“Bae Olsem Ia Nao Oli Mas Singaotem Jos Blong Mi”
I Kam long Presiden Henry B. Eyring
Seken Kaonsela long Fas Presidensi
Taem yumi yusum ful nem blong Jos, yumi kasem blesing mo yumi blesem ol narafalawan.
Long Afrika, wanwan man mo woman we oli stap lukaotem blong joenem wan jos, oli ripotem se oli stap gat ol drim. Long ol drim blong olgeta, oli kasem instraksen blong lukaot wan jos we oli singaotem nem blong Jisas Kraes long hem. Taem oli stap lukaotem, oli faenem wan jos nomo we nem blong Sevya i stap long medel—Jos Ia blong Jisas Kraes blong Ol Lata-dei Sent.
Long Latin Amerika, sam Lata-dei Sent oli ripotem se invitesen blong olgeta i go long ol fren blong atendem “Momon Jos”, mekem oli no glad blong kam. Hemia i jenis taem oli mekem invitesen ia blong kam long Jos Ia blong Jisas Kraes blong Ol Lata-dei Sent. Ol fren blong olgeta oli ansa se “sapos oli singaotem jos blong yu, Jos Ia blong Jisas Kraes, bae mifala i wantem blong kam mo luk.”
Long Yunaeted Stet, wan Praemeri boe i invaetem ol neba blong hem i kam long baptaes blong hem. Wan minista blong wan narafala bilif i bin talem se, bae hem i neva go long wan baptaes blong “Momon Jos.” Be from se hem i save se jos blong boe ia i lukluk nomo long Jisas Kraes, minista ia i go long baptaes ia wetem waef blong hem.
Taem wan ejen we i wok long saed blong plen i askem wan imel adres blong wan memba blong Jos, memba ia i ansa “ldschurch.org.”
“Wanem jos ia?” ejen ia i askem.
“Jos Ia blong Jisas Kraes blong Ol Lata-dei Sent,” memba ia i ansa.
“Mi stap go long wok plante dei mo i no gat wan taem we mi save tokbaot Lod,” ejen ia i talem. “Blong save se mi stap toktok long wan narafala Kristin man, i mekem dei blong mi i gud tumas.”
Memba blong Jos i kwiktaem apdeitem profael blong hem long wok wetem niufala Jos imel adres: ChurchofJesusChrist.org.1
Wan Promes I Bin Kam Tru
Ol naesfala stori ia i soem promes blong Presiden Russell M. Nelson we i bin hapen, we i go long Ol Lata-dei Sent long Oktoba 2018 mo bakegen long Epril 2020.
“Mi promesem yufala se sapos yufala i mekem bes blong yufala blong stretem nem blong Jos Ia blong Lod, Hem we i Jos blong Hem, bae i kapsaetem paoa mo blesing blong Hem long hed blong ol Lata-dei Sent, ol kaen ia we yumi neva luk bifo.” Presiden Nelson i bin talem. “Bambae yumi gat save mo paoa ia blong God blong helpem yumi blong tekem olgeta blesing blong gospel we i kambak, blong Jisas Kraes i go long evri nesen, famli, lanwis mo pipol, blong help blong mekem wol ia i rere from Seken Kaming blong Lod.”2
I no longtaem i pas, tru long ol sosol media akaon blong mi, mi bin invaetem ol Jos memba blong talem long mi abaot ol blesing we oli bin kasem, blong stap yusum stret nem blong Jos. I bin gat 2600 ansa we mi kasem mo i bin tajem hat blong mi.
Mi wantem serem samfala ansa ia wetem yufala. Bae yufala i harem save from we yufala tu i bin kasem ol semmak kaen blesing ia, taem yufala i bin folem kaonsel blong Presiden Nelson.
Kam Kolosap Moa long Jisas Kraes
Testemoni blong Jekob i bin tajem mi, abaot olsem wanem nem blong Jos i bin helpem hem blong lukluk nomo long Sevya: “Mi kam blong luksave se, sloslo lukluk blong mi ia blong lukluk nomo long Sevya i stap kam pat blong evri dei laef blong mi,” hem i serem wetem mi. “Taem mi tekem sakramen, mi tingbaot Hem mo sakrifaes blong Hem we i pemaot man. Taem mi ridim ol skripja, mi lisin moa long ol toktok mo ol narafala refrens blong Hem. Hemia i mekem mi kam moa kolosap long Hem mo i bin helpem mi blong andastanem moa responsabiliti blong Hem olsem Sevya mo Ridima blong mi.”
Mi filim blesing ia blong stap lanem wanem nem blong Sevya i minim long Beth mo Bryce: “Mi bin filim wan koneksen blong stap kolosap moa long Sevya blong mi,” Beth i talem. “Taem oli askem se mi stap go long wanem jos, mo mi ansa se mi blong Jos Ia blong Jisas Kraes blong Ol Lata-dei Sent, mi filim se, i gat wan tru filing blong pat long wan samting. Mi mi pat blong ol pipol blong Hem. Mi mi pat blong famli blong Hem. Mi blong Hem.”
Bryce i talem long mi se stret, nem blong Jos i stap helpem hem blong “tingbaot huia [mi stap] wok blong hem mo huia [mi stap] blong lukaotem blong kam moa olsem hem. Hemia i rimaenem mi se Sevya nao i wan ia we i givim ol tijing ia mo ol tijing ia oli no kam long ol man blong wol ia.”
“Nem Blong Sevya I Gat Paoa”
Haley, wan fultaem misinari i bin talem,: “Blong stap yusum stret nem blong Jos Ia blong Lod, i givim moa paoa mo atoriti taem yumi tijim ol narawan abaot gospel blong Hem we i bin kambak. Taem mi talem ‘Jos Ia blong Jisas Kraes blong Ol Lata-dei Sent,’ Spirit blong Lod i konfemem mo witnes se hemia i Jos Ia blong Lod we i bin kambak long wol ia tedei. !Mi lavem blong stap yusum stret nem from se mi stap ademap witnes blong mi we i laef i go wetem trutok ia!”
Mo Nicola i bin talem long mi: “Fastaem, sapos mi talem ‘Momon,’ oltaem bae i gat wan kwik filing blong tu tingting i stap wetem olgeta we oli gat semmak bilif wetem yumi. Yu save harem kolosap evri memori blong olgeta i kam kwik, we oli bin gat abaot ‘ol Momon.’ Be naoia i gat wan pis, plante taem oli akseptem. Nem blong Sevya i gat paoa. Hem i givim pis. Testemoni blong mi abaot trutok we i fulwan blong gospel i bin gro, taem mi stap talem stret nem blong Jos nomo. Mi filim Spirit evri taem mi talem. Samtaem, hem i hemia nomo mi save talem abaot wanem we yumi biliv long hem, be hem i inaf.”
Stretem ol Tingting We I No Stret
Harold wan yunivesiti profesa long Yunaeted Stet i talem se, blong stap yusum ful nem blong Jos i bin helpem hem blong stretem ol tingting we i no stret. Hem i talem long mi se wan studen we i stap traem blong talem sot wan storian long relijin, i talem olsem, “mi ting se evri relijin oli Kristin, be i no ol Momon.”
Harold i luk wan gudfala taem blong kliarem tingting ia we i no stret ia, mo hem i talem, “Mi talem long ol studen se ‘Momon’ i wan niknem we oli givim long ol memba blong Jos from biliv blong mifala long Baebol mo long Buk blong Momon, olsem tu skripja blong taem bifo, we oli witnes long Jisas Kraes.”
Mary i openem hat blong hem long mi blong stap serem olsem wanem ful nem blong Jos i blesem hem taem hem i stap tijim ol pikinini blong hem: “Ol pikinini blong mi oli nomo gat tumas tu tingting naoia, taem mi tijim olgeta se yumi Ol Sent blong Jos Ia blong Jisas Kraes long ol las-dei ia, bitim blong stap tingting long mifalawan olsem ol ‘Momon.’ Oli bin stap gat ol tingting we i fasfas mo askem, ‘?From wanem Momon? ?Hemia i minim se yumi no ol Kristin?’ Mi filim se jenis ia i bin helpem olgeta taem we oli stap toktok long ol narafala pikinini long skul we oli no gat bilif.”
“Mi Wan Misinari blong Jisas Kraes”
Presiden Nelson i promes se taem yumi yusum stret nem blong Jos, “bambae yumi gat save mo paoa ia blong God” blong serem gospel i go olbaot. Teresa i givim insperesen long mi, abaot stori blong hem long wanem i bin hapen, taem wan fren long ples blong wok i bin askem hem abaot Jos. Folem kaonsel blong Presiden Nelson, Teresa i stat taem hem i serem abaot ful nem blong Jos.
“Hem i intres long Jos,” Teresa i talem long mi. “Hem i stadi mo lukaotem wan ansa blong sam manis mo afta, tru long merikel, boe blong mi we i bisop, i baptaesem hem. Mi filim fulap glad long dei ia, mo famli blong mi tu. Ol promes ia oli tru.”
Jordan i talem se, plante pipol oli no save gud yet nem blong Jos. “Blong stap yusum ful nem blong Jos,” hem i talem, “i stap givim mi janis ia blong eksplenem olsem wanem Jisas Kraes i senta blong Jos mo from wanem yumi singaotem yumiwan olsem Ol Lata-dei Sent.”
Taem wan man i askem Chloe sapos hem i wan “Momon misinari,” hem i testifae wetem bigfala paoa se, “No, mi wan misinari blong Jisas Kraes.” Chloe i talem long mi se man ia i serem ol filing mo tingting blong hem blong wantem folem Sevya, mekem se Chloe i tijim hem se, Jos Ia blong Jisas Kraes blong Ol Lata-dei Sent, Sevya nao i lidim. Mo afta, Chloe i givim ol infomesen abaot Jos blong Hem long man ia.
“Singaotem Jos long Nem blong Mi”
Taem Jisas i talemaot nem blong Jos blong Hem long Profet Josef Smit, Sevya i talem: “Bae olsem ia nao oli mas singaotem jos blong mi long ol las dei, we i Jos Ia blong Jisas Kraes blong Ol Lata-dei Sent” (Doktrin mo Ol Kavenan 115:4). Mo long Ol Man blong Nifae, hem i talem, “Bae yufala i singaotem jos ia long nem blong mi,” from “?hao nao hem i jos blong mi sapos oli no singaotem hem long nem blong mi?” (3 Nifae 27:7, 8).
Mi testifae wetem wan Lata-dei Sent we nem blong hem, Tommie se, taem yumi yusum ful nem blong Jos, yumi kasem blesing mo yumi blesem ol narafalawan. Tommie i talem long mi, “Taem mi serem ol blesing blong stap wan memba blong Jos Ia blong Jisas Kraes blong Ol Lata-dei Sent wetem ol narafala man, long wan taem blong traehad mo fraet i stap win, mi luksave se mi stap helpem ol pipol blong save se i gat wan sef ples aot long strong win ia wetem ol disaepol blong Jisas Kraes , we i stap kea long olgeta mo we oli folem Hem.”