Bwanaaia Aika Itiaki ni Boong aika Kaitira
Kakabwaiakiia Au Bakatibu
Ngke I karekea au kakabwaia iroun te tamanuea, nanou e onrake n te tangira ibukiia au bakatibu.
Rawetamnei iroun Richard M. Romney
I bungiaki i Cameroon, abaia au bakatibu. Ngkanne I a kamwaingaki nako Buranti, ike I a maeka iai, reirei, ao ni mwakuri bwa te neeti n onaoraki aika kakaokoro i Paris. Ngkai I maeka i Montreal, ike I bon mwakuri naba bwa te neeti.
I a kaman kakaea te koaua n ana Ekaretia Iesu Kristo inanon ririki. Ngke I kaaitibo ma mitinare i Paris, te Tamnei ae Raoiroi e kakoaua nakoiu bwa I a kunea ngkai te bwai are I kakakaea ngkoa—Ana Ekaretia Iesu Kristo Ibukiia Aika Itiaki ni Boong aika Kaitira. I kaonaki ma te kimwareirei ae moan te bati are n au I iango bwa N nang roko i karawa! I motikia mai nanou bwa n na teimatoau ma te reirei ao reirein te euangkerio.
I reireinaki ni ukoriia au bakatibu ao ni karaoi taian otenanti ibukiia inanon te tembora. Ngke I karekea au kakabwaia n te tamanuea, I tuangaki bwa N na riki bwa te tia kamaiu iaon Maungan Tion ao ni uota te kamaiuaki nakoia au utu. E onrake nanou n te tangira ibukiia; N na aki uotiia rikaaki. Imwiin anne, I a tia ni mwakuri korakora iaon rongorongon te utu ibukiia au utu ao rikiia.
I a kaman kinaaki are I bon bungiaki inanon te utu ni uea mai Cameroon, te utu ae Bamoun. Katei n taetae ao karaki ni kawai e taekinaki bwa aomata aikai a roko mai Atiria ao a irengan ma aomata tabeman inanon rokoia n riki bwa kaain te aba. A kawakin rikiia ao ni koroi rongorongoia man AD, 1300. Beeban rongorongoia a mena n te raiburari n ana bwaareti te utu ni uea. Ibuakon rongorongo aika mwaiti, a karakina karakinan tibutoru te unimwaane Fon-gouhouo, are e uea man 1818 nakon 1863.
E bon reke okiu nako abau, ao ngkai ngai bon kaain te utu ae te Bamoun, I anganaki te konaa ni karekei beeba aikai. I kawara naba te uea, ni kaaitibo ma tabeman aobitia n te tautaeka, ao n taetae nakoia iaon taekan te Ekaretia ao nanona iaon rongorongon te utu. I kakaitau bwa, te karabwarabwa nakon te euangkerio ae kaokaki, I kona ni karaoa au itera ni kakabwaia abau ao au bakatibu.