Tamara are i Karawa e Tangirira bwa Ti na Manga Okiria
Iroun Unimwaane Ulisses Soares
Man te Kooram n Abotoro n te Tengaun ma Uoman
Ko a waakina kawaim n oki nakon Tamam are i Karawa nakon ae ko ataia.
Au karo, Aparecido ao Mercedes Soares, a aki toki ni mii bwa a karaoa aia mwakuri ni mitinare. A tangiria ni kabooimwiin mwaitin ana kakabwaia te Uea are a roko nakoia aia utu man te tai are a kaaina iai te Ekaretia. E reke tibwangaia aei n 1989 ngke a butimwaea te wewete bwa a na mwakuri i São Paulo Brazil Tembora.
Tii inanon tabeua namwakaina n aia mition, e ngae n anne, e a rootaki tamau n te mamaara ao e a mate. N ana tai n taunimate, I rabwata tinau ngkai ti tei imatan bwaokin tamau.
“Tinau, tera ae ko nang karaoia ngkai?” I titiraki.
“Ngai ma tamam ti miia taekan te mition aei,” e kaeka. “I a karaoa au beku ngkai, ao N na reitinako ni beku—ibukina ao ibukiu.”
Te beretitenti n te tembora ae akoi e katabea temanna te aine ae mate buuna bwa e na riki bwa toan tinau ni beku, ao e reitinako ni karaoa ana mition tinau n te maan ae riaon 20 te namwakaina. E kakabwaiaaki man ana mwakuri ni mitinare, ao man ana onimaki ao ana katooto I a kakabwaiaaki iai ma au utu.
Inanon ana tai ni mitinare, a mate uoman mwaaneu, ao Ngai ma buu a mate uoman natira. Are te moan e bungiaki n aki koro unana ao e aki maiu, ao ti kabua are te kauoman bwa e bwaka. Inanon tain te kangaanga ibukiia au utu, e memena tinau ikekei inanon te tembora ni katoabong ni kateimatoaakin ana onimaki—ao ni kakorakorai ara onimakii—n te babaire ni kamaiu.
Ana onimaki n te ikotaki ae mimitong ma au karo ao te berita ibukin te maiu are akea tokina imatan ara Karo are i Karawa e kateimatoa inanon 29 te ririki ngkai bon te aine ae mate buuna ni karokoa banen ana bong, ngke 94 ana ririki.
Te Babaire ni Kakukurei
Ti rangi ni kakabwaiaaki ngaira Aomata aika Itiaki n ataia ngkai e a kaman tia ni kaokaki te euangkerio. Te babaire ni kamaiu ni koauana bon “te babaire ni kakukurei ae korakora” (Aramwa 42:8). E kaotaki n te berita n te babaire ni kakukurei bwa aomata ake a koaua man kakaonimaki a na karekea, te kaniwanga ae akea tokina imatan te Atua.
N aron ae kaotaki n Reirei ao Berita aika Tabu, e kuri n ae ni kabane natin Tamara are i Karawa a na roko n te abanuea ae mimitong. Rinanon ana Mwakuri ni Kamaiu te Tia Kamaiu, naake a na otinako “ni mangautiia naake a raoiroi” (Reirei ao Berita aika Tabu 76:17) e na karaoaki inanon te kororaoi ao ni karekea te abanuea ae te tiretio.
Angiia kaain Ana Ekaretia Iesu Kristo Ibukiia Aika Itiaki ni Bong aika Kaitira a butimwaea te reirei aei. E ngae n anne, tabeman a na aki kakoaua ae e bon kaineti nakoia. A karaoi taian kairua. Rikirakeia n tamnei, e ngae ngke e teimatoa, e bon karaurau. A miimi ngkana a na bon kona n tau ibukin te abanuea are te teretio.
Ngkana ko kuneko bwa ko mena n te kurubu anne, uringi ana taeka te Uea nakoia taan kakoaua n te kurubu are teuana: “Tabeki atuumi ao kabeebetei nanomi, bwa I ataa te berita ae tabu are kam a tia ni karaoia nakoiu” (Motiaea 24:13).
E tangiriira te Atua ao n tangiria bwa ti na bane n oki nakon mweenga. Ko a waakina kawaim n oki nakon Tamam are i Karawa nakon ae ko ataia.
“Ake a raoiroi ao a koaua”
N Reirei ao Berita aika Tabu mwakoro 76, e kaotia te Uea bwa a na kanga Natina ni kona ni karekea te abanuea ae te tiretio. Ngkana ngkoe kaain te Ekaretia ao iai am koaua, ko a kaman tia ni waakina kawaim, n aron ae kabwarabwaraaki n Reirei ao Berita aika Tabu:
-
Ti riai ni karekea “te koaua ibukin Iesu” ao ni a kakoauaa “arana” (te kibu 51).
-
Ti riai ni bwabetitoaki ni kateboaki iaan te ran (taraa te kibu 51).
-
Ti riai “ni karekea te Tamnei ae Tabu man te katoka bai” iroun are e katabuaki ao ni kabaeaki nakon te e mwaaka aei; (te kibu 52).
Mwaneka ake tabeua, e ngae n anne, e anaa te konabwai inanon maanin am tai ni maiu, ao tabeman kaain te aro a namakina te bwarannano ngkana a karaoa te kairua ao akea aia kouru. Ti bane ni mwakuri iaon bwaai aika a riai ni karaoaki aikai. Te kakaitau nakon ana Mwakuri ni Kamaiu Iesu Kristo, ti bane ni kona ni karekea:
-
Kawakin tuua “tebokaki ao ni kaitiakaki man [ara] bure ni kabane” (te kibu 52).
-
“Tokanikai n te onimaki” (te kibu 53).
-
Ko na “kabaeaki iroun te Tamnei ae Tabu n te berita” (te kibu 53), are bon te Tamnei ae Raoiroi, ni kaotia “nakon te Tama bwa [ara] otenanti ni kamaiu a kaman tia ni karaoaki ao berita aika a irekereke mangaiia a bon kawakinaki.”1 E berita te Tama n te kabaebae aei nakoia “ni kabane ake a raoiroi ao a koaua” (te kibu 53).
Te riki n “raoiroi ao ni koaua,” e kabwarabwara Beretitenti Ezra Taft Benson (1899–1994), bon “te kabwarabwara ae tau ibukiia naake a ninikoria n te kakoaua ibukin Iesu. A ninikoria ni katana te koaua ao te raoiroi. Aikai kaain te Ekaretia ake a karikirakea nakoaia n te Ekaretia (taraa R&B 84:33), a kabwakai aia kabwianibwai ao aia angabwai, ao a maiuna te aro ni maiu ae itiaki, a kamatoaia aia taan kairiiri n te Ekaretia man aia taeka ao aia mwakuri, a kawakina te Tabati ngkai te bong ae tabu, ao ni kawakin ni kabane ana tua te Atua.”2
Karekean te rinan ae te kabanea n rietaata n te abanuea ae te tiretio, are n angin te tai e nanonaki nakon te karietataaki, ae teuana te kabanea ni bwai ae e riai ni karaoaki. Ti riai n rin inanon “te kabanea ni berita ae rietata ao e boou ae akea tokina n te mare” (Reirei ao Berita aika Tabu 131:2), ae karaoaki inanon te tembora man te kariaia ae riai n te nakoanibonga. Ni kaineti ma ana babaire n nanoanga Tamara are i Karawa, ti ataia bwa kakabwaia n te tiretio a kona n tauraoi n te maiu are imwiina nakoia naake e aki reke tain karaoan aia otenanti ni kabaeaki n te maiu aei ma a teimatoa ni karokoa te toki.
Ti reiakinna n ana Boki Moomon bwa ni kabane natin Tamara are i Karwa ake a kawakin Ana tua ao n teimatoa ni kakaonimaki, n aki tabe ma kangaanga aika a riki inanon te maiu, a na kakabwaiaaki ao “a na butimwaeaki mai karawa, ao a na maeka ma te Atua n te aro ni kukurei ae aki totoki” (Motiaea 2:41). Iai te kantaninga ibukira n taainako n ana babaire ni kamaiu Tamara are i Karawa ae nanoanga man tangira.
Kakabwaia man te Rairannano
Tamnei iroun Hyun Lee
Ara burabeti ae tangiraki, Beretitenti Russell M. Nelson, e reirei: “Te Uea e aki kantaninga te kororaoi mairoura n te tai aei inanon rikirakera n tamnei. Ma E kantaningaira bwa tina rikirake n itiaki. Te rairannano ni katoabong bon te kawai nakon te itiaki, ao te itiaki e uota te mwaaka.”3
E taku naba Beretitenti Nelson bwa “rikira n tamaroa ni katoa bong” e anganiira te “mwaaka ni kakorakoraaki.”4 Ngkai ti kabongana te mwaaka ni kakorakora ni kaitara te aro ni mwaane ke n aine (taraa Motiaea 3:19), ti birimwaaka ni waaki inanon kawaira n oki nakon Tamara.
Ibukina bwa akea te bwai ae bareka ae kona ni maeka imatan te Atua (taraa Mote 6:57), ti mwakuri n taainako ni karaoan te bitaki ae koaua ni maiura n tamnei—n ara iango, nanora, ao n anuara. N ana taeka te Abotoro are Bauro, ti ukora te riki n aroia aomata aika tibwa karikaki nabangkai inanon Kristo, ni karaurau n onei arora ake ngkoa nakon arora ae boou (taraa 2 I-Korinto 5:17). E roko te bitaki aei teutana imwiin teutana ngkai ti kataia ni katamaroaira riki teutana ni katoa bong.
N iriiran te Tia Kamaiu ni kataia n riki n ai Arona bon te waaki ni kaakeako moa, are E kabwara121:9nakoa nanona bwa ti na tabeki ara kaibangaki (taraa Mataio 16:24–26). Ti tabeka ara kaibangaki ngkai ti:
-
Tararuai ara iango, bwaai ake e ririkanai nanora, ao n tangiri.
-
Taotaonaki n nano “n tauroi ni butimwaei bwai ni kabane ake e tangiria te Uea bwa e na karaoi” iaora (Motiaea 3:19).
-
Kaakeai mairouna bwaai ni kabane aika tiaki aron atua (taraa Moronaai 10:32).
-
N tauraoi n anga ara kantainga nakon ana kantaninga te Tama, n aron are e karaoia te Tia Kamaiu.
Ao tera ae ti na karaoia ngkana ti bwaka? Ti rairaki nakon Tamara ao ni butiia bwa e na “kamauira n raraan Kristo ni kabwara bure bwa ti aonga ni karekea kabwaran ara bure” (Motiaea 4:2). Ti kataia riki n tokanikai iaon mamaarara ao ni katoka te bure. Ti tataro ibukin te akoi, te “mwaaka ni kona ao te kamaiuaki n tamnei” iroun Iesu Kristo.5 Ti tabeki ara kaibangaki ao ni kateimatoa mwanangara, e ngae ngke e ananau ao n rawawata, nakon te aba ni berita Imataia.
Onimakina Ana Berita
Rabwatara ae aki mamate ao te maiu ae akea tokina bon ana mwakuri te Atua ao mimitongina (taraa Mote 1:39). Ara mwakuri ni karekea te mimitong anne e raonaki ma te riki ni kakaonimaki inanon ara koaua inanon menara i aon te aba.
N te mii ni burabeti, te Burabeti ae Iotebwa Timiti e nooria bwa naake a kakaonimaki “a na tokanikai i aon bwaai ni kabane” (Reirei ao Berita 76:60). E koreia, “Ni kabane kaintokanuea ao tautaeka, taabo aika tautaekanaki iroun te nati n uea te mwaane ao mwaaka, a na kaotaki ao ni kaakaki i aoia ni kabane ake a teimatoa ma te ninikoria ibukin ana euangkerio Iesu Kristo” (Reirei ao Berita aika Tabu 121:29).
Ngkai ti onimakin berita aikai, ti na aki bwarannano i bon ibukira, irouia aika tangiraki iouia, ke iaoia natina te Atua ake tabeman. Ti kataia ni karaoa ara kabanea n tamaroa ao ni buokiia tabeman bwa a na karaoa naba anne. N oin tamaroara, akea mai buakora ae na tau raoiroina n te tai teuana ni kamaiuaki n te abanuea ae te tiretio, ma “tii rinanon mwakuri aika raraoi, ma ana nanoanga, ao ana akoi te Mesia ae Tabu” (2 Nibwaai 2:8), te kakabwaia anne e teimatoa ni karekeaki.
Ngkai ti reitinako ni kakaonimaki, I kakoaua bwa ti na karekea te “kukurei ae aki totoki” imatan te Tama ao te Nati. “O uringnga, uringnga bwa a koaua bwaai aikai; bwa e a tia n taekin te Uea ae te Atua” (Motiaea 2:41).