Sau, Mulimuli Mai ia te A’u
O le Auauna Atu i o Tatou Uso a Tagata Malaga
Mataupu Faavae ma Feagaiga 81-83
19--25 Iulai
Ata na tusia e J. Beth Jepson
“Fesoasoani i e vaivai, sii i luga lima ua tautau i lalo, ma faamalosi tulivae ua vaivai” (Mataupu Faavae ma Feagaiga 81:5)
Peresitene Thomas S. Monson: O se Faataitaiga o le Auauna Atu
Matua na valaauina ai o se epikopo: 22
Numera o tagata o le uarota: e silia i le 1,000
Numera o fafine ua oti a latou tane i lana uarota: 85
Na faasoa mai e Elder Jeffrey R. Holland o le Korama a Aposetolo e Toasefululua le auala na taulima ai e Epikopo Monson ia fafine ua oti a latou tane: “E toatele e mafai ona iloaina o le Epikopo talavou o Monson na ia aveina se vaiaso mai ana aso malolo patino i vaitau taitasi o le Kerisimasi e asiasi atu ai i na fafine uma e toa valusefulu ma le lima ua maliliu a latou tane o lana uarota. E toatele atonu latou te le iloa, mo nai tausaga muamua, o le meaalofa na te aveina atu ia i latou o se … moa na ia tausia ma saunia e ia lava mo le kukaina mai lana lava fale moa.”1
Na manatua e Epikopo Monson lona fesoasoani i se ulugalii matutua o e na manaomia ona vali lo la fale: “I se taimi o musumusuga sa ou valaau atu ai, e le o le korama a toeaina po o ni volenitia e aumai ni pulumu vali, ae, nai lo o lena, na mulimuli i le tusitaulima o le uelefea, i tagata o le aiga sa nonofo i isi eria. E toafa atalii faaletulafono ma afafine e toafa sa tofu ma pulumu ma auai i le galuega faatino.”2 O lenei musumusuga na fesoasoani ai i le aiga e toefesootai ma fetausiai lelei ai le tasi ma le isi.
“E le mafai ona tatou alolofa moni i le Atua pe afai tatou te le alolofa i ē o loo tatou malaga faatasi i lenei faigamalaga o le olaga.”3 —Peresitene Thomas S. Monson