Karem Saeon I Kam
I kam long Elda Gerrit W. Gong
Blong Kworom blong Olgeta Twelef Aposol
Olsem ol Lata-dei Sent, yumi kasem blesing blong gospel we i bin kambak, oli singaotem yumi blong mekem Jos i kam strong moa mo bildimap Saeon.
Pikja blong map i kam long Getty Images
Truaot long histri, ol pipol blong Lod oli bin lukaotem blong mekem wan gospel sosaeti, we i wan ples we Hem i save stap long hem. Blong kam wan kaen komuniti olsem blong Ol Sent, yumi mas lanem blong mekem ol hat mo maen blong yumi i kam tabu mo mekem tufala i wan, mekem ol samting long stret fasin mo no kroskros mo raorao, mo laef long stret mo gud fasin mo i no gat puaman long medel blong yumi (luk long Moses 7:18).
Eksampol. Afta we Jon mo Maria Linford i bin joenem Jos Ia blong Jisas Kraes blong Ol Lata-dei Sent long Gravely, Inglan, long 1842, Jon i kam olsem presiden blong lokol branj. Be ol famli mo fren oli no bin serem glad ia we famli Linford oli bin faenem insaed long Restoresen. Sapos oli no save winim tingting blong Jon blong lego niufala relijin blong hem, afta, bae oli “mekem hem i safa from” taem bae oli stopem bisnis blong hem blong mekem sus.
Long 1856, Pepetuol Fan long saed blong muvaot long hom blong go stap long wan nara ples, i bin givim wan janis long Jon mo Maria blong muv i go laef long Sol Lek Vale. Tufala i sel i go long Niu Yok wetem tri pikinini boe blong tufala. Long ples ia, oli travel i go long lowa Siti, lowa, long ples ia we oli aot long hem long Julae 1856 wetem wilkat kampani blong James G. Willie we i no bin wok gud.
Eli long 21 Oktoba, kolosap long so blong Switwota Reva long Waeoming, John i talem ol las toktok blong hem.
“Mi glad se yumi bin kam,” hem i talem long Maria, taem Maria i askem long John sapos hem i sore from we oli bin lego Inglan. “Bambae mi mi no save kasem Sol Lek, be yu wetem ol boe bae i kasem, mo mi no harem nogud from evri samting we yumi bin go tru long hem blong mekem se ol boe blong yumitu oli save groap mo lukaotem ol famli blong olgeta long Saeon.”1
?Wanem Hem I Saeon?
Sam topik olsem hemia blong taem we Lod Jisas Kraes i bon, i bin givim insperesen moa long ol profet blong taem bifo mo taem naoia mo Ol Sent, bitim kam tugeta blong Isrel long ol las dei ia mo Saeon we oli stap bildim i rere from Seken Kaming blong Sevya.2
?From wanem Saeon i impoten tumas long Ol Lata-dei Sent—long taem ia mo naoia, long weaples we ol pipol blong Lod oli stap long hem?
Elda Bruce R. McConkie (1915–85) blong Kworom blong Olgeta Twelef Aposol i bin talem, “Long taem blong Adam kam kasem naoia ia—eni taem we Lod i bin gat finis ol pipol blong Hemwan; eni taem we i gat olgeta we oli bin lisin gud long voes blong hem mo obei ol komanmen; eni taem we ol sent blong hem oli wok blong hem wetem ful tingting blong hat blong olgeta—ples ia, i bin gat Saeon.”]3
Ol skripja oli tokbaot wan Saeon Sosaeti. Inok, wan profet we i gat bigfala fet long ol taem blong Noa, i “bildim wan bigtaon we oli singaotem Bigtaon blong Tabu Fasin, we i Saeon” (Moses 7:19). Long ples ia, Lod i i bin stap laef wetem ol pipol blong hem, blesem olgeta mo kantri blong olgeta (luk long Moses 7:16–18). Lod i talem long Inok, “Luk, mi mi God; Man blong Tabu Fasin i nem blong mi” (Moses 7:35).
Wan hop blong Saeon i blong stanemap wan ples we tugeta, fet i hang strong long ol selestial prinsipol blong heven, long ples ia, ol pipol blong Lod oli save wokbaot wetem Hem mo God Hemwan i save laef long hem.
Buk blong Momon i testifae se, afta we Sevya ia we i laef bakegen long ded, Hem i bin visitim Niufala Wol, “evri pipol oli bin jenisim laef i go long Lod, long ful fes blong graon. …
“Mo oli bin serem evri samting long medel blong olgeta; from hemia, i no gat ol rijman mo puaman, ol slef mo man we i fri, be oli mekem evriwan oli kam fri, mo oli tekem sam pat blong presen blong heven. …
“Mo i bin hapen se i no gat eni rao long graon, from lav blong God we i bin stap insaed long hat blong ol pipol” (4 Nifae 1:2, 3, 15).
Oli Blokem Olgeta Wetem Stret mo Gud Fasin mo Paoa
Dei blong Inok i wan taem blong wo, blad we i bin ron, fraet, tudak, mo fasin blong no laekem ol narafala man—taem “paoa blong Setan i bin stap long ful fes blong wol.” (Moses 7:24; luk tu long ol ves 16, 17, 33). Be Inok i stap fetful, mo Lod i singaotem hem blong taltalemaot fasin blong sakem sin.
Lod i talem long Inok se i semmak ol “bigfala hadtaem,” (Moses 7:61) bae oli kam bifo Seken Kaming blong Hem. “Semmak olsem we mi laef, semmak, bae mi kam long ol las dei, long ol taem blong fasin nogud mo fasin blong stap givimbak, blong mekem strong promes we mi bin mekem long yu i hapen, promes ia long saed blong ol pikinini blong Noa” (Moses 7:60).
Long dei blong yumi, i no longtaem i pas, Presiden Russell M. Nelson i bin luk, “Mi luk se sik ia naoia we i [KOVID-19] wol sik, i wan nomo long ol plante problem we i stap spred long wol blong yumi, i gat tu, fasin blong no laekem ol narafala man, faet bitwin ol defdefren pipol long semmak kantri, no laekem man from kala blong skin, vaelens, fasin blong no ones, mo i nomo gat tumas respek.”4 Be yet, yumi gat promes blong profet. Presiden Nelson i bin talem tu se:
“Yumi stap laef long wan dei we ‘ol bubu blong bifo oli bin wet from mo oli bin wantem tumas blong luk.’ [Doktrin mo Ol Kavenan 121:27.] Yumi stap sidaon long ol jea long fored blong witnes laef long wanem we Profet Nifae i bin luk long visen nomo, se ‘paoa blong Smol Sipsip blong God’ bae i kam daon ‘long ol kavenan pipol blong Lod, we i seraot olbaot long ful fes blong wol; mo oli blokem olgeta wetem stret mo gud fasin mo paoa blong God long bigfala glori.’ [1 Nifae 14:14.]
“Yufala, ol brata mo sista blong mi, yufala i bin stap long medel blong ol man, woman, mo pikinini ia we Nifae i bin luk.”5
Invitesen ia blong karem tugeta mo blesem olgeta long tugeta saed blong vel, i bildimap Saeon, mo i mekem wol i rere from Seken Kaming blong Sevya blong yumi, mo tu blong yumi wanwan. “Aot long evri pipol we oli bin laef long wol ia,” Presiden Nelson i bin talem, “yumi yumi olgeta ia we i gat janis blong tekpat long las, bigfala taem ia blong kam tugeta.”6
?Olsem Wanem Nao Bae Yumi Kasem Ples Ia?
Olsem ol Lata-dei Sent we oli kasem blesing blong gospel ia we i bin kambak, oli “singaotem [yumi] blong wok long plantesen blong [Lod], mo blong bildimap jos blong [Hem], mo blong mekem Saeon i muv fored.” (Doktrin mo Ol Kavenan 39:13). Wok ia i nidim lav, yuniti, fet, seves, sakrifaes mo fasin blong stap obei.
“Taem pipol oli lavem God wetem ful hat blong olgeta mo traehad blong kam olsem Hem, hemia, i daonem ol hadtaem mo fasin blong raorao insaed long sosaeti. I gat moa yuniti,” Elda Quentin L. Cook blong Kworom blong Olgeta Twelef Aposol i talem. Hem i gohed blong talem: “Yuniti, i … wan toktok we i bigwan blong andastanem gud, be hem i givim eksampol blong fas mo seken komanmen blong lavem God mo lavem ol pikinini blong Hem. I makem ol pipol blong Saeon we hat blong olgeta mo maen blong olgeta i ‘joen tugeta blong kam wan long lav.’ [Mosaea 18:21].”7
Wetem lav mo yuniti ia, yumi stap eksesaesem fet blong yusum fulwan Atonmen blong Sevya blong yumi, we i save jenisim yumi taem yumi stap mekem hat mo laef blong yumi i kam klin (luk long Mosaea 3:19; Doktrin mo Ol Kavenan 97:21). Yumi karem i kam tugeta olgeta we oli wantem blong kam long Lod long stret mo gud fasin. Tru long ol tabu odinens mo ol selestial prinsipol, yumi invaetem paoa olsem hemia blong God long laef blong yumi (luk long Doktrin mo Ol Kavenan 105:5). Yumi kam tabu tru long kavenan blong stap pat wetem God mo long yumi wanwan, yumi bildimap Saeon mo mekem yumi rere from Seken Kaming.
“Jareti hem i bigfala lav blong Kraes,” Presiden Henry B. Eyring, Seken Kaonsela long Fas Presidensi i talem. “Mo hem i fet long Hem mo ol ful paoa blong Atonmen blong Hem we i no gat en we bae i mekem yu kwalifae, mo i mekem olgeta we yu lavem mo wok blong olgeta oli kwalifae from hae mo tabu presen ia blong stap laef long wan sosol laef insaed long wan promes Saeon we yumi lukaotem longtaem finis i kam.”8
Rere from Ol Dei we Oli Stap Kam
Ol profet blong tedei ol tijim se blong kam long Sevya i wan komitmen blong wanwan man mo woman, be i no ples we yu stap long hem.
“Long ol eli dei blong Jos, fasin blong jenisim laef i stap minim tu fasin blong lego wan ples mo muv i go stap long wan nara ples,” Presiden Nelson i eksplenem. “Be naoia, kam tugeta ia i tekem ples long wanwan nesen. Lod i talemaot wok blong stanemap Saeon long wanwan ples we Hem i bin givim blong Ol Sent blong Hem oli bon i kam long hem mo gat sitisensip long hem.”9
Taem yumi welkamem jalenj mo blesing blong stap bildimap Saeon insaed long ol famli blong yumi, ol branj, ol stek mo ol komuniti, yumi lukluk wetem John mo Maria Linford i go fored long dei ia we ol pikinini mo ol apu pikinini blong yumi “oli groap mo resemap ol famli blong olgeta long Saeon” long medel blong evri nesen, famli mo lanwis.
Taem bae yumi lukaotem Lod faswan mo fasin blong Hem blong stap stret mo gud, yumi prea se, “kingdom blong hem bae i go evri ples long wol, blong ol man we oli stap laef long hem oli save kasem kingdom ia, mo oli mekem olgeta oli rere from ol dei we oli stap kam, we Pikinini blong Man bae i aot long heven i kam daon, wetem klos blong glori blong hem we i saen gud, blong mitim kingdom blong God we i stanap long wol ia” (Doktrin mo Ol Kavenan 65:5)