Ol Voes blong Ol Lata-dei Sent
?Kastoma blong Mi o Koling blong Mi?
Taem mi stap traem blong mekem gud prishud responsabiliti blong mi, Lod i soem long mi se Hem i save long situesen blong mi long saed blong mane.
Foto i kam long Getty Images
Taem oli singaotem mi olsem presiden blong kworom blong ol elda long yia 2000, i gat seven elda nomo we oli stap kam long prishud miting. Mo tu, mifala no stap mekem wan gudfala wok long saed blong hom tijing blong mifala—we naoia i ol wok blong givhan—visit.
Mi save se mifala i bin fesem wan bigfala jalenj blong givim insperesen long ol elda blong kam antap. So, blong stat bakegen, mifala i disaed blong mekem jenis bakegen long ol asaenmen mo mekem plante foloap visit.
Be from se mi wan loya we mi wok blong miwan, mi stap travel plante. Mi bisi plante, be mi wantem blong mekem gud ol prishud responsabiliti blong mi.
Wan dei, mi mas travel long bas i go long wan narafala siti blong folemap wan kastoma blong mi. From se mi sot long saed blong mane, mi stap hop se bae kastoma blong mi bae i agri blong pem mi fastaem.
Long rod blong go stopem bas, mi disaed blong go luk sam memba blong kworom mo leftemap tingting blong olgeta blong visitim ol famli we oli asaenem olgeta long hem. Sam oli fogetem be oli komitim olgeta blong mas mekem. Ol narafalawan oli komitim olgeta blong finisim ol visit blong olgeta long semmak wik ia.
Mi glad tumas long ol komitmen blong olgeta mekem se mi disaed blong visit mo leftemap tingting blong ol narafala memba blong kworom. Bifo mi mekem hemia, taem i 12 klok long medel dei finis. Mekem se mi nomo lego taon be, mi disaed blong go long ofis blong mi blong luklukbak long kes blong kastoma blong mi.
Long sapraes blong mi, taem mi kasem ofis blong mi, kastoma blong mi i stap stanap aotsaed wetem wan narafala man. Mi eksplenem long kastoma blong mi se mi stap rere blong luk tru long kes blong hem mo mekem wan ripot blong hem blong nekis dei. Hem i talem se hem i kam blong introdiusum mi long wan niufala kastoma. Afta we mi mo fren blong hem i bin toktok, mifala i agri long wan fi blong mi, blong helpem hem blong stretem wan situesen folem loa blong kantri. Afta, kwiktaem kastoma blong mi i givim mane blong pem mi bifo mi statem wok.
Long mi, hemia i wan merikel. Papa long Heven i save se mi stap traem blong stap fetful long Hem. Hem i save tu ol nid blong mi. Hem i bin blesem mi long plante wei long ol yia we i bin pas, be long taem ia, blesing blong Hem i kam long saed blong mane. Hem i mekem i hapen toktok blong Hem insaed long ol skripja i go long olgeta we oli givim seves long olgeta: “Fastaem yufala i mas lukaot gud blong obei long God we i King blong yufala, mo blong folem ol stret fasin blong hem. Nao biaen hem i save givim olgeta samting ya tu long yufala” (Matiu 6:33).
?Mo kworom blong ol elda blong mifala? Lod i blesem mifala taem mifala i muv i go fored wetem wan spirit blong yuniti. Hom tijing blong mifala i go antap kasem 100 pesen, mo namba blong ol prishud we oli atendem klas i go antap kasem 35 fetful elda.
Mi testifae se yumi evriwan i save stap olsem ol tul long wok blong Lod, mo faenem glad mo ol blesing, taem yumi givim seves long Hem tru ol seves we yumi givim long ol narafala man.