i le Takaloka — o le gagana e masani ai i lou atunuu—na tautala mai i le upumoni i lou loto.

Sa ou iloaina i lena taimi e iloa au e le Atua i se auala moni lava ma patino.

Sa ou iloaina o loo i ai moni o Ia iina. Sa ou iloa e fetalai mai o Ia i lau gagana, e alofa o Ia ia te au, ma o loo Ia silafia ou tauiviga ma vaivaiga. Sa ia te au lena faamautinoaga, ae sa i ai se isi mea sa tatau ona ou iloa lelei, o lea sa ou sailia vave ai le tali: “le Tama Faalelagi, o Iosefa Samita ea o se perofeta moni?” Na toe oo mai le lagona, sa sili atu le mamana i le taimi lena i lou loto: “totoo ‘to!”

Na ou iloa ai o Iosefa Samita o se perofeta a le Atua. Sa ia vaai i le Tama ma le Alo. E ala mai ia Iosefa Samita, na toefuataiina mai ai le Ekalesia a Iesu Keriso i le lalolagi i lona atoatoaga.

Oka se maoa’e o le filemu ma le mafanafana ma le malamalama na ou mauaina! I le taimi tonu lea, sa ou manao ai e faanatinati atu i le lotoa o le malumalu, ma talotalo atu lau kopi laitiiti o le Tusi a Mamona i le ea ma alaga, “totoo ‘to! Totoo ‘to!” Sa ou lagona e pei o Alema ina ua ia alaga, “Oi, le olioli e, ma le malamalama ofoofogia tele na ou vaaia” (Alema 36:20).

Ina ua mavae lenei aafiaga, sa vave ona suia lau mafuaaga o le alu i se misiona. E lei leva ae ave i totonu au pepa, ma maua lou valaauga e auauna atu i Colorado, ISA. Sa matua’i o’u fiafia lava. Sa ou iloaina o loo i ai se tasi iina na oo i le mea na ou oo i ai — o le tagi atu mo se fesoasoaniga ma se faanaunauga mo le fiafia ma le upumoni. Ma sa ou iloa e ala i le talalelei a Iesu Keriso, o le a latou maua ai lena fesoasoani ma le fiafia, e pei lava sa ou i ai.

Ou te faamoemoe e mafai ona tatou iloa uma: “totoo ‘to!”