Ol Prinsipol blong Wok blong Givhan

Stap Helpem Ol Narafala Man blong Rere From Ol Nid We Oli No Ting Se Bae I Kam

Olsem ol givhan brata mo sista, yumi save helpem ol brata mo sista blong yumi blong oli rere from wan wol we i no sua.

Pikja

a mother and her toddler son planting an indoor garden

Foto i kam long Getty Images

Ol wol sik, ol disasta we i stap hapen oltaem, ekonomi i foldaon, ol kwik jenis blong politik mo ol raorao mo faet—wol i bin fesem plante long hemia, long ol yia we i pas. Blong ademap long ol bigfala samting we i stap hapen, yumi tu yumi fesem ol jalenj blong yumi wanwan we yumi no ting se bae i kam, olsem siknes, mane i no gat, divos mo sam moa.

Ol hadwok blong yumi blong rere from ol samting we yumi no save taem we bae oli kam, i save givim sefti mo proteksen long yumi wanwan mo ol narafala wan. ?Wanem nao yumi save mekem olsem ol givhan brata mo sista blong helpem olgeta we yumi lavem, blong oli save stanap strong mo winim ol hadtaem mo ol jalenj we oli no ting se bae i kam.

Carlomagno Aguilar blong Angeliss long Filipin, i givim wan eksampol. Taem hem i harem se eria blong hem bae i stap long kwarantin from KOVID-19 wol sik, hem i hariap blong go pem ol samting we hem i nidim—nomata we lis blong hem i defren long olgeta we oli stap raon long hem. Hem i bin gat wan plan blong stap rere from taem ia—hem i pem ol sid mo samting we bae i mekem graon i rij blong plan long hem, blong garen blong hem long hom blong hem.

Carlomagno Aguilar i statem wan onlaen janel blong tij abaot fam long siti.

Carlomagno i bin wan fama long siti blong plante yia olsem wan man we i traehad moa blong stap dipen long hemwan. Hem i givhan tu long ol neba blong hem, tugeta long saed blong givim ol kaekae aot long garen blong hem mo blong tijim olgeta blong planem kaekae blong olgetawan. Hem i krietem wan onlaen janel tu, we long ples ia, hem i serem ol tingting blong hem mo ol sot vidio blong tij we i stap blong evriwan i save luk blong helpem ol brata mo sista blong hem blong oli save dipen moa long olgetawan mo stap rere from fiuja.

Bishop W. Christopher Waddell, Fas Kaonsela long Prisaeding Bisoprik i bin tijim:“Taem we yumi akseptem ol prinsipol long saed blong spirit, mo lukaotem insperesen we i kam long Lod, bae Spirit i soemaot long yumi blong save wanem nao Lod i wantem, blong yumi wanwan mo olsem wan famli, mo wanem i bes wei blong praktisim ol impoten prinsipol blong rere long laef long wol ia. Step we i moa impoten long olgeta evriwan, i blong stat.” (“I Gat Kaekae I Stap long Evri Ples,” Liahona, Nov 2020).

Blong stap helpem wanwan long olgeta blong stap rere from wan wol we i no sua, i wan besik wei blong soem lav olsem lav blong Kraes. Bae yumi helpem yumi wanwan blong tekem “step ia we i moa impoten” blong stat.

Sam Tingting blong Stap Helpem Ol Narafalawan

Olsem oltaem, wok blong givhan i stat wetem fulap prea long saed blong tingting mo blong stap kaonsel tugeta. Ol tingting ia i save helpem yu blong tingting long olsem wanem yu o olgeta we yu stap givhan long olgeta i save stat blong rere blong fesem ol jalenj we oli no ting se bae i kam.

Tingting fulwan. Yumi save rere long ol defdefren wei blong ol defren eria blong laef blong yumi. Hem i impotem blong storem kaekae mo planem kaekae taem yu save mekem, rere long saed blong mane, bildimap strong filing blong akseptem ol had samting, mo mekem ol plan blong taem blong ol imejensi situesen.
Toktok raon long ol jalenj we plante taem oli stap hapen long ples we yu stap laef long hem, mo olsem wanem yu save winim olgeta. Ol defdefren eria raon long wol oli gat ol jalenj blong olgeta we i no semmak long ol narafala eria. Sapos yu stap laef long wan ples we graon i stap seksek oltaem, toktok raon long olsem wanem yu save mekem hom blong yu i rere, blong helpem yu stap sef, olsem blong putum ol hevi samting long ol wol blong haos. O sapos yu stap laef long wan ples we hariken i stap kam oltaem, toktok raon long olsem wanem blong stap rere long kaen situesen ia, olsem blong gat wan redio we i on blong stap talem ol nius o blong muv i go long hae graon.
Toktok raon long olsem wanem blong krietem wan imejensi fand. Blong stap sevem mane i save helpem yu, sapos yu lusum wok blong yu o gat ol samting we yu mas pem we yu no ting se bae oli hapen. Tokbaot olsem wanem blong sevem mane, olsem blong stat smol mo stap sevem smosmol evri taem yu kasem mane blong yu, kasem taem yu kasem gol blong yu.
Karem i kam tugeta ol samting we bae yu nidim blong mekem wan imejensi kit. Blong gat wan imejensi kit i save helpem yu blong stap rere sapos yu mas lego hom blong yu blong wan sot taem. Wok tugeta blong tingting gud mo karem tugeta ol aetem we bae yufala i nidim. Hemia yu save mekem smosmol ova long wan longfala taem mo i no nidim blong mekem evri samting ia long semmak taem. Tingting long selta, kaekae mo wota, ol meresin, laet, komunikesen, ol impoten pepa wok, mane, wan klos blong jenis, ol samting blong pasem taem mo kamfotem yu (ol gem, ol buk, ol pleiplei blong ol pikinini,) mo eni narafala samting we i nidim blong karem.
Bildimap wan frensip wetem wan yu givim seves long hem. Hem i impoten blong gat ol gudfala skil blong save wok mo andastan blong save stretem ol filing we i kam wetem hadtaem. Wan long ol skil ia i blong gat ol helti rilesensip. Taem yu mekem frensip blong yu i kam strong moa wetem wan man o woman, bae yu helpem olgeta blong krietem wan sapot sistem.
Tokbaot ples blong storem kaekae. Bae i help bigwan blong gat ekstra kaekae i stap rere blong ol imejensi. Givim jalenj long wanwan long yufala blong stat blong bildim wan saplae blong ol kaekae we yufala i stap yusum blong wan sot taem mo mas karem bakegen long ol nomol kuk blong yufala. Afta, stat blong wok blong karem tugeta ol kaekae we bae yufala i nidim oltaem blong wan longfala taem. Sapos yu no gat inaf spes blong storem kaekae o sapos loa i stopem yu blong storem bigfala namba blong kaekae, storem hamas nomo we bae i stret long situesen blong yu.