Ol Yang Adalt
Stap Luksave Gud Fasin insaed long Yumi Wanwan
Hem we i raet i stap long Yuta, YSA.
?Olsem wanem nao yu save talem mining blong presen blong luksave ol samting? Kasem tedei, mi stap mestem wan long ol impoten wok blong presen ia.
Ol pikja foto i kam long Getty Images
Long ful laef blong mi, mi stap ting se presen blong luksave samting, i blong save luksave wanem i raet mo wanem i rong, trutok aot long mistek. Olsem we hemia i wan impoten pat blong presen ia, i no longtaem i pas, mi bin lanem se i gat moa long hemia.
Mi faenem wan tresa insaed long ol futnot blong wan toktok we oli givim long Epril 2020 jeneral konfrens. Wan spika i kwotem toktok blong Presiden Stephen L Richards (1879–1959), foma Fas Kaonsela long Fas Presidensi, we i talem, “Fasin blong luksave samting we i moa hae, i blong luksave mo soemaot long ol narafala man gudfala fasin blong olgeta, we oli gat insaed long olgeta.”1
?Hemia i no naes olsem wan poem?
Tabu Spirit i save helpem yumi blong soemaot gud fasin we i stap insaed long ol narawan. Trutok long toktok ia i naes tumas long mi, mekem se mi wantem lanem moa. Mi faenemaot se Elda David A. Bednar blong Kworom blong Olgeta Twelef Aposol, i bin tijim tu se presen blong luksave samting i helpem yumi blong “[faenem mo karem i kam fored ol gudfala samting we i save stap haed insaed long yumi].”2
Long taem we mi bin fanemaot olsem, mi kam blong luksave olsem wanem pat ia blong presen blong luksave samting i impoten. Yumi nidim blong faenemaot ol gudfala kwaliti insaed long yumiwan mekem se yumi save developem olgeta. Taem yumi mekem, bae yumi filim mo tekem aksen olsem ol stret pikinini blong God (luk long Ol Sam 82:6; Mosaea 5:7; Moronae 7:19).
?So, olsem wanem nao bae yumi stat blong faenem ol gud samting insaed long yumiwan? Hemia sam long ol wei blong statem.
Lukluk nomo long Wei we Yu Stap Yusum Paoa blong Yu blong Blesem Ol Narafala Man
Hem i doktrin blong wan trutok se evriwan i gat wan presen we i kam long God (luk long Doktrin mo Ol Kavenan 46:11)—mo i no nogud blong tingbaot olgeta. !I tru, from Lod i askem yumi blong mekem! Ol skripja oli tijim yumi blong lukaotem “wetem strong tingting, ol presen ia we oli moa gud bitim ol narawan, mo stap tingbaot oltaem se from wanem nao mi stap givim ol samting ia long yufala” (Doktrin mo Ol Kavenan 46:8; oli ademap italik).
Taem yumi kam blong save gud ol presen blong yumi o ol talen, yumi mas faenem ol wei blong yusum olgeta blong givim seves long ol narafala man.
!Wan wei blong luksave ol presen blong yu i taem yu askem long wan man we yu trastem! Askem olgeta abaot wanem ol samting we yu gud long olgeta. Sapos yu olsem mi, bae yu tingting se hemia i wan had samting blong mekem. Be tingbaot, hemia i no samting nating, i blong faenem ol fasin we wanwan i gat blong save helpem ol brata mo sista long wol(luk long Mosaea 8:18).
Eksampol. Wantaem, wan kaen neba i talem long mi se mi gat wan talen blong stap helpem ol pipol blong filim pis. Mi no bin tingting series long hemia mo ting se i wan toktok blong presem mi nomo, be mi stat blong wajem talen ia long laef blong mi. Taem mi mekem hemia, mi luksave se Papa long Heven i save helpem mi blong yusum ol sosol skil blong mi, blong mekem fren wetem ol narafala man mo blesem moa laef bitim blong miwan.
Taem yu stap luksave ol talen blong yu, bae yu save jusum blong yusum olgeta blong blesem ol narafala man (luk long Doktrin mo Ol Kavenan 82:18).
Stadi long Petriakel Blesing blong Yu
Foto I Kam long Judith Ann Beck
Ol petriakel blesing oli gudfala ples blong stap luksave se yumi spesel long wan wei tru long ol talen we God i givim long yumi. Elda Larry R. Lawrence, wan olfala memba blong ol Seventi i bin talem: “Spirit i save soem yu ol wiknes blong yu, be tu, Hem i save soem ol paoa blong yu. … Taem yumi ridim petriakel blesing blong yumi, Papa blong yumi long Heven i talem bakegen long yumi se Hem i save ol tabu paoa we yumi save kasem.”3
Blong stadi long petriakel blesing blong yu, i stap helpem yu blong lukluk nomo long wei ia blong stap developem ol fasin we i save helpem yu blong kasem paoa we yu save kasem.
Long situesen blong mi, oltaem mi stap pikjarem wan mama we mi hop blong kam olsem wan dei. Be mi no stap luksave se mi stap tingting tumas finis se wan gudfala mama i fit, i oganaes i naes—mo we ol sinamon rol kek blong hem i bes wan insaed long Rilif Sosaeti Wod blong hem. Evri samting i gud mo blong stap stadi long petriakel blesing blong mi, i bin soem long mi se Lod i wantem moa se mi mi wan mama we mi kaen mo gat bigfala lav. Long mi, ol fasin olsem hemia blong Kraes, oli olgeta ia nao mi mas traehad blong developem.
Tingbaot mo Luklukbak long taem blong Sakramen
Foto I Kam long Jerry Garns
Sakramen i wan taem blong tingbaot Sevya. Hem i wan taem blong luklukbak long progres blong yu blong stap kam olsem Hem. Taem yu wok blong faenemaot ol gudfala fasin insaed long yu, blong stap luklukbak evri wik long ol samting we yu bin kasem, ol eksperiens, mo ol eksperiens long saed blong sosol i save helpem yu luksave ol taem we ol talen blong yu oli kam tru.
Presiden Henry B. Eyring, Seken Kaonsela long Fas Presidensi i bin talem: “Taem yu stap luklukgud long laef blong yu long taem blong odinens blong sakramen, mi hop se ol tingting blong yu oli no lukluk nomo long ol samting we yu mekem i rong, be tu, yu lukluk long ol samting we yu mekem i raet—ol taem ia we yu bin filim se Papa long Heven mo Sevya, Tufala i bin glad long yu. Yu save tekem wan smol taem long taem blong sakramen blong askem God blong helpem yu blong luksave olgeta samting ia.”4
Hemia sam kwestin we yu save askem long yuwan o God long taem blong sakramen:
-
?Olsem wanem nao mi folem eksampol blong Kraes long wik ia?
-
?Huia nao mi givim seves long hem?
-
?Wetaem nao mi filim Spirit long wik ia? ?From wanem?
-
?Wanem nao wan fasin olsem hemia blong Kraes we mi stap traem blong developem? ?Olsem wanem nao mi stap mekem hemia?
-
?I gat eni samting long laef blong mi we mi mas pray blong kasem help from?
-
?I gat eniwan we mi nidim blong fogivim hem?
-
?Wanem wan problem we i bigwan o smol, we Papa long Heven mo Jisas Kraes i bin helpem mi wetem long wik ia?
Blong stap tingting hevi long ol gudfala fasin blong God mo stap tingting long laef blong mi long taem blong sakramen be blong no stap tingting nomo long ol mistek mo ol wiknes blong mi, i helpem mi blong putum tras blong mi long Hem.
Onarem Koling Blong Yu
Oli givim ol koling long yumi from wan risen, iven sapos yumi no save risen ia long fastaem.
Wan taem oli bin singaotem i go long Rilif Sosaeti presidensi long yang singgel adalt wod blong mi. Mi glad tumas blong stat. Be afta sam manis i pas, tingting blong mi i bin foldaon. Mi no luk eni wan we mi stap traem givhan long olgeta, oli no gro i kam antap long saed blong spirit. Ol traehad blong mi blong visit mo olgeta we mi stap fren wetem olgeta, i no kam gud nating.
Wan Sandei, mi filim olsem se mi stap mestem ol presen long saed blong spirit we i save help wan man blong stap mekem gud long wok blong givhan. Prea blong mi long taem blong sakramen long dei ia, i blong filim wan stret save se mi save mekem koling blong mi. Mi filim strong se mi mas askem wan prishud blesing.
Mi mitim bisop blong mi, mo taem hem i putum han long hed blong mi, wan long ol fas samting we hem i talem long mi i we, “Papa long Heven i glad long fasin blong yu blong kaen we yu stap soem long ol narafala man.”
Mi filim Spirit i strong, mi filim wan stret save se Lod i glad long ol wok blong mi. Mi bin filim se mi gat wan pat blong ol presen ia we i mi nid blong gat blong givhan wetem lav. Mi bin stap tingting plante long ol mistek blong mi be i no ol samting we mi stap mekem i gud.
Ol koling blong yu oli ol bigfala janis ia blong faenem mo yusum ol talen blong yu long saed blong spirit.
Yu Save Stat Naoia
Yumi no nidim blong wet blong statem blong stap yusum ol gud samting insaed long yumiwan.
Presiden Dieter F. Uchtdorf, bifo olsem Seken Kaonsela long Fas Presidensi i bin talem:
“Samtaem yumi kam slak from se yumi no “moa” long wan samting—moa spirit, moa respek, waes, helti, rij, fren, o save mekem moa. ….
“Mi lanem long laef se yumi no nid blong kam “moa” long eni samting blong stat blong kam huia we God i wantem yumi kam.”5
Yumi save statem wetem wan prea. Talem long Papa long Heven, wanem yu filim naoia ,o olsem yu wantem filim abaot yuwan. Speseli, askem presen blong luksave samting blong helpem yu luksave wanem ol gudfala samting i stap insaed long yu. Sam naesfala taem long laef blong mi i bin kam, taem mi stap talem ol prea ia. Mi biliv se Papa long Heven i wantem tumas blong helpem yumi blong luk evri samting we Hem i stap luk.
From se, yumi gat ol aedentiti olsem ol pikinini blong God, mo yufala i no andastanem yet se ol blesing blong Papa, we hem i gat long han blong hem mo i rere long hem from yufala, oli bigwan olsem wanem (luk long Doktrin mo Ol Kavenan 78:17). Tru long presen blong luksave samting, yumi save kam blong save hemia blong yumiwan.