Auala e Mafai Ona Tatou Talanoaina Ai Sauaga

I le avea ai ma se tagata ua aafia fua¹ i sauaga, e le tuuaia oe mo sauaga na e oo i ai, pe manaomia foi ona faamagaloina oe ona o faatinoga a se tasi na faia e faasaga ia te oe. Atonu e te tau mafaufau pe mafai faapefea e le Faaola ona fesoasoani e faamalolo oe. Atonu e te manatu o le taulaga togiola a le Faaola sa mo na’o i latou o e agasala ma manaomia ona salamo.

E faapefea la ona fesoasoani le Faaola ia te oe? Ona o Lana taulaga, ua Ia malamalama ai. Ua i ai i le Faaola le alofa faavauvau paia. E ui atonu tatou te le’o iloa tonu le ala na mafai ai e le Faaola ona lagona o tatou tiga uma, e mafai ona tatou faatuatua o loo malamalama o Ia, i se ala atoatoa, i alii, tamaitai, ma tamaiti taitoatasi (tagai i le 2 Nifae 9:21). E mafai ona Ia aumaia le filemu ma le malosi e agai ai i luma.²

E ala i Lana Togiola, e fesoasoani ai le Faaola ia i latou o e ua tiga. E mafai ona Ia fesoasoani mai “e ala i le faamaloloina ma le tausia o i tatou mo soo se mafatiaga tatou te onosaia ma le taumamaina.”³

E tusa lava po o anafea po o le a foi le tali atu o le tagata ua solitulafono, e mafai ona e “mautinoa o le Faamasino Atoatoa, o Iesu le Keriso, faatasi ma se malamalama atoatoa e uiga i tulaga auiliili [o le aafiaga] o le a faamasinoina tagata solitulafono uma mo faatinoga amioletonu uma.”⁴ Ia iloa foi o i latou “o e faasauā i taitoalua po o fanau … o le a i ai se aso tou te tutu atu ai e tali atu i luma o le Atua.”⁵

Ata

priesthood leader talking to a young man

O taitai ma faiaoga uma o e auauna atu i le autalavou ma fanau, e manaomia ona faia le aoaoga faamasani i luga o le initoneti o le “Puipuiga o Fanau ma le Autalavou.”⁶

E leai se taitai o le Ekalesia e tatau ona teena se lipoti o se sauaga faatautala pe fautuaina se tagata ina ia aua nei lipotia se gaoioiga faalesolitulafono.⁷ E tatau i taitai ma tagata o le Ekalesia ona faataunuuina matafaioi faaletulafono uma e lipoti atu ai sauaga i malu o le malo. Peitai, e eseese tulafono mo lipotiga a eria. O nisi eria e manaomia ai ni faifeau e faafesootai ia leoleo o tulafono, ae e faasaina e isi eria.

E taua mo taitai ona malamalama o tagata e aafia i le sauaina e ono faigata ona faatuatuaina isi—aemaise lava i latou i tulaga faalepulega. Atonu o le tulaga o se luitau faalelagona; o le faigata i le tagata ona talanoa e uiga i ai atonu e le faapea e i ai se mea e faatatau ai ia te oe lava. O le feiloai toatasi ai ma taitai e ono lagona ai le taufaafefe mo tagata na aafia fua i le sauaina. E mafai e tagata na aafia ona valaaulia se tagata matua faatuatuaina e faatasi ma i latou pe a latou feiloai ma taitai perisitua.⁸

E lē afaina po o anafea na sauaina ai le tagata, e mafai ona faamanuiaina o ia mai le lagolago ma le fesoasoaniga a [tagata] tomai faapitoa. O le tele o tagata na aafia e sili ona faamalolo lelei pe a faamaonia o latou lagona, latou te lagona le saogalemu ma le malupuipuia, latou te lagona ua talitonu se tasi ia i latou, ma ua latou malamalama i le auala na aafia ai i latou i le sauaina. O le tuuina atu o le lagolago e mafai ona fesoasoani ia i latou ia maua le filemu ma lē lagona ai le tuua toatasi a o latou saili ia maua le faamalologa.⁹

O le tu e tetee atu i le sauaina e tusa lava po o ai o aafia ai e tatau ona avea ma tulaga faatonuina. Ae peitai, afai o tagata solitulafono o i tulaga o le pule ma faatuatuaina, ua sili atu ona ogaoga le sauaga ma e mafai ona sili atu ona lamatia ai le tagata ua aafia. O i latou e i ai tulaga o le faatuatuaina o e sauaina isi e manaomia ona tuuina i se tulaga faatonuina maualuga atu ona ua latou solia le faatuatuaga a le ua aafia. I le Ekalesia o le aiaiga faavae e matuai leai lava se faapalepale mo sauaga, ma e patino lava le moni o lena mea mo i latou e i ai i tulaga o le pule ma le faatuatuaina.

E ui lava o tala o le sauaina e se tasi e pule e sili atu ona maua le gauaiga mai i tala fou, ae o tagata o aafia e tele lava ina sauaina e se tasi latou te iloa. Atonu o le tagata faasaua o se tasi o le aiga, auaiga, po o se tuaoi. O le tagata faasaua e soo se tausaga lava le matua. O le tagata faasaua e seāseā o se tagata ese.¹⁰

Ae e tele faailoga o le sauaina e mafai ona tatou aoao atu ia tatou fanau ina ia fesoasoani latou te iloa ai ma aloese mai ai. Aoao lau fanau afai e fai atu se tasi ia i latou e fai se mea ua latou iloa e sese, e mafai ona latou fai atu leai. O nisi nei o faataitaiga o ala atonu e faamalosi, faamatau, pe faatosina ai e tagata faasaua ia tagata na aafia:

• E faaaoga e tagata amioleaga o latou tulaga, pule, matua, tetele o tino, po o atamai e faamalosi ai se tagata na aafia ia fai mea latou te mananao ai.

• Latou te faapea mai e le avea i latou ma uo a le tagata aafia seia vagana ua fai e le tagata aafia le mea latou te fai mai ai.

• Latou te avea se mea ma e le toe faafoia sei vagana ua fai e le tagata aafia le mea latou te fai mai ai.

• Latou te faamatauina e faasalalau atu pepelo e uiga i le tagata na aafia sei vagana ua gauai atu le tagata ua sauaina.

• Latou te ofoina atu meaalofa, mea e fiafia ai, po o isi taui e maua ai mea latou te mananao ai.

• Latou te tau atu i tagata na aafia, e le talitonu se tasi ia i latou ma o le a latou afaina pe afai latou te tau atu i se tagata le sauaga faatautala.

• Latou te faamatau e faatiga i le ua aafia po o se tasi e pele pe afai e le faia e le tagata o loo aafia le mea latou te fai mai ai.¹¹

O le talanoaina o le sauaga o se tulaga lavelave. E leai ni tali faigofie, ae e mafai ona tatou maua le mafanafana sili i upu a Elder David A. Bednar o le Korama a Aposetolo e Toasefululua: “E leai se tiga faaletino, leai se manua faaleagaga, leai se tiga o le agaga po o le loto tiga, leai se mai po o se vaivaiga ua e pe ua ou faafetaiaia i le olaga faitino e lei oo muamua i ai le Faaola. I se taimi o le vaivai tatou te ono tagi atu ai, ‘E leai se tasi na te iloaina pe faape’i. E leai se tasi e malamalama i ai.’ Ae ua silafia ma malamalama atoa i ai le Alo o le Atua, aua sa Ia lagonaina ma tauave a tatou avega taitoatasi. Ma ona o Lana taulaga le iu ma faavavau (tagai i le Alema 34:14), ua ia te Ia le tiga-alofa atoatoa ma e mafai ona Ia faaloaloa mai Lona aao o le alofa mutimutivale ia i tatou. E mafai ona Ia aapa mai, pa’i mai, fesoasoani, faamalolo, ma faamalosia i tatou ina ia sili atu nai lo le mea e mafai ona tatou faia ma fesoasoani ai ia i tatou e faia le mea e le mafai ona tatou faia i le na o lo tatou faalagolago atu i lo tatou lava malosi.”¹²

Ata

Savior in Gethsemane

Lo’u Tama e, saunia e Simon Dewey

Tau ina ia tatou liliu atu i le Alii o le Filemu ma e ala atu ia te Ia e maua ai le faamoemoe ma le faamalologa.