Kairake n Ikawai
Ngkana ko Nanokokoraki, Kateimatoa te Onimaki
E ngae ngke inanon taai aika ti nanokokoraki n ara atatai ni bwain te tamnei, a kona ara koaua ni waekoa n reke n te mwaiti ae korakora ae kanga e a onrake n te ran.
Bwa ti kaikawaki n te Ekaretia ke ti rairaki imwiina inanon maiura, e mwaiti ibuakora ae a tia n rinanon taai n titiraki ke n aki kakoaua. Ti kona n tia n namakini namakin tamnei aika a kakaongora ma ngkai ti a kuneira n kakaenako: waaki n atatai iaon maiun tamnei akekei a koaua, ke I ti iangoa namakinan te Tamnei? Tera ngkana akea te euangkerio ao te Ekaretia ae e koaua? Ao tera aron au titiraki ae akea kaekaaia? N na kanga n tiku bwa kaain te Ekaretia ngkana I aki koaua bwa e bon tiku ni koaua te Ekaretia?
Irou, I kubanako bwa titiraki aikai a roko imwiin tian karaoan au mwakuri ni mitinare! I a tia n ataa te koaua ma te atatai aio are I tangiria n taekinna nakoia aomata inanon teuana ma te itera n ririki—ao ngkai I a nanououa ni bwaai ake I bane n atai ao ni akoaua. Ngkana e aki koaua te euangkerio ngkanne te tai are ko kabanea ni karaoa iai am mition e bon kabanetai. Ma ngaia are a bane ni koaua, bwaai ni kabane aika I a tia n reiakin? Ke I bon ti tangiria bwa a na koaua? Ngke I a tia n nooria raoraou ni kitana te Ekaretia ao inanon korakaiu n au onimaki, I aki ataia ngkana I a tia ni kekeweai.
N te tai n nanououa aei, e aki toki nanakou nakon te taromauri ke n ongotaeka nakon tuua bukina bwa iai au titiraki aika a bubura. Irarikin anne, ibukina bwa iai au titiraki, I kataia n toua mwiin ana reirei Beretitenti Russell M. Nelson ni “karikirakea [au] konabwai n te maiu n tamnei ni karekea te kaotioti.”1
I ataia bwa “akea te bwai ae kauka karawa ae ti tebo ma ikotakin rikiraken te itiaki, te ongotaeka ae koaua, te ukeuke ni koaua, kanuaingkami n n ana taeka Kristo inanon Ana Boki Moomon, ao n teimatoa n nanakon te tembora ao te mwakuri ibukin rongorongon te utu.”2 I namakinna ae e rangi ni kakawaki te tiku ni kaan nakon te Atua. N tokin te waaki, bon ti Ngaia are e na reke irouna kaekaan au titiraki.
Ana Karaki Eunice
Te bong teuana ngke I tabe ni wareka Aika Itiaki: Karakinan ana Ekaretia Iesu Kristo ibukiia Aika Itiaki ni Boong aika Kaitira, I a kunea naba te karaki ae moan te kakaongora ae rongorongon te aine ni moan Kaokan te euangkerio. E taraa n ae Eunice Franklin iai naba irouna aekan au titiraki ma au raraoma.
E bwabetitoaki Eunice i New York iroun te mitinare ae arana Elijah Abble. E a tia ni bon bwanin rairakina nakon te euangkerio n ana tai ni bwabetito. Ma imwiin ae e a nako Canada Elijar n nako ni kabwarabwara, e a moanna Eunice n raraoma n taekan te euangkerio ao bwaai ake e a tia n atai bwa a koaua. E a moanna ni ukeuke nako ngkana Iotebwa Timiti bon te burabeti ao bwa ana Boki Mormon bon te boki ae e tabu. E kabuai boong aika a mwaiti n aki mamatu, n iangoia bwa e a tia ni mwamwanaaki.
Te Uea e kaota korakain Eunice nakon Elijah inanon te mii, ao e waekoa n oki nako New York. E kubanako Eunice ngke e karebwerebwe n ana mataroa—e a tia ni iangoia bwa e na tuangnga bwa e aki kakoaua ngkana e a manga nooria. Ma e ngae n anne, e kariaia bwa e na rin. Ngke Elijah e kaoia nakon ana kabwarabwara n te tairiki anne, e aki waekoa ni kaeka ao e rawa n nako. Ma n tokina e butimwaaia ao e nako n ongora n te bwai are e na taekinna.
N ana kabwarabwara, e taekina taekan 1 Betero 4:12, are e taku bwa kam na “tai mimi n te bwai ni kamaraki are e nang kataingkami.” Te bwai ni kamaraki are e ukora kamaunaan ana onimaki Eunice e aki kona n tokanikai—ngkai Eunice e ongao bwanaan Elijah ngke e taetae, e a bua nako raraomana. Aika itiaki a taekinna n te aro aei: “Te koaua are e a tia n namakinna n tetaina e a manga oki.”
Te Kakoaua e a Manga Oki ni Makuakua
E rootai te bwai are e a tia n rinanona Eunice, ao I a tia n iangoia n te tai ae okioki. N airon Eunice, I reireiaki man bebeten ao mwaakan ana taeka Elijah. Ti riai n “iangoai bwa e aki kamimi” n iai titiraki ni kaineti ma ara onimaki. E taraa n NAKORAOI. Ngkai te koaua e a tia ni bwaro rikaaki mai karawa, a na iai taai ake ti na namakina te rongo n tamnei. Ti na kona ni ukeukenako ngkana arona bwa ti a tia namakina te kamatoaki n te tamnei. N akean kaeka ke kamatoa ni karokoaki, ti kona n reitanako te tataro ibukin te ranga ni karau ibukin te kaotioti. Ti kona ni kakaea te kakoaua n ataia bwa tera te koaua are ngkoananoa e bon tiku naba ni koaua ngkai. E reirei Unimwaane Jeffrey R. Holland man te Kooram n Abotoro n te Tengaun ma Uoman: “Ngkana e riai bwa ko na tataroakinna ao n onimakinna, e bon koaua ngkai. … Kaitara am nanokokoraki. Tokanikai iaon maakum.”4
Ni kaukan te mataroa nakon raoraona ni mitinare kaua, e ngae ngke e bon raraoma bwa e aera e na riai, e manga kauka nanona Eunice. E kona te Uea ni karoko iroun Eunice ao ni buokia n namakina kamatoan bwaai ni kabane are e a tia n ataia. N aekana naba anne ngaira n tatabemaniira nako ti kona ni katuka te mataroa bwa e na uki nakon te onimakie ngae ngke ti rootaki ma te aki kakoaua. Ti kona ni bon reitinako ni karaoa ae e eti ao ni ukoukora te kaotioti—e ngae ngkana ti aki koaua bwa tera etin raoi ae ti karaoia.
Ti katuka te mataroa ni uki man karaoan bwaai aika a uarereke are ee a tia n tuangiira te Atua bwa a tamaroa ibukin tamneira. Ti na kawakin tuan te Tabati n tabuia ao ni kaei ara bootaki n taromauri. Ti wareki booki aika tabu, e ngae ngkana tii teuana te kibu n te tai teuana ma teuana. Ti ongora n te anene n taromauri ke te marooro n te maungatabu. Ti taetae nakon te Tama are i Karawa n taekan ara raraoma ao ara kantaninga ao n tuangnga bwa e na buokira n ataa te koaua. Ti kawakini tuua ake tebwina, te rairannano, ao ni ukera ana iraorao te Tamnei ae Raoiroi.
Ngkana e na kona n reke iroura ae akea riki bwa tangiran te onimaki, ti kona n reitinako ni karaoi bwaai aika a uarereke ao ni kataua te mwakuri inanora. Ti kona ni karekea te mwaawa inanora bwa e aonga ni mwaiti te koaua ae na bwebwerake. (Taraa Aramwa 32:27.)
Te Bwai ae I Ataia
E ngae ngke inanon te tai teuana ma teuana I a tia ni miimi, n tionako, ao ni mamaara, I reiakinna i bon irou bwa aio ana Ekaretia Kristo. E ngae ngke tiaki te aomata ae kororaoi Iotebwa Timiti, I ataia bwa te burabeti ae e kairaki mai i eta ae e anga nano n bwaai ni kabane ao e karaoa te tamaroa ae bwanin. I ataia bwa ana Boki Moomon bon te rekooti n rongorongon ngkoa ao e bon koaua ao booki aika tabu a kawakinaki tii ibukin ara bong. E kamatoai koaua aikai Tamara are i Karawa nakoiu ni katoa bong. Ao I kukurei bwa e kamatoai naba koaua aikai nakon Eunice Franklin.
I ataia bwa n ara tai ni kauki ara mataroa ma nanora nakon te koaua, E na buokiira te Atua n namakinna ae e bon koaua ao ake e aki rinanon te Tamnei ae Raoiroi. Ara atatai ni maiu n tamnei e naaki kona ni kakeaaki n te tai anne. Ao ni katoa te tai imwiin anne, ngkana ti namakina te aki oota raoi ae e a manga okirikaaki, ti kona ni kauringiira bwa ti uara. N aron ae e karaoia nakon Eunice, ara koaua n ataan koauan te euangkerio a kona n oki ni makuakua.
Ti aki riai ni maiu n rongon te nanokokoraki n te tai ae e maan ngkana ti bon tiku nakon ara atatai n tamnei. Unimwaane Neil L. Andersen man te Kooram n Abotoro n te Tengaun ma Uoman e taku “uringi maiun tamneimi aika a kakukurei. … Onimaki bwa a roko iroum mairoun Tamam are i Karawa ao Natina ae Tangiraki. Kariaia bwa a na uota te taotaonakinnano nakon am raraoma ao n ota n am kaangaanga. I berita nakoimi bwa ngkai kam anga nanomi ni kakoauaa ao n kawakin raoi tai ni kakukukrei n tamnei inanon maiumi, e na mwaiti riki n roko nakoimi.”5
I ataia bwa naake a kataia ni karekei aia atatai ni maiuia n tamnei aika a boou ao ni kamwakura te onimaki iroun Kristo, te berita aio e koaua:“Ane e onimakina [Kristo] e na bon aki taka” (Ioane 6:35). Kaeka aika ti kainnanoi a na roko. Ti kona n kaaitarai kabwakabwaka aika e karei kawaira iai Taatan. Ao ti kona n teimatoa ni kakaonimaki nakon Atuara ae tangira ni kabane ara bong.