Rerein te Mwakuri n Ibuobuoki
Mwakuri n Ibuobuoki nakoia Koraki ake Iai Kangaangan Marurungin Rabwataia
Ti kona n ibuobuoki n te kawai are karaoia te Tia Kamaiu ni kabebete ao ni buoki.
Mamaara, rabwarabwataki, mwauku, ke aia ririki e kona n roota ana iango te membwa n taromauri ke ni beku. Ngkana mwanera ao tarira n ibuobuoki a nakoraoi nakon kainano aikai, a mwaiti kawai ni buokiia membwa ake iai aia kangaanga ma marurungin rabwataia ni karekea te kukurei n ana kakabwaia te euangkerio.
Imwin ituakina n te aoraki ae te kaentia te kairake n tina, e namakina te maroa ao n rootaki n te maaku. Ma ngke buta nako rongorongon aorakin neiei n ana uoote, n te tai ae waekoa e otabwaniniaki n aia tangira ao aia tabeaianga ana mitinare n aine. Ngke e waaki aron bwainaorakian neiei ae kangaanga, mitinare n aine a uotia n te kaa nakon ana tai n tutuo ao n tekateka ma ngaia inanon tain katauraoakin ana bwai n aoraki ae maan. A tataro ma ngaia, a kaungaa, a uotii tabeua amwarake are e kona ni kanna, ao ni uoti amwarake nakoia ana utu inanon wiiki ma wiiki. Tabeman mitinare aine anai aia tai ni kitan oin tabetabeia ni kaitiaka ana auti neiei. Temanna te mitinare n aine are e ataia bwa te bwai n aoraki are e na kangaanga reken te matu iai, ngaia are e baireia bwa e na tiku ni kabwakanako tai ni mataku n tamnein te kakamanga. Onean mwiin iangoan te kanimatu, te tina ae kairake aei e a konaa n noria bwa e a nako man te maaku n te tai anne ao n namakina mwaakan te kamaiu n te ngarengare ao te iraorao. Rinanon karaoan mwakuri n ibuobuoki aikai, kakabwaia n te nakoanibonga, aia aki mamatam kain te uote, e uotaki neiei rinanon taain ni kangaanga, ao e korakora kabaean te tangira are rikirake imwarenaia ni kabane ake a irekereke.
Mwakuri n ibuobuoki nakoia ake iai kangaangan marurungiia e aki bebete n taainako. Ma ti kona n iriira ana katooto te Tia Kamaiu n roko nakoia tarira ao mwanera inanon te tangira ngkana a rootaki marurungiia n te kangaanga. Ti kona n ibuobuoki n te kawai are karaoia te Tia Kamaiu ni kabebetei ao buokiia koraki ake a katobibiira, n ikotaki ma koraki ake aia kangaanga aki nooraki ni matara n rabwata.
Iango ake a na Baireaki
1. Karinea aroia ae raba. Tabeman aomata a bon maama n taekan marurungiia are ko na aki katabeko iai. N taainako titiraki ngkana e bon OK n tibwaua aroaroia ma tabeman imwain ae ko karaoia.
2. Kaungaa te kainibaire n tararua ni bwaai n aoraki. Totokoi mwiokoan bwaai ni kamarurung ke mwakuri n ibuobuoki ake a bon akea riaia ke a ritinanikun kainibaire n tararua ni bwaai n aoraki. Tibwauai iango ao taneiai n aron are ko kairaki n namakinna, ma kaungaiia tabeman ni karaoi oin aia kakae ao ni marooro ma taan rabwakau ake a reiakinaki ni bwaai n aoraki.
Kamataata n te tamnei iroun Getty Images
3. Beku ibukiia, ao tataro ibukiia. Ngkana aomata n tabetai a rinanon, kangaangan te marurung ae uarereke-taina ke taratarakin aroaroia n aron bungiakin te teei ke te mwakuri ni korokoro, am mwakuri n ibuobuoki, taian amwarake, akoi, ao tataro a kaota am tabeaianga. N tain te imentientii, am anganano n tauraoi nakon te ibuobuoki e kona n riki ni kakawaki.
4. Buokiia ni kakorakoraia. Moarariki ngkana aomata a kaaitarai kangaangan ke kangaangan marurungiia ae abwabwaki-taina, a kainanoa ae bati riki nakon am buoka ke mwakuri n ibuobuoki, n aron kakawakiia n aron akekei. A riai naba ni kainanoa buokaia n reiakiniia ni karaoi bwaai akana imwina i bon ibukiia:
-
Atai Kainnanoia. Tera ae a ataia ngkai moa n taekan aroia? E kanga aia namakin n taekana? Tera raraomaia ao kainnanoia nakon taai aika ana roko aika rangi ni kataweaki? Ongora ma te nanoanga ao n akean te babaire ni buokakiia ni kaitaraa te bwai ae koaua.
-
Uringa korakoraia. Titiraki taekan tabeua aekan kakaitara are a tia ni kaaitarai ao tera ae a reiakinna man taneiai akanne. Katebenakoi tauiia aika nakoraoi, bonganaia, ao konabwaia ake ko a tia n noori irouiia. Titirakiniia bwa tera bonganaia i bon irouiia ae a rangi ni kakawakii nakoia ni maiuakin inanon aroia ae boou aei. A na kanga ni maiuakin bonganaia akanne?
-
Karaoa te babaire. Tera babaire akia a kainanoaki ni karaoaki ni waekoa, ao tera rongorongo riki tabeua aika a kainanoi ni karaoi babaire akanne? Tera buoka aika karaweaki ke bwaai n ibuobuoki ake a kainanoi, ao tera ae a na kainanoi n te tai ae abwabwaki? Tera rinerine aika a nooria? Tera raoiroin ao buakakan rinerine aikanne n tatabeua nako?
-
Barongai aia tiim. Antai ae kona n ibuobuoki? Utu ni kaan a karekea te moan katabeaki nakon te ibuobuoki, ma utu ake a reitinako, rao, tabeman membwa n te uoote, taan rabwakau n te marurung, ibuobuoki man te botanaomata aika tauraoi, ngkoe ao toam, ao te Tamnei ae Raoiroi kan kona n bane n riki bwa kaain aia tiim. Ngkana e riai ao man aia kariaia, karekerekea te beretitenti n te Bootaki n Aine ao te beretitenti n aia kooram unimwaane ni buokiia ni kakaea bwa ko kanga ngkoe, ao tabeman membwa, ao bwaai n ibuobuoki n te Ekaretia ni kona ni karaoa te ibuobuoki.
-
Kaoa te Tamnei. Tataro ma ngaiia ao ibukiia, ni kaoa te Uea ni kamatoa ao kairi aia babaire ao buokiia n namakina Ana tangira.