Nakomai, Iriirai
Tokanikai iaon Kakaaitara
Reirei ao Berita aika Tabu 71–75
Tuun 28–Turai 4
Kamataata n te tamnei iroun Dan Burr
Te kaotioti inanon Reirei ao Berita aika Tabu 71 e tuangaki Iotebwa Timiti ao Sidney Rigdon bwa ana nako ni kabwarabwara ni katoka te namakin n aki iraorao are e a rikirake ni kaitaraa te Ekaretia e riki man ukoran kaairua mairouia membwa ake a bua aia onimaki. Inanon 100 te ririki imwina, Unimwaane Spencer W. Kimball man te Kooram n Abotoro n Tengaun ma Uoman e karekea te taneiai ae ti te arona ni kabwarabwara ni kamanoa te Ekaretia.
Unimwaane Kimball e Kawara Ecuador
N aia tai n nako Otavalo, Ecuador, inanon 1965, Unimwaane Kimball e tuangiia mitinare ni kaota ana Boki Moomon nakoia kaain te aba aika tenaan Otavalans. E ngae n anne, mitinare a kaaitibo ma te totoko ngke tenaan Otavalan a moanna ni kabutanakoi keewe ibukiia n te kaawa ae uakaan, ao mitinare a kataia n tokanikai iaon taian kabuakaka.
Uoua te ririki imwina, Unimwaane Kimball e raoniia tabeman membwa ao mitinare n te bootaki irarikin te kaini bati. Ngke kaain te tabo anne a ruo man te bati, a kaoiia mitinare bwa ana ongora iroun ana abotoro ae maiu Iesu Kristo. N te tai ae waekoa, e kaniia 20 te aomata aika a ikotaki. Ngke a moana aia bootaki mitinare, e rikirake mwaitiia ake a roko n raka iaon 100.
Ngkanne e taetae Unimwaane Kimball. E tuangiia rokon Iesu Kristo iaon te aono n Amerika. E kotea karawa ao e taetae ibukin te bwanaa ae uarereke man maraara n rau, mai karawa are e katanoata kaotin Natin te Atua, are e kuneaki n Ana Boki Moomon. Unimwaane Kimball e uringnga, “Ni kabane maata a rimwiin mwaingiu nako karawa n aron ae kanga te Tia Kamaiu e mena ikekei n roko n rinanon maniin taian nang.”1
Imwiin aei, mitinare a teimatoa ni kataia ni reireiniia tenaan Otavalans. Mitinare n aine a reireina te mwaane ae arana Rafael Tabango, are e bwabetitoaki n Turai 14, 1968—te moan n aomata irouia Aika Itiaki ni Boong aika Kaitira i Otavalo. Buuna, Teresa, e kaaina naba te Ekaretia. E aki koro 15 te ririki imwina, te titeiki e barongaaki i Otavalo, ma te Tari Tabango are e weteaki bwa ana moan tamanuea.