O Vavega Na Fesoasoani Ia te Au E Maua Ai Faamaumauga o Lo’u Aiga i le Swiss Alps

Sa i ai lava so’u lagona o le a ou auauna atu i se misiona i Suitiselani lea sa ola ai ou tuaa. O lea la, ina ua ou maua lou valaauga i Italia i le 1970, sa ou tei ae sa ou fiafia lava. I le misiona o aoaoga o gagana (lea ua taua nei o le nofoaga autu e aoao ai faifeautalai), sa ou iloa ai o Suitiselani i Saute, lea na o mai ai ou tuaa, o se vaega moni lava o lau misiona. Sa ou iloa na valaauina au e le Tama Faalelagi i lena nofoaga faapitoa mo se mafuaaga.

I le ogatotonu ai i lau misiona, sa tofia ai i maua ma lau soa e avea ma taitai sone i se eria lea e aofia ai Suitiselani i saute—ma sa i ai sa maua taavale.

Sa matou o atu i le nuu o lou aiga, o Vergeletto, ma sue se tasi o ou tausoga. Sa ia faataamilo i maua ma faailoa atu maua i le patele Katoliko, o le, ina ua talosaga i ai, na faaali mai ia i matou tusi o faamaumauga taua mo le eria. Ona ma toe foi mai lea i le fale, ae sa totoina se fatu ia te au o le a tupu i le faagasologa o lau misiona.

Ina ua toe tasi le masina na totoe i lau misiona, sa ou lagona ai e tatau ona ou faia se gaoioiga ma saili mo faamaumauga o lou aiga ae ou te lei toe foi i lou aiga. Sa ou tatalo ia iloa pe o i ai se mea e sili atu e mafai ona ou faia, ma sa ou lagonaina se uunaiga manino mai le Agaga o tau mai ia te au e tatau ona ou maua se kopi o na faamaumauga taua lea na ou vaai i ai i ni masina ua mavae. Sa ou fai atu i lau peresitene o le misiona, sa ou lagonaina e pei ua tatau ona ou toe foi atu i le nuu o lou aiga i Suitiselani ma faamatala i ai le mafuaaga. O le nuu e 87 maila (140 km) le mamao, ae na tuuina mai e lou peresitene o le misiona ia te au le faatagaga e alu ai pea.

Sa oo i le tau afiafi i le taimi na ma oo atu ai i le auala vaapiapi e faataamilo atoa i luga o le mauga agai atu i le nuu itiiti o Vergeletto. Sa ma tutu i le nofoaga autu o le aai, o le ekalesia Katoliko. Na ma tosina atu ma lau soa i le fanuatanu i le isi itu o le auala mai le ekalesia lea sa mumu mai ai pea moligao.

A o ma ulu atu i le fanuatanu, sa manino ma malosi lou lagonaina o le taitaiina o au e le Agaga e ese mai nai lo se isi lava taimi muamua. O lena lagona ma le ea fou i luga o le atumauga na mafua ai se lagona e le mafaagaloina ia te au. I le fanuatanu, sa foliga mai toetoe o maatuugamau uma lava sa i ai lou faaiu. Sa maua vaai foi i le tuugamau o le tama o lou tamamatua; na fai mai o tagata na o atu ia te ia e toe faaleleia o latou ponaivi ua gaui.

Sa ma toe foi atu i le ekalesia e vaai pe mafai ona ma maua le patele. O iina na ma feiloai ai ma se toeaina, o le na tau maia ia i maua o le Il Giorno dei Morti, po o se aso malolo ua lauiloa o le Aso mo ē ua Maliliu (lea ua mafua ai moligao uma i le fanuatanu). Sa tau mai e le toeaina ia i maua e faapea o le patele o loo faia ni faigalotu i nuu tuaoi ma o le a ia toe foi mai i le lua itula.

Sa ma faatalitali ma lau soa, ma ina ua toe foi mai le patele, sa ou faamanatu atu ia te ia la maua feiloaiga i ni nai masina na muamua atu, ona ou fesili atu lea pe mafai ona ou toe vaai i faamaumauga taua a le aulotu.

Sa malie i ai o ia.

Sa aumai i fafo e le patelese pusa o tusi ua faitau selau tausaga le tuai. Sa ou tau atu i le patele o la tatou Ekalesia o loo faaliliuina faatekinolosi ia faamaumauga a le Katoliko i Parma, Italia, e 170 maila (274 km) le mamao. Sa ou fesili atu pe na te faatagaina i maua e ave faamaumauga mo ni nai vaiaso ma fai ai ni kopi.

Sa ia toe malie foi i ai. Sa ou te’i.

Ina ua ma tuua le nuu, sa ou maofa i le mea na faatoa tupu ma na oo lava ina siaki le faata e vaai i tua pe o tamoe mai le patele ia i maua ona o se suiga o le loto. O le lua vaiaso mulimuli ane, na ma toe faafoi atu ai faamaumauga ia te ia, e pei ona i ai le tuugatala.

Ona o le tusitusi, o le faaaogaina o le faa-Latina, ma le faaleagaina mai le tele o tausaga, sa faigata ai ona faitau ia faamaumauga. Ae peitai, i ni nai tausaga talu ai, sa ou matauina ai le faitau selau o faamaumauga mai Vergeletto sa fesootai ma ou tuaa i le FamilySearch. O laina o aiga na masani e na o le tolu i le fa augatupulaga ua faateleina nei i le fitu i le iva augatupulaga!

O le mea sa tupu sa i ai se tagata polofesa i gafa o aiga i Alapama, ISA, e le o se tagata o le Ekalesia ae o loo i ai se lala o lona gafa o le aiga i le lalolagi atoa e fesootai ma au. Sa ia mauaina ma faitau ia faamaumauga mai tusi na ou kopiina i Italia ma faapipii i le FamilySearch. O lenei tagata e ofoofogia; ua ma galulue faatasi i le tele o taimi. Sa ia faamalamalama mai o le utaina o na igoa ma punaoa i luga o lana ala lea e toe totogi ai le Ekalesia mo a latou galuega uma i le faia o faamaumauga o loo faaavanoa i le FamilySearch.

O lea la ua tumu lau siata ili o gafa o le aiga i le itu o lou tama i igoa. Ma ua faamanuiaina au e fai a latou galuega o le malumalu.

E masani ona ou toe tepa i tua i le mafaufau pe aisea o le a faataga ai e se patele Katoliko se alii talavou Amerika—o le sa avea foi ma se faifeautalai mo se isi faatuatuaga—e ave lana faaputuga o faamaumauga taua i fafo atu o le atunuu mo le kopiina. Pe na tatalo ou tuaa mo au? Pe sa latou tatalo mo le loto o le patele ina ia faamaluluina?

Ou te le iloa—atonu o na mea uma. Ae ou te iloa e mafai e le Tama Faalelagi ona fesoasoani e aumai vavega pe a tatou sailia Lana fesoasoani. Ma e pei ona folafola mai e Elder Dale G. Renlund, o le galuega o talafaasolopito o aiga o loo i ai le tele o faamanuiaga mo i latou o i itu uma e lua o le veli: “o le a faamalosia e le Atua, fesoasoani, ma lagolagoina i tatou; ma o le a Ia faapaiaina i tatou i o tatou mafatiaga loloto. A tatou aoina o tatou talafaasolopito o aiga ma o i le malumalu e fai ma sui o o tatou tuaa, o le a faataunuu e le Atua le tele o nei faamanuiaga folafolaina i le taimi lava lena i itu uma e lua o le veli.¹ O loo taitaia e le Alii lenei galuega, ma a e faalagolago ia te Ia, e mafai ona Ia faia ni vavega mo oe ma lou aiga a o e taumafai e faapotopoto Isaraelu.