Mataupu Faavae o le Auaunaga

Auauna Atu ia i Latou e i ai Luitau o le Soifua Maloloina Faaletino

E mafai ona avea i tatou ma aao o le Faaola e faamafanafana ma fesoasoani.

Ata

man delivering groceries

Mai, mea e teena e le tino [allergy], aafiaga tumau o le soifua, po o le matua e mafai ona aafia ai le gafatia o se tagata e tapuai pe auauna atu ai. Afai e nofouta ia uso ma tuafafine o auaunaga i nei manaoga, e tele auala e fesoasoani ai i tagata o le Ekalesia o loo i ai ni luitau faaletino ina ia sili atu ona fiafia i faamanuiaga o le talalelei.

Ina ua maua se tina talavou i le kanesa, sa ia lagonaina le tuuatoatasi ma le faatumulia i le fefe. Ae ina ua salalau atu le talafou o lona mai i lana uarota, sa vave ona siomia o ia e le alofa ma le popole e ona uso a tamaitai. A o amataina ona togafitiga faigata, sa momoli atu o ia e tamaitai i ana siaki atofaina ma nonofo faatasi ma ia i taimi uumi o ona togafitiga. Sa latou tatalo faatasi ma ia, faamalosiau ia te ia, aumai ni nai meaai mama e mafai ona ia aia, ma aumai ni taumafataga i lona aiga i lea vaiaso ma lea vaiaso. O isi uso na faaalu taimi mai o latou lava olaga pisi e faamama ai lona fale. Na iloa e se tasi o uso e i ai ni togafitiga o le a faafaigata ai ona moe, o lea sa ia fuafuaina ai ni asiasiga i le leva o le po e matamata ai ni ata tifaga malie. Nai lo le feliuliuai i lona moega, sa mafai e le tina talavou ona liliu ese mai le fefe mo sina taimi ma lagona ai le mana faamalolo o le ’ata ma le faauoga. E ala atu i nei auaunaga, faamanuiaga faaleperisitua, ma anapogi a le uarota, sa tauaveina ai o ia i se taimi sili ona faigata, ma sa tutupu ae ni noataga malolosi o le alofa i le va o i latou uma sa aafia ai.

E le faigofie i taimi uma le auauna atu ia i latou o loo i ai ni luitau faalesoifua maloloina. Ae e mafai ona tatou mulimuli i le faataitaiga a le Faaola o le aapa atu i o tatou uso ma tuafafine i le alofa pe a tutupu mai ni luitau faalesoifua maloloina. E mafai ona avea i tatou ma Ona aao e faamafanafana ma fesoasoani ia i latou o siomia i tatou, e aofia ai i latou o o latou luitau e le o iloagofie i o tatou mata faaletino.

Manatu e Mafaufau i ai

1. Faaaloalo i lo latou tulaga e le faalauaiteleina. O nisi tagata e matamumuli i faafitauli tau le soifua maloloina lea atonu e le afaina ai oe. Ia fesili e le aunoa pe ua lelei ona faasoa atu o latou tulaga i isi ae e te lei faia.

2. Uunaia togafitiga faafomai masani. Aloese mai le fautuaina atu o oloa o le soifua maloloina po o auaunaga e le’i pasia po o fafo atu o le tausiga faafomai masani. Faasoa atu manatu ma aafiaga e pei ona e lagona ai le uunaiaina, ae ia faamalosiau i isi e faia ni a latou lava sailiiliga ma fefautuaai ma ni tagata fomai ua aoaoina.

Ata

adult woman helps her mother put on clothing

Ata tusi mai le Getty Images

3. Auauna atu ia i latou ma tatalo mo i latou. A feagai tagata i nisi taimi, ma faafitauli tau le soifua maloloina po o tulaga e muai iloaina e pei o le fanauina o le pepe po o taotoga, o lau auaunaga, meaai, agalelei, ma tatalo e faaalia ai lou popole. I se faalavelave faafuasei, o lou naunau i le taimi lava lea e fesoasoani atu e mafai ona taua tele.

4. Fesoasoani e faamalosia i latou. Aemaise pe a feagai tagata ma faafitauli ogaoga po o faafitauli umi tau soifua maloloina, latou te manaomia ni mea e sili atu nai lo lau fesoasoani po o auaunaga, e taua e pei o na mea. E mafai foi ona latou manaomia se fesoasoani e aoao ai e fai mea nei mo i latou lava:

Faailoa o latou manaoga. O le a se mea ua latou iloa e uiga i lo latou tulaga? O a ni o latou lagona e uiga i ai? O a o latou popolega i le taimi nei ma le lumanai ma mea e manaomia? Faalogo ma le agaalofa ma aunoa ma se faamasinoga e fesoasoani ia i latou ia feagai ma le faamaoni i mea e moni.
Ia manatua o latou malosiaga. Fesili atu e uiga i isi ituaiga o faigata na latou feagai ma mea na latou aoaoina mai na aafiaga. Tau i ai uiga lelei, tulaga faatauaina, ma tomai ua outou matauina o loo i ai ia i latou. Fesili atu po o a tulaga faatauaina faaletagata lava ia e sili ona taua ia i latou e ola ai i lenei tulaga fou. E mafai faapefea ona latou ola i na tulaga faatauaina?
Fatu se fuafuaga. O a ni faaiuga e manaomia ona vave faia, ma o a ni faamatalaga faaopoopo latou te manaomia e faia ai na filifiliga? O le a se fesoasoani vave po o ni punaoa latou te manaomia, ma o a ni mea o le a latou manaomia i le taimi umi? O a ni filifiliga o latou vaaia? O a itu lelei ma itu leaga o nei mea taitasi?
Faatulaga la latou vaega. O ai e mafai ona fesoasoani? O le aiga moni lava ua i ai le uluai tiutetauave e fesoasoani atu, ae o le aiga lautele, uo, isi tagata o le uarota, o tagata tomai faapitoa o le soifua maloloina, auaunaga faalauaitele o loo i ai, o oe ma lau soa, ma le Agaga Paia e mafai ona avea uma ma vaega o la latou au. Pe a talafeagai ma faatasi ai ma le latou faatagaga, ia faaaofia ai le peresitene o le Aualofa ma le peresitene o le korama a toeaina i le fesoasoani ia i latou e suesue pe mafai faapefea e oe, isi tagata, ma punaoa a le Ekalesia ona fesoasoani moni.
Valaaulia le Agaga. Tatalo faatasi ma i latou ma mo i latou, e valaaulia le Alii e faamautu ma taiala a latou faaiuga ma fesoasoani ia latou lagonaina Lona alofa.