Autalavou Matutua
3 Fesili o le Talafaasolopito o le Ekalesia na Taliina e Elder ma Sister Rasband
Mai se Faafesagaiga ma Elder Ronald A. Rasband o le Korama a Aposetolo e Toasefululua ma lona faletua, o Sister Melanie Rasband, i le aso 13 o Setema, 2020. Ina ia maimoa i le fuafuaga atoa, alu i le facetoface.ChurchofJesusChrist.org.
E tofu uma lava i tatou ma fesili i nisi taimi. Ae o le mea e faafetai ai, ua ia i tatou ni Aposetolo alolofa o e e mafai ona fesoasoani ia i tatou ia maua ni tali.
Na faapefea ona e iloa o Iosefa Samita ua valaauina moni lava e le Atua e avea ma perofeta o le Toefuataiga o le talalelei a Iesu Keriso?
Elder Rasband: Ua ma iloa o le ala o le a e iloa ai lau molimau e ono ese mai nai lo i ma’ua. Sa ou fanau i se aiga tuuto ma na maua lau molimau ao avea ma se alii talavou ma ua faapea ona tumau ia te au e oo mai i lenei lava aso.
Ou te fia faasoa atu ia te outou se mau i le [mauaina o se molimau o le talalelei toefuataiina], o loo maua i le vaega lona 46 o le Mataupu Faavae ma Feagaiga, lea o loo talanoa mai ai e uiga i meaalofa a le Agaga ia e ono tuuina mai ia i tatou.
Ou te fia alu i fuaiupu 13 ma le 14, o fuaiupu ia e lua o loo talanoa mai e uiga i le meaalofa o le molimau. Fuaiupu 13: “I ni isi ua tuuina mai i ai e le Agaga Paia ia latou iloa o Iesu Keriso o le Alo o le Atua, ma sa faasatauroina o ia mo agasala a le lalolagi.” Ou te manao ia outou iloa o iina o loo ma i ai ma la’u manamea. Ua ia i ma’ua ni molimau e uiga i le Alii o Iesu Keriso ua mu i totonu o o ma’ua loto, ma ua ma iloa o Ia o lo tatou Faaola.
O le fuaiupu 14 ua faailoa mai ai se isi meaalofa, ma ou te faamamafa atu o se meaalofa foi lea: “Ua tuuina atu i isi ia talitonu i a latou upu, ina ia mafai foi ona latou maua o le ola e faavavau pe afai latou te tumau pea i le faatuatua.” O lea la, a ma uo talavou e, ua tatou i ai uma i se auala ese i lena molimau [o le talalelei toefuataiina]. O nisi o i tatou e i ai na molimau mumu. O isi o i tatou e talitonu i molimau a isi, ma e le afaina lea. E mafai ona outou talitonu i a ma’ua molimau, pe e mafai foi ona outou talitonu i molimau a a outou uo, o outou matua, o outou taitai, o outou faiaoga. E le afaina le talia o molimau a isi. O le mea moni, o se meaalofa le mafai ona faia o lena mea. O lea la, mo outou o loo galulue i a outou molimau, ia manatua o lenei mea o se malaga ma se faagasologa.
I le folafolaga i le Toefuataiga,1 o loo faapea mai, “O i matou o Ana Aposetolo e valaaulia tagata uma ia iloa—e pei ona matou iloa—o loo matala le lagi.” O le a le uiga o lenei valaaulia ia te oe? Afai e finagalo le Atua e talanoa mai ia i tatou, aisea e matuai faigata ai ona logona o Ia?
Sister Rasband: Ia, ou te manatu o le tele o mea e aoga ona maua i lenei olaga e le mauagofie, ma ou te manatu o le saili ma le lotomaualalo ma le tatalo ina ia iloa pe faapefea ona tatou logona le Agaga Paia o se ki lea i le aoaoina pe faapefea ona logona atu o Ia. E masani lava e na o lo tatou maua lava o se lagona lelei. O nisi taimi e mafai ona tatou vaai i se mea. O nisi taimi tatou te faalogo moni ai i upu, ae sese o tatou mafaufau faapea o o tatou lava manatu ma lagona o loo tatou faalogo i ai. Ou te manatu o se mea taua le mafai ona iloa o le ala e logona ai le Agaga Paia mo oe lava.
Ou te valaaulia outou taitoatasi ia vaavaai pea, i taimi uma, agai i le lagi, ma se loto naunautai ma taliga matalatala ia logona o Ia (tagai i le 3 Nifae 11:5).
Elder Rasband: Ua ou maua le afioga a le Alii e ala i le faitauina o tusitusiga paia. Afai e i ai ni o’u faafitauli o loo o’u atuatuvale ai, pe popole ai, i lo’u aiga, i la’u galuega, i lo’u tofiga ma lo’u valaauga, o le a ou taumafai e suesue i autu ia maua ai se mea e mafai ona faaaoga, ona oso mai ai lea o se mea ia te au, ma e pei o loo tuuina mai e le Alii ia te au se taitaiga patino e ala i Lana afioga paia i tusitusiga paia.
O lea e mafai ai ona tupu i le tele o auala. O le a tofu outou uma ma a outou lava ala. E silafia oe e le Tama Faalelagi. E alofa o Ia ia te oe. O outou o Ana fanau, ma o le a Ia tali atu ia te outou i auala e masani ai ma e sa’o mo outou.
O le a lau vaega e sili ona e fiafia i ai o le Toefuataiga po o le Uluai Faaaliga? O a ni upumoni e sili ona e taofia ma le faapelepele na oo mai o se taunuuga o lena mea na tupu?
Sister Rasband: Mo au, e faigofie lava. Ina ua fetalai ma valaau atu le Atua le Tama ia Iosefa Samita i lona igoa, ma faapea atu, “Iosefa, o Lo’u Atalii Pele lenei. Faalogo ia te Ia!” na tupu la’u molimau e silafia e le Atua le Tama ma le Alo i tatou taitoatasi. La te alolofa ia i tatou. Ma afai tatou te faalogo i le Alo, o le a tatou aoao i ala [o le Tama] ma aoaoina i le ala e maua ai le ola e faavavau.
Elder Rasband: O le vaega o le Toefuataiga lea ou te teufatuina, o Iosefa Samita sa na o se tama e 14 tausaga le matua i le taimi na alu ai i le togavao e tali i le faitauina o tusitusiga paia e ole atu i lona Tama Faalelagi i le tatalo faamaualalo. Na avea moni lava Iosefa Samita o se faataitaiga mo i maua i lenei tulaga: sa i ai sana fesili sa ia galue ai mo se taimi umi lava, ma sa ia avatu lana fesili i le Tama Faalelagi, ma le faamoemoe o le a ia maua mai se tali, ma sa ia maua lava.