Help we i kam long Nara Saed blong Vel
Taem mi ledaon wetem harem nogud long hospital, mi filim se mi stap miwan, kasem taem mi tingbaot ol apu blong mi long taem bifo we mi lavem olgeta.
Foto i kam long Getty Images
Long 2017, mi bin gat bel long fas bon pikinini blong mitufala. Hasban blong mi Lucas mo mi i bin glad tumas mo fraet long taem we smol Juan Lionel bae i bon.
Let long wan naet, long stat blong manis Febwari 2018, mi stap blong filim soa long bodi blong bonem bebi. Mi gat eit manis nomo be i luk olsem se bae bebi i kam bifo stret taem blong hem. Mifala i karem sam samting mo kwiktaem go long long klinik. Mi no filim se mi rere blong go bonem bebi, be mi prea mo askem God blong letem tingting blong Hem i hapen nomata ol fraet blong mitufala.
Taem mitufala i kasem klinik, dokta blong mi we wok blong hem i blong jekem helt blong ol woman, i kasem mesej abaot mi be, hem i no save kam long taem ia, be bae i kam afta nomo. Hasban blong mi i ringim mo tekstem ol mesej i go long papa mo mama mo ol brata mo sista blong mitufala, be i no gat wan long olgeta i wekap. Hem i gohed blong ringim mo teks truaot long naet, be i no gat wan i ansa. Hemia i mekem mi filim se mi stap miwan.
Taem soa ia blong bodi blong bonem bebi i go antap, mi filim moa se mi stap miwan. Kwiktaem nomo wan samting we i naes tumas i hapen. Mi stat blong tingbaot ol bubu blong mi we oli ded finis—speseli apu woman long saed blong mama blong mi, Rosa Mercado, mo mama blong hem, Javiera Balmaceda.
Taem mi tingbaot olgeta, mi filim insaed long hat mo maen blong mi se, tufala tugeta i stap wetem mi long taem ia. Mi filim we tufala i stap, long wan strong mo naesfala wei we mi no save talemaot long ol toktok, wanem we mi bin eksperiensem. Mi no bin luk olgeta, be mi filim se oli stap kolosap mo stap leftemap tingting blong mi, sapotem mi mo lavem mi olsem ol mama mo olsem pat blong famli blong mi. Mi filim olsem se olgeta oli ol enjel we oli stap givhan long mi, long taem we mi gat nid.
Sam yia ia pas we mifala bin go long tempol, mama, papa, ol brata mo sista blong mi, hasban blong mi, mo mi i bin mekem ol impoten wok blong olgeta mo ol impoten wok blong ol narafala bubu we oli ded finis. Mi filim se strong tingting ia blong no fraet we mi bin kasem mo filing ia we mi gat se ol bubu blong mi we oli ded finis oli stap kolosap, i bin wan presen tru long paoa mo atoriti blong God.
Afta long taem ia, mi filim spirit blong ol bubu blong mi we oli ded finis long ol narafala taem, we oli helpem mi mo lidim mi olsem wan mama mo wan waef mo long ol narafala impoten samting long laef blong mi.
Mi testifae se God bae i neva lego yumi stap yumiwan long rod we yumi stap folem long laef ia. Sapos yumi mekem wok blong Hem, bae yumi kasem help we i kam long nara saed blong vel. Bae yumi kasem lav, save, paoa mo pis “we i bigfala moa, i bitim save blong yumi” (Filipae 4:7).